Yirile 14 - Cebaara Bible 2010

Faraɔnw n yiri n taʔa Isirayɛli ye na ni nɛnɛ

¹ A Yawe gi joo Mowizi ma níì jo:

² «Ki joo Isirayɛli ye ma mí be pye be kolo pe sa be fànikpaayi kóri Pi-Hahirɔti yɛ́ʔɛ ma Migidɔli ní sólomi lɔ̀ʔɔ nínge ni, Baali-Sefɔn zǐnmi na. Tɛ́ɛgi bee ni yele a fànikpaayi kóri sólomi lɔ̀ʔɔ taana.

³ Faraɔnw a gi joo Isirayɛli ye kéeli na si jo: ‹Pe n pùuni tári ni. Fìími tára n be lìi.›

⁴ Mii a Faraɔnw fúngo gbàn. Wi a yiri taʔa be na da nɛnɛ. Mii si a kpɔʔɔrɔ taa Faraɔnw ní wi kapɛɛnkpumɔnbèle myɛ kéele na, koro ga pye Ezyipiti ye a gi cán bi cán mii wi nyɛ Yawe.» A Isirayɛli ye wɔ́ɔ̀ gi kpéʔele kánmi bee na.

⁵ A pe gi joo Ezyipiti fànʔafɔw ma níì jo syɛ́ɛnbèle n yiri n fàn. A Faraɔnw sɔ̀ngurɔ, ní wi falipyebèle wóro kàri Isirayɛli ye kàbangi na. A be jo: «Nyàʔá na wolo gee naa kpéʔele níì Isirayɛli ye yaʔa a be kári, pe a ní fali pye wolo ma í?»

⁶ A Faraɔnw wi wòtorow pwɔɔ níì wi sùlasiibèle kɔ́ri n pínɛ ní wiyɛɛ ní.

⁷ A wi kapɛɛnkpumɔn-wòtoro-nyɛ́nɛ-wòlobēle saala taanri láa n fàra Ezyipiti kapɛɛnkpumɔn-wòtorosanbèle myɛ na. Kapɛɛnkpumɔn-kùndigibéle taanri-daanri si i nyɛ pe myɛ nibin nibin nyúnyo na.

⁸ A Yawe Faraɔnw fúngo gbàn, Ezyipiti fànʔafɔw. A Faraɔnw yiri n taʔa Isirayɛli ye na ni nɛnɛ. Isirayɛli ye si maa yiri n kwɔ́ɔ n pye peyɛɛ ma.

⁹ A Ezyipiti ye yiri n taʔa be na ní Faraɔnw syɔ́ɔnyɔ, ní wi kapɛɛnkpumɔn-wòtorobèle myɛ ní, n fàra wi syɔɔnfǎnbèle ní wi sùlasiibèle na n sáà be nɛnɛ n cò Pi-Hahirɔti taana, Baali-Sefɔn zǐnmi na, beè pe da be fànikpaayi kóri lè sólomi lɔ̀ʔɔ taana.

¹⁰ Faraɔnw maa ni nùuní ni maa. A Isirayɛli ye ga yɛ́ɛyi yìrige n wéle n Ezyipiti ye nyaa pe i maa poro kurugo, a be fyáa gbanʔama ní i yákpogèle wáa Yawe kurugo.

¹¹ A be Mowizi yari: «Nyanya lé yi da fɔ̀n Ezyipiti ni, á mɔ wolo kɔ́ri n pan fìimɛ tári naa ma wolo í ba kùu? Nyàʔá mɔ pye gee wolo na àmɛɛ mɔ wolo kɔ́ri n yirige Ezyipiti ni lè?

¹² N wo yaʔa yaà Ezyipiti ni, gee naa ban wolo da ni nyuu mɔ ma ì níì mɔ pye: ‹Wolo yaʔa wolo í da báara Ezyipiti ye ma?› Níì cán wolo í da báara Ezyipiti ye ma, gee bee n pɔ́rɔ n sɔ̀lɔ sáni wolo í kùu fìími tára ni lè.»

¹³ A Mowizi gi joo syɛ́ɛnbèle ma níì be pye: «Yele a kɔ́ ra fɛ̀ɛgí í. Ki n yɛlɛ ye yére sági, yele a gi nyaa kánmee na Yawe a yele syɔɔ lè níjanʔa. Níì cán Ezyipiti ye yele nyaagi lè bele níjanʔa, yele a ní be nyaa nyáana í.

¹⁴ Yawe a kapɛɛnni kpúmɔn bi kaan yele ma. Yele si na, ki n yɛlɛ ye kòro pyèrio.»

Kolocɔlɔɔ n tɛɛsɔ̀lɔgɔ múgu sólomi lɔ́ʔɔ ni

¹⁵ A Yawe gi joo Mowizi ma níì wi pye: «Nyàʔá na mɔ yákpoli wáa mii kurugo? Ki joo Isirayɛli ye ma mí be pye paa syée tánʔani kurugo.

¹⁶ Mɔ si na, mɔ kagbeeli yìrige mi mɔ kɔ́gi sánʔa sólomi lɔ̀ʔɔ ǹjoʔo ni, mi gi tíla. Isirayɛli ye a tɔ̀nɔ́ jée foro sólomi lɔ̀ʔɔ nínge ni ní tɔ́lɔyi ní woweregiye ní.

¹⁷ Mii si na, mii a Ezyipiti ye fúnyi gbàn jàngó pe jée be kurugo. Mii si a kpɔʔɔrɔ taa Faraɔnw ní wi kapɛɛnkpumɔnbèle myɛ, ní wi kapɛɛnkpumɔn-wòtorobèle, ní wi syɔɔnfǎnbèle kéele na.

¹⁸ Lǎli ni mii ga kpɔʔɔrɔ taa lè Faraɔnw ní wi kapɛɛnkpumɔn-wòtorobèle, ní wi syɔɔnfǎnbèle kéele na lè, Ezyipiti ye a gi cán bi cán mii wi nyɛ Yawe.»

¹⁹ Kolocɔlɔɔ nyɛ̀ʔɛni tunduɔn wi da kíni Isirayɛli ye yɛ́ɛgi na lè, a wi lúru n kàri be tɛɛkòrogi kàdoʔo ma, a fàfaangi wɔ́ɔ̀ núngo pe yɛʔɛ̀ ma n kàri be kàdoʔo ma.

²⁰ A gi jée Ezyipiti ye tɛɛkòrogi ní Isirayɛli ye tɛɛkòrogi nínge ni. A gi kàbangaa pye yébilimɛ, kàa si i nyɛ gbɛ̀ɛnmɛ. Ki maa ni gbɛ̀ɛ́nmi kaangi yébiligi ni. Pe ga téè nùuni peyɛɛ na í yébiligi myɛ ni.

²¹ A Mowizi wi kɔ́gi sánʔa sólomi lɔ̀ʔɔ ǹjoʔo ni. A Yawe sólomi lɔ̀ʔɔ ŋɔrigɔ yébiligi bee myɛ ni ní káfalakpɔʔɔ ní, gee gi yìri canʔafolomɔ ma lè. A gi sólomi lɔ̀ʔɔ ceri n pye tɛɛwaʔa.

²² A Isirayɛli ye jée n foro sólomi lɔ̀ʔɔ nínge ni ní tɔ́lɔyi ní woweregiye ní. A lǒgi yére n pye be ma gungo pe kàliige, ní be kàmɔnɔ ma.

²³ A Ezyipiti ye taʔa be na. A Faraɔnw syɔ́ɔnyɔ myɛ, ní wi kapɛɛnkpumɔn-wòtorobèle, ní wi syɔɔnfǎnbèle jée be kurugo sólomi lɔ̀ʔɔ nínge ni.

²⁴ A ki ga pye nyǐnjerigi na, n Yawe yaʔa náagi fàfaantɔnɔgɔ ni, a wi Ezyipiti ye kapɛɛnkpumɔnbèle kabiga wéle, níì gi nyáʔami.

²⁵ Wi maa be kapɛɛnkpumɔn-wòtorobèle sàkoyo kɔ́nɔgi n táriga, a be tánʔani kéele gbàn. Lǎli bee ni a Ezyipiti ye jo: «Ye tíi waa fé Isirayɛli ye na. Níì cán Yawe i kapɛɛnni kpúmɔn ní wolo Ezyipiti ye ní ni kaangi be ma.»

²⁶ A Yawe gi joo Mowizi ma níì wi pye: «Mɔ kɔ́gi sánʔa sólomi lɔ̀ʔɔ ǹjoʔo ni, lǒgi a lúru sogi bi Ezyipiti ye, ní be kapɛɛnkpumɔn-wòtorobèle, ní be syɔɔnfǎnbèle wáa.»

²⁷ A Mowizi wi kɔ́gi sánʔa sólomi lɔ̀ʔɔ ǹjoʔo ni nyǐnjerigi na, a sólomi lɔ̀ʔɔ lúru n pye gi tɛɛlɛɛgi ni. Ezyipiti ye maa ni fé gi na, a Yawe si be ŋɔrigɔ n wáa yaà gi níngi ni.

²⁸ A lǒgi lúru n sogi n kapɛɛnkpumɔn-wòtorobèle, ní syɔɔnfǎnbèle, ní Faraɔnw kapɛɛnkpumɔnbéle myɛ wáa, poro bele be tɛ́nɛ̀ jée lè sólomi lɔ̀ʔɔ ni n taʔa Isirayɛli ye na ni nɛnɛ. Pe wàa nibin ga syɔɔ í.

²⁹ Kàjáa Isirayɛli syɛ́ɛnbèle maa tánʔa n foro sólomi lɔ̀ʔɔ nínge ni ní tɔ́lɔyi ní woweregiye ní. A lǒgi yére n pye be ma gungo pe kàliige ní be kàmɔnɔ ma.

³⁰ Cángi bee na Yawe Isirayɛli ye yirige Ezyipiti ye kɔ́yi ni. A Isirayɛli ye Ezyipiti ye kúceri nyaa sólomi lɔ̀ʔɔ lógbê na.

³¹ A Isirayɛli ye gi nyaa gee Yawe kpéʔele Ezyipiti ye na ní séew kɔ́lɔ ní lè. A syɛ́ɛnbèle fyáa Yawe na. A be tága Yawe na, ní wɔ́ɔ̀ tága wi falipyew Mowizi na.