Wuruti 1 - Cebaara Bible 2010

Elimelɛki kpáagi wòolo wɔʔɔyɔ kéele

¹ Lǎli ni jàbɔbèle da ni Isirayɛli ye kàragí lè, kateekpɔʔɔ maa baa too tári na. A nànwaa yiri Bɛtilehɛmi ni, wi lè Zyuda tári ni, woro ní wi céw, ní wi jáabèle siin ní, ni syée Mowabi tári ma bi sa tɛ́ɛn yaà bi làlaa kwɔ́ɔ.

² Nǎnw bee mɛ́ʔɛ ki da pye Elimelɛki, wi céw mɛ́ʔɛ si i nyɛ Nowemii, wi jáabèle siin mɛ́ɛyɛ si i nyɛ Malɔn ní Kiliyɔn. Pe maa pye Efirata wòolo Bɛtilehɛmi ni, Zyuda tári ni. A pe ga sáà nan Mowabi tári na, a be tɛ́ɛn nɛɛ bee.

³ Koro kàdoʔo ma a Nowemii nǎnw Elimelɛki baa kùu, á wi ní wi pìíbèle siin kòro beè.

⁴ A poro baa Mowabi ye cébèle pèle pɔri. Wozeliw mɛ́ʔɛ maa pye Oripa, siin wów mɛ́ʔɛ si i nyɛ Wuruti. A be tɛ́ɛn yaà n yɛ̀ʔɛlɛ kɛɛ félege kwɔ́ɔ.

⁵ A Malɔn ní Kiliyɔn myɛ siinw wɔ́ɔ baa kùu, a céw bɔ̀nɔ wi pìíbèle siin, ní wi nǎnw ní.

Wuruti n kári ní Nowemii ní Bɛtilehɛmi ma

⁶ Lǎli bee ni a wi yìri Mowabi tári ma, woro ní wi pìíbèle càbala ní bi lúru pan. Níì cán wi maa pye yaà Mowabi tári ni níì gi lóʔo Yawe n wi syɛ́ɛnbèle dɛ̀ɛmɛ níì yaliire kaan be ma.

⁷ Tɛ́ɛgee ni wi da pye lè, a wi yiri yaà, woro ní wi pìíbèle càbala siin ní n kólogi láa bi lúru pan Zyuda tári ma.

⁸ A Nowemii wi pìíbèle càbala siin pye: «Yaa syée, ye lúru yaa syée ye myɛ nibin nibin yele nɔ́ɔbèle kpaaya ma. Funjǎngee yele da ni kpéʔele ní bele ní be kùu lè, ní wɔ́ɔ i gi kpéʔele ní mii ní lè, ki n yɛlɛ Yawe í da koro kpéʔele yele ma.

⁹ Ki n yɛlɛ Yawe í sa ŋɔ́ndaala kaan ye myɛ nibin nibin ma bele kpaaya ni pe a sa pye lè yele nǎnbèle.» Níì be syɔɔnri syɔɔnri. A pe i nyaan ni yákpogèle wáa.

¹⁰ A be wi pye: «Eʔe, wolo a ra syée ní mɔ ní mɔ syɛ́ɛnbèle ma.»

¹¹ A Nowemii jo: «Ye lúru yaa syée, ni pìibēle. Nyàʔá na yele caa bi kári ní mii ní? A pìibēle ní i lé mii láagi ni, bele pe a gbǎn ba pye lè yele nànbēle?

¹² Ye lúru ni pìibēle, yaa syée! Níì cán mii n lɛɛ n sɔ̀lɔ bi ní pye nàɔn cɔ́ɔ. Mii si ga caa wírè jo: ‹Ki a gbǎn kpéʔele, mii a pye nàɔn ma yébiligi naa ni bi nànbiigéle see,›

¹³ a yele a sige lé bi taa pe ba lɛɛ? A yele a cée lé si kòro nya nànbēle fun ni? Eʔe, ni pìibēle, níì cán mii funbɛɛnri n nɛʔɛ n sɔ̀lɔ yele wóri na. Yawe n kɔlɔ̀ taʔa mii na.»

¹⁴ A be ní i nyaan ni yákpogèle wáa, á Oripa wi nǎnw nɔ́ɔ syɔɔnri syɔɔnri, níì lúru. Kàjáa Wuruti maa tan wi na.

¹⁵ A Nowemii jo: «Wéle, mɔ pínɛnyɛnw n lúru n kári wi syɛ́ɛnbèle ní wi kolocɔlɔbèle ma. Lúru maa syée mɔ pínɛnyɛnw kurugo.»

¹⁶ A Wuruti jo: «Mɔ a kɔ́ ra mii ŋàʔaná mii í mɔ yaʔa si lúru bàā syée í. Tɛ́ɛgee ni mɔ ga kári lè, beè mii a kári. Mɔ ga sáà kòro tɛ́ɛgee ni lè, beè mii a kòro. Mɔ syɛ́ɛnbèle pe a pye mii syɛ́ɛnbèle, mɔ Kolocɔlɔw si pye mii Kolocɔlɔw.

¹⁷ Mɔ ga sáà kùu tɛ́ɛgee ni lè, nɛɛ bee mii a kùu pe mii tɔ́n yaà. Mii ga láʔa mɔ na kapye kùu ban í, wɔʔɔgee gi pee lè, ki n yɛlɛ Yawe í koro taʔa mii na.»

¹⁸ A Nowemii ga gi nyaa wi n tɔ̀nɔ n gi kɔ̀rirɔ bi kári ní woro ní, a wi láʔa, wi ga níì yarigaa joo wi ma í.

¹⁹ A be myɛ siinw i táanri fwɔɔ n sáà nan Bɛtilehɛmi na. Lǎli ni be jée Bɛtilehɛmi ni lè, a kěgi syɛ̀ɛnnɛ myɛ i káama be kéeli na, a cébèle i gi nyuu níì jo: «Nowemii lé wi wee?»

²⁰ A wi be pye: «Ye a kɔ́ ra mii yiri Nowemii í, yaa mii yiri Mara. Níì cán Séew Myɛ Kàfɔlɔ n tɔ̀nɔ n mii sìíw kàriga yasorogo.

²¹ Mii káritɔw, mii kɔ́yi maa nyìn, Yawe si n mii lúrugo n tórigo naa ní kɔwaayi ní. Nyàʔá na si yele mii yiri Nowemii? Yawe n séera kpéʔele mii kánmi na. Séew Myɛ Kàfɔlɔ n wɔʔɔgɔ taʔa mii na.»

²² Kánmi bee na Nowemii yìri Mowabi tári ma n lúru n pan, woro ní wi pìíw cɔ́ɔ Wuruti ní, wi lè Mowabi ye wów. Pe maa baa nan Bɛtilehɛmi na orizyew làrilaala sélimɛ na.