Wuruti 2 - Cebaara Bible 2010

Wuruti i yaliikɔri caa Bowɔzi ségi ni

¹ Nowemii nǎnw Elimelɛki syɔ́ɔnwaa si maa pye yaà, wi maa tɔ̀nɔ n pye báriga syɔ́ɔn, ní lɔrɔfɔlɔ narigbaagi ni, pe maa ni wi yiri Bowɔzi.

² Wuruti wi lè Mowabi ye wów, a woro Nowemii pye: «Mii a kári séyi ma bi sa ra yaliikɔri caa. Wee wi ga sáà fɔ̀lɔ n mii syɔɔ lè, mii a ra di caa wee bee kurugo.» A wi wi pye: «Da syée, ni pyà.»

³ A wi kári n sa ni yaliikɔri caa segaa ni yaliilaabèle kurugo. A gi nyaa ségi bee i nyɛ Bowɔzi wóʔo, wi lè Elimelɛki narigbaagi wówaa.

⁴ A Bowɔzi kàri n yìri yaà Bɛtilehɛmi ma n baa nan, níì yaliilaabèle pye: «Ki n yɛlɛ Yawe í pye ní yele ní.» A be wi yari: «Ki n yɛlɛ Yawe í dùbaw taʔa mɔ na.»

⁵ A Bowɔzi gi joo wi falipyewee ma wi pye lè yaliilaabèle kɔ̀rɔsiifɔlɔ, níì jo: «Wìí wóo wi nyɛ cepìíw naa?»

⁶ Falipyew wi pye lè yaliilaabèle kɔ̀rɔsiifɔlɔ, a woro wi yari: «Mowabi ye cepìíw wi yìri Mowabi tári ma n pan ní Nowemii ní lè woro wii.

⁷ Wi n baa jo: ‹Ki yaʔa mii í da yaliikɔri caa yaliipwɔɔgèle nínge ni yaliilaabèle kurugo.› Nlaa si wi pan lè nyǐngi nyɔ́ɔ na, wi ga kɔ́ɔ̀ tɛ́ɛn í fwɔɔ n baa nan lǎli naa na, kapye lǎlee cɛɛri ban wi sáà tɛ́ɛn kpáagi ma lè í.»

⁸ A Bowɔzi Wuruti pye: «Ni pyà, líiyi cáan mi sámaga mi lóʔo. Mɔ a kɔ́ kári segaa nikwɔɔ ma sa ra yaliikɔri caa í. Mɔ a ní kɔ́ núngo nɛɛ naa í. Tan mii falipyecebèle na.

⁹ Da kɔ̀rɔsíi, ségee yaliire pe ga ni lée lè, mí taʔa be na maa syée yaà beè. Wéle, mii n gi joo n gbàn falipyebèle ma níì jo wàa a kɔ́ tánga mɔ na í. Lògbaʔa ga mɔ jáa, maa syée kasǎngèle ma mi sa lògaa gbaa, gee falipyebèle kóo lè.»

¹⁰ Lǎli bee ni a wi tìgi n too n yɛ́ɛgi cíbele tári na, níì wi pye: «Mɛ̀ɛ́ gi pye á mɔ kɔ́ɔ̀ mii nyaa syɔɔn, níì mii kpɔ́ʔɔ kánmi naa félege na, mii wee wi lè nitelege?»

¹¹ A Bowɔzi wi yari: «Gee myɛ mɔ kpéʔele mɔ nanw nɔ́ɔ ma nlaa mɔ nanw kùu lè, pe n gi joo n tɛ̀ɛn mii na. Ní àmɛɛ mɔ mɔ tóow, ní mɔ nɔ́ɔw, ní mɔ táseeri yaʔa lè, níì pan syɛɛnfelegaa kurugo, gee gi lè mɔ da sélì gi cán í.

¹² Gee mɔ kpéʔele lè, ki n yɛlɛ Yawe í gi sìndɛɛgi lúrugo mɔ ma. Yawe wi lè Isirayɛli ye Kolocɔlɔw, woro wee fókaanya láara ni mɔ fàn n baa jée lè, ki n yɛlɛ wi tɔ̀nɔforoo kaan mɔ ma.»

¹³ A wi jo: «Mɔ n tɔ̀nɔ n mii kpɔ́ʔɔ, ni kàfɔlɔ. Mɔ n mii kpɛʔɛlɛ. Mɔ syɛ́ɛnri n mɔ falipyecew fúngo nyíngi, bi gi taa mii ga caà mɔ falipyecewaa kwɔ́ɔ í.»

¹⁴ A làriliili ga nan, a Bowɔzi wi pye: «Da maa mi ba ra búruw líi, máā mɔ búruceriyi nígiri cɛ́ɛngi ni.» A wi baa tɛ́ɛn yaliilaabèle taana. A wi yaliikalaraa kaan wi ma, a wi lìi n tín a tàa kòro wi ma.

¹⁵ A wi ga yìri bàā yaliikɔri caa, a Bowɔzi gi joo n gbàn wi falipyebèle ma níì jo: «Ye wi yaʔa waa yaliikɔri caa yaliipwɔɔgèle nínge ni, ye a kɔ́ ra wi faari í.

¹⁶ Alí yaa kɔjǒgèle yaliikanyaa yaari yaa tuun wi ma jàngó waa yoro jóo, ye si a kɔ́ ra fúlo wi na í.»

¹⁷ A wi yaliikɔri caa ségi ni n baa cángi kwɔ́ɔ. Dee wi taa lè, a wi di sàn, a di orizye gɔ̀nvaʔanyɛngɛ kwɔ́ɔ.

¹⁸ Dee wi sáà caa n taa lè, a wi pan ní di ní kàʔa ma n baa tɛ̀ɛn wi nǎnw nɔ́ɔ na. A wi wɔ́ɔ̀ wi woliigòrori yirige n kaan wi ma.

¹⁹ A wi nǎnw nɔ́ɔ wi pye: «Sán mɔ sáà yaliikɔri caa níjanʔa, ba sán mɔ sáà báara? Wee wi yákirii yaʔa mɔ na lè dùbaw í pye wi na.» Wee séʔe ni wi sáà báara lè, a wi wi kéeli joo n tɛ̀ɛn wi nǎnw nɔ́ɔ na níì jo: «Nǎnwee má mii sáà báara lè, pe i wi yiri Bowɔzi.»

²⁰ A Nowemii wi pìíw cɔ́ɔ pye: «Yawe wi nyɛ lè wi funjǎngi o kwóo niweebèle ní kúbèle kàbaan na í, ki n yɛlɛ woro í dùbaw taʔa wi na.» A Nowemii níì wi pye: «Nǎnw bee n nùuni wolo na. Bele má wolo nyùnzyɔɔri fànʔa nyɛ lè wi i nyɛ bele bee wàa.»

²¹ Wuruti wi lè Mowabi ye wów, a woro níì jo: «Wi n wɔ́ɔ̀ mii pye: ‹Tan mii falipyebèle na bi taa pe mii yaliiri myɛ láa kwɔ́ɔ.› »

²² A Nowemii wi pìíw cɔ́ɔ Wuruti pye: «Ki n nyɔɔ, ni pyà, ki n yɛlɛ mɔ í pínɛ da syée ní wi falipyecebèle ní. Ki ga yɛlɛ pe kɔ mɔ fàrá nyaa segaa nikwɔɔ ni í.»

²³ A wi tan Bowɔzi falipyecebèle na n sa ni yaliikɔri caa fwɔɔ bi taa orizyew ní bilew làrilaala í ba kwɔ́ɔ. Wi maa kòro ní wi nǎnw nɔ́ɔ ní.