Wuruti 4 - Cebaara Bible 2010

Bowɔzi n Elimelɛki kɔ́rigi yìrige n yaʔa beè

¹ A Bowɔzi lúgu n kári kpàánweeli ma n sáà tɛ́ɛn yaà. Wéle, wee má nyùnzyɔɔri fànʔa nyɛ lè, woro wee kéele Bowɔzi da joo lè, a woro kàri ni sɔ̀lɔ́. A Bowɔzi wi pye: «Yɔrɔɔ, da maa, ba tɛ́ɛn nɛɛ naa.» A wi pan n baa tɛ́ɛn.

² A Bowɔzi nànbēle kɛɛ yeri kěgi wólɛɛbéle ni, ní baa be pye: «Ye tɛ́ɛn nɛɛ naa.» A be tɛ́ɛn.

³ Wee má nyùnzyɔɔri fànʔa nyɛ lè, a wi woro pye: «Tálɛɛli li da pye wolo senyɛnw Elimelɛki wóli lè, Nowemii wi yìri Mowabi tári ma n lúru n pan lè, wi i li pára.

⁴ A mii si i sɔ̀ngí bi gi joo tɛ̀ɛn mɔ na si mɔ pye: ‹Li syɔɔ wodɛ́ɛnbèle naa nyɛ́nɛ na, ní mii syɛ́ɛnbèle wólɛɛbéle nyɛ́nɛ na.› Mɔ ga ni caa bi li syɔɔ, mi li syɔɔ. Mɔ si ga zǐn pye mɔ o caa bi li syɔɔ í, mi gi joo mii í gi cán. Níì cán mɔ má nyùnzyɔɔri fànʔa nyɛ wozeliw, á mii si taʔa mɔ na.» A wi jo: «Mii wi a gi syɔɔ.»

⁵ A Bowɔzi jo: «Cángee na mɔ ga ségi syɔɔ Nowemii ma lè, mɔ a gi pínɛ syɔɔ ní kúw cɔ́ɔ Wuruti ní wi lè Mowabi ye wów, koro ga pye bi kúw mɛ́ʔɛ yaʔa gi kòro beè wi kɔ́rigi na.»

⁶ Wee má nyùnzyɔɔri fànʔa pye lè, a woro wi yari: «Mii a gbǎn gi syɔɔ gi pye mii wóʔo í, jàngó koro a kɔ́ mii kɔ́rigi kálagi í. Ki syɔɔ gi pye mɔ wóʔo, koro gee syɔɔlɔ fanʔa gi nyɛ mii ma lè, níì cán mii a gbǎn gi syɔɔ í.»

⁷ Kánmi naa na ki da ni kpéʔele Isirayɛli ni booma ni ni nyùnzyɔɔrɔ kéele wàlá yafalira kéele fíligi, koro gi nyɛ, wee a wi taʔalagi wòlo bi kaan wi pínɛnyɛnw ma. Gee bee i gáà pye séera Isirayɛli ni.

⁸ Koro na wee má nyùnzyɔɔri fànʔa pye lè, a woro Bowɔzi pye: «Ki syɔɔ gi pye mɔ wóʔo.» Níì fala n wiyɛɛ taʔalagi wòlo.

⁹ Lǎli bee ni a Bowɔzi wolɛɛbèle ní syɛ́ɛnbèle myɛ pye: «Yele i nyɛ séerabéle níjanʔa, ncan yáriri myɛ ti da pye Elimelɛki, ní Kiliyɔn, ní Malɔn ma lè, mii n di syɔɔ Nowemii ma.

¹⁰ Mii n wɔ́ɔ̀ Wuruti syɔɔ wi pye mii cɔ́ɔ, wi lè Mowabi ye wów, wi pye lè Malɔn céw, koro ga pye bi kúw mɛ́ʔɛ yaʔa gi kòro beè wi kɔ́rigi na, jàngó wi mɛ́ɛgi a kɔ́ kwɔ́ɔ bi yiri wi senyɛnbèle nínge ni í, ní wi kěgi kpàánweele na í. Yele i nyɛ gi séerabéle níjanʔa.»

¹¹ Syɛ́ɛnbèle myɛ be pye lè kpàánweeli na n fàra wolɛɛbèle na, a poro jo: «Wolo i nyɛ gi séerabéle. Céw wi a jée mɔ kpáagi ni lè, ki n yɛlɛ Yawe í wi kpéʔele Arasyɛli ní Leya félege, poro bele siin be Isirayɛli narigbaagi faan lè. Ki n yɛlɛ mɔ í pye séefɔlɔ Efirata ni, ní mɛ́ʔɛfɔlɔ Bɛtilehɛmi ni.

¹² Yòdaʔagee Yawe a kaan mɔ ma cepìíw naa báriga ni lè, ki n yɛlɛ ki mɔ kpáagi yaʔa gi pye àmɛɛ Perɛsi kpáagi nyɛ lè, woro wee Tamari see Zyuda ma lè.»

Bowɔzi n Wuruti láa wi cɔɔ̀: Obɛdi seeli kéele

¹³ A Bowɔzi Wuruti láa a wi pye wi cɔɔ̀. A wi ga sínɛ ní wi ní, a Yawe gi yaʔa a Wuruti yére fícɛnnɛ na, ní baa nànbile see.

¹⁴ A cébèle Nowemii pye: «Yawe n yɛlɛ ní kpɔ̀ʔɔrɔlɔ ní, ncan wi ga mɔ yaʔa a mɔ fɔ̀n nyùnzyɔɔɔ ni níjanʔa í, woro wee mɛ́ʔɛ ki a ba kpɔ́ʔɔ lè Isirayɛli ni.

¹⁵ Wi a mɔ siiw lúrugo kàriga wovɔɔn ní, si mɔ lɛɛgwɔɔri túgoro láa. Níì cán mɔ piiw cɔ́ɔ wi tàmaga le ní mɔ ní lè, woro wee wi sɔ̀lɔ mɔ ma lè nànbiigéle kɔrɔsiin na, woro wi wi see n kaan mɔ ma.»

¹⁶ A Nowemii pìíw syɔɔ n taʔa wi fìcibigi na, woro wi pye wi gbóofɔw.

¹⁷ Wi tɛ́ɛnnyɛnbèle be lè cébèle, a poro mɛ́ʔɛ le wi pìíw na níì jo: «Nànbile n see Nowemii ma.» A pe i wi yiri Obɛdi. Woro wi pye Izayi tóow, Izayi wi pye lè Davidi tóow.

Davidi tóolɛɛyi mɛ́ɛyɛ

¹⁸ Perɛsi yòdaʔayi yi yee naa: Perɛsi n Hesurɔn see,

¹⁹ á Hesurɔn Arami see, á Arami Aminadabi see,

²⁰ á Aminadabi Nasyɔn see, á Nasyɔn Salimɔn see,

²¹ á Salimɔn Bowɔzi see, á Bowɔzi Obɛdi see,

²² á Obɛdi Izayi see, á Izayi Davidi see.