Yirile 15 - Cebaara Bible 2010

Mowizi ní Isirayɛli ye ŋúnugi kéele

¹ Lǎli bee ni a Mowizi ní Isirayɛli ye ŋúnugi naa ŋùu Yawe ma. Pe n jo: «Mii a ra ŋúu Yawe ma, níì cán wi n wi fàndaari nìjangbɔɔrɔ tɛ̀ɛn. Wi n syɔ́ɔngi ní gi fànvɔw wáa sólomi lɔ̀ʔɔ ni.

² Yawe wi nyɛ mii fǎngi ní mii ŋúnuyi yáriga, woro wi baa pye mii syɔɔli, woro wi nyɛ mii Kolocɔlɔw, mii i caa bàā wi kpɔ̀ʔɔrɔ́. Wi i nyɛ mii tóow Kolocɔlɔɔ, mii a ra wi kpɔ́ʔɔgi.

³ Yawe i nyɛ kapɛɛnkpumɔɔn. Wi mɛ́ɛgi gi nyɛ Yawe.

⁴ Wi n Faraɔnw kapɛɛnkpumɔn-wòtorobéle ní wi kapɛɛnkpumɔnbèle ŋɔrigɔ n wáa sólomi lɔ̀ʔɔ ni. Wi kapɛɛnkpumɔn-kùndigi-nyɛ́nɛ-wòlobèle n wɔ́ɔ̀ kòro Nyɛ́nɛri Solomɔ Lɔ́ʔɔ ni.

⁵ Lǒgi kùnguruyo n be wáa. Pe n tìgi n tɛ́ɛn lǒgi nɔ́ʔɔ na àmɛɛ kàdɛnɛgɛ nyɛ lè.

⁶ Ee Yawe, mɔ kaliige kɔ́gi n mɔ fandaari nìjanra tɛ̀ɛn. Ee Yawe, mɔ kaliige kɔ́gi n nigoow tɔ́nʔɔnɔ.

⁷ Bele be yìrigí mɔ kánmi na lè, mɔ i be ŋɔrɔgi ni cáan ní mɔ fannɛʔɛgi ní. Mɔ i mɔ fundanʔari gbànma sáanri ni yaari, a ti i be líi ni syée àmɛɛ nyàásige nyɛ lè.

⁸ Mɔ fínaaweegèle ŋɔ́ngara n lǒgi kpoʔolo kiyɛɛ na n yérige. Lòfóozɔ̀lɔyi n yére n pye àmɛɛ gungo nyɛ lè. Lǒgi kùnguruyo n nìri n yére sólomi lɔ̀ʔɔ nínge ni.

⁹ Nigoow maa ni gi nyuu níì jo: ‹Mii a taʔa be na da nɛnɛ. Mii a be nɛnɛ cò. Mii a yakoliri lɛɛ. Mii fúngi a nyíngi di kéeli na. Mii a ŋɔséew kɔ́n, mii kɔ́gi a be serige láa.›

¹⁰ Mɔ n mɔ nyɔ́ɔgi káfalaga fɛɛ n wáa, a sólomi lɔ̀ʔɔ be tɔ́n. Pe n tìgi n tɛ́ɛn fànnɛʔɛgɛ lógi nɔ́ʔɔ na àmɛɛ tunmɔnyinnɛ nyɛ lè.

¹¹ Ee Yawe, wìí wi nyɛ mɔ félege kolocɔlɔbèle nínge ni? Wìí wi sín n foro àmɛɛ mɔ nyɛ lè? Wìí wi nyɛ mɔ félege, wee wi nyɛ lè wojaɔn ní n foro, ní i nyɛ fyáara yáriga, níì yɛlɛ ní kpɔ̀ʔɔrɔlɔ ní, ní i kakpoloyo kpéʔele?

¹² Mɔ n mɔ kaliigi sánʔa, a tári be jɔ́ɔ.

¹³ Mɔ n syɛ́ɛnbèle naa yɛ́ʔɛ kíni, poro bele nyúnyo mɔ syɔɔ lè mɔ funjǎngi báriga ni, Mɔ n be yɛ́ɛgi kíni mɔ séekpɔɔw báriga ni ni syée ní be ní mɔ tɛɛkòrojǎngi ma.

¹⁴ Syɛɛnfeleyi n gee bee lóʔo a yi i cɛ̀lɛ́. Fyáakpɔɔrɔ n Filisitini ye cò.

¹⁵ Edɔmi sùlasiibèle kàfɔɔlɔ i fɛ̀ɛgí gbanʔama. Fyáara n Mowabi yòdaʔayi fànʔafɔbiigéle cò, a ge i cɛ̀lɛ́. Kanaan syɛ́ɛnbèle myɛ fànʔa n kwɔ́ɔ.

¹⁶ Fyáakpɔɔri ní zɔ̀nviikɔniri i nyɛ be na. Mɔ kɔ́gi fàngbɔʔɔ n be kàriga boboobéle, a be pye àmɛɛ kàdɛnɛgɛ nyɛ lè, fwɔɔ bi taa mɔ syɛ́ɛnbèle í sɔ̀lɔ. Ee Yawe, fwɔɔ bi taa be sɔ̀lɔ, syɛ́ɛnbèle bele mɔ taa lè.

¹⁷ Mɔ a kári ní be ní bi sa télege mɔ kɔ́rigi nyanbelege na. Tɛ́ɛgi ni, gee mɔ sámaga lè ki pye mɔ tɛɛ̀tɛ́nɛgi, ee Yawe. Tɛɛcǎngee mɔ sámaga lè ní mɔ kɔ́yi ní, Kàfɔw.

¹⁸ Yawe a kòro fǎngi na làla o làla kwɔ́ɔmɔ fun.»

¹⁹ Lǎli ni Faraɔnw syɔ́ɔnyɔ, ní wi kapɛɛnkpumɔn-wòtorobèle, ní wi syɔɔnfǎnbèle jée sólomi lɔ̀ʔɔ ni lè, a Yawe sólomi lɔ̀ʔɔ lúrugo n tɔ́n be na. Kàjáa Isirayɛli ye maa tánʔa n foro sólomi lɔ̀ʔɔ ni, ní tɔ́lɔyi ní woweregiye ní.

²⁰ Kanyaajoocew Miriyami wi pye lè Aarɔn yɛʔɛfɔw, a woro wi tàmáw láa, a cébèle bele myɛ yiri n taʔa wi na ní tàmábèle pèle, ní yɔɔlɔ̀ ní.

²¹ A Miriyami i ŋúnugi naa ŋúu pe si i gi syoo wi ma. Wi maa jo: «Ki n yɛlɛ yaa ŋúu yaa Yawe kpɔ̀ʔɔrɔ́. Níì cán wi n wi fàndaari nìjangbɔɔrɔ tɛ̀ɛn. Wi n syɔ́ɔngi ní gi fànvɔw wáa sólomi lɔ̀ʔɔ ni.»

ISIRAYƐLI YE TANʔANI KEELE FIIMI TARA NI Mara lǒgi kéele

²² A Mowizi Isirayɛli ye yɛ́ɛgi kíni n yìri ní be ní Nyɛ́nɛri Solomɔ Lɔ́ʔɔ taana. A be Syuri fìími tára kólogo láa ni syée. A be canya taanri tánʔana kpéʔele fìími tára ni, pe ga lɔ̀ʔɔ taa í.

²³ A be sáà nan Mara na, kàjáa pe ga gbàn n Mara lǒgi gbaa í ki soroli báriga ni. Koro na be mɛ́ɛgi le gi na ni gi yiri Mara.

²⁴ A syɛ́ɛnbèle fala n séli ni Mowizi sànʔá níì jo: «Nyàʔá wolo a gbaa?»

²⁵ A Mowizi yákpoli wáa Yawe kurugo, a Yawe tiicerigaa félege tɛ̀ɛn wi na. A wi gee bee wáa lǒgi ni, a lǒgi kàri n tɛ́nɛ. Tɛ́ɛgi bee ni Yawe làlwabéle télege ní wɔ́ɔ̀ tundunro joo be ma. Nɛɛ bee wi wɔ́ɔ̀ be sɛʔɛ n wéle.

²⁶ Wi n be pye: «Yele ga ni mii Yawe yele Kolocɔlɔw jóomɔ sámagi ni lúro, ní i gi kpéʔele gee gi sín mii nyɛ́nɛ na lè, níì yele líiyi cáan ni mii kajoodɛɛngèle lúro, níì mii làlwaw kèlē myɛ kɔn ní i ge kpéʔele, yáamee mii cáan Ezyipiti ye na lè, mii a tée bi pàa cáan yele na í. Níì cán mii wi nyɛ Yawe, wee wi yele poori lè.»

²⁷ A pe baa nan Eliimi na, pùnweegéle kɛɛ ní siin maa pye yaà n fàra sɛʔɛtiiye togoye taanri ní kpɔrigɔ na. A be tɛ́ɛn yaà beè lǒgi taana.