Tiiti 3 - Cebaara Bible 2010

Tágafɔbèle tánʔaganma

¹ Maa be sɔ̀ngumi tìrigí gi na mí be pye, ki n yɛlɛ be peyɛɛ gaan fànʔafɔbèle ní séekpɔɔw fɔ̀ɔlɔ ma sáā lúro be ma si peyɛɛ zámaga yaʔa bàā kacǎngèle myɛ kpéʔele,

² ki ga yɛlɛ pe kɔ́ wàa faala mɛ́ʔɛ kálagi í, koro ga jáa bi kàsii kúun wàa ma í, ki n yɛlɛ be pye fûnnyingefɔɔlɔ sáā màama kpéʔele syɛ́ɛnbèle myɛ ma kányɛʔɛ ni.

³ Níì cán wolo maa wɔ́ɔ̀ pye kanaa-sìnjánbéle ní sìnloʔobéle, ní wɔ́ɔ̀ pùuni, wolo maa pye céri ki laànitaʔa púloro ni, ni di kínidɛnɛgi kèlē féleye myɛ kpéʔele, wolo maa kòro kakolobyeri ní nyabɛɛnni na ni kpéʔele, wolo maa ni woyɛɛ kanibɛɛngèle kpéʔele níì woyɛɛ bara.

⁴ Kàjáa lǎli ni wolo Syɔɔfɔw Kolocɔlɔɔ baa wi funjǎngi ní wi tàmagi tɛ̀ɛn syɛ́ɛnbèle na lè,

⁵ a wi wolo syɔɔ, wolo kasinbyeri kéele si na ban wi gee bee kpéʔele í, wi nyínimi báriga ni wi wolo syɔɔ, wi n wolo séli n see kavɔn àmɛɛ wi wolo fúnyi jée n mùnu lè, níì yi sámaga wovɔnyɔ ní Pìicǎnni báriga ni lè.

⁶ Wi n Pìicǎnni tìrige n píli wo na saʔa wolo Syɔɔfɔw Zyezu Kirisi bárigaw ni,

⁷ koro ga pye wolo í sín Kolocɔlɔɔ ma wi kpɔ́ʔɔri báriga ni si pye sìibangwɔɔw kɔriliibéle, sìíwee wi lè wolo sɔ̀ngumi tɛɛtaʔaga.

⁸ Syɛ́ɛnri bee i nyɛ kányɛʔɛ, mii i caa mɔ í da di nyuu da gbàngí bele ma be tága lè Kolocɔlɔɔ na, koro ga pye paa sɔ̀ngí da taagi kacǎngèle kpéʔelele na. Gee bee gi nyɔɔ ní i nyɛ ní tɔ̀nɔ ní syɛ́ɛnbèle ma!

⁹ Ki si n yɛlɛ mɔ í da miyɛɛ kɔ̀rɔsíi nyùngo fun kàkabalayi na, ní narigbaayi sélimɛ kele na n fàra kàsiiw ní kàkabalayi na be kpéʔele lè Mowizi làlwaw kéele na, níì cán tɔ̀nɔ o nyɛ dee bee ni í, ti i nyɛ gbanzan.

¹⁰ Syɔ́ɔnwee wi syɛ́ɛnbèle wálagi peyɛɛ na lè, mɔ ga wi sàmi tɔlɔgɔ nibin n baa nan tɔziin wóʔo na, ki n yɛlɛ mi wi cée,

¹¹ si gi cán bi cán syɔ́ɔnw bee félege n wàli n yiri kôzingi ni, níì kútiiw cáan wiyɛɛ na wi kapeegèle báriga ni.

Láliisanw

¹² Mii ga Aritemasi tórigo yaà mɔ ma lǎlee ni lè, koro ga jáa Tisyiki, mi ŋàʔana mí ba mii fàra Nikopolisi ma, níì cán mii n gi kɔ̀rirɔ n jo mii a wéeri làla kwɔ́ɔ nɛɛ bee.

¹³ Làlwaw kacáɔn wi lè Zenasi, mi nàani mí woro ní Apolɔsi dɛ̀ɛmɛ be tánʔani na, koro ga pye yarigaa a kɔ́ sa fɔ̀n be ma í.

¹⁴ Ki n yɛlɛ wolo wóbèle í wɔ́ɔ kacànbyeri tama cán, sáā peyɛɛ màkow nyɔɔgi, jàngó pe a kɔ́ pye kanyɔɔnɔ fun syɛɛnnɛ í.

¹⁵ Bele myɛ be naa ní mii ní lè, pe n mɔ syáanri. Bele be tàmaga le ní wolo ní lè tágali ni, mi pe myɛ syáanri yaà. Ki n yɛlɛ Kolocɔlɔɔ í kpɔ́ʔɔri kaan yele myɛ ma!