Tiiti 2 - Cebaara Bible 2010

Tamajanni kéele

¹ Mɔ si na, ki n yɛlɛ maa syɛ́ɛnbèle tama kérigèle ni ge yɛlɛ lè ní tamajanni ní.

² Ki joo nànlɛɛbèle ma pe peyɛɛ cǒmi cán páā síngi paa táanri, si pye yákirifɔɔlɔ, pé wɔ́ɔ cólogo tágali, ní tàmagi, ní kpàracogi kàbaan na.

³ Mí wɔ́ɔ gi joo kàcelɛɛbèle ma paa táanri Kolocɔlɔɔ yɛ́ɛgi fyáara na, ki ga yɛlɛ be pye mɛ́ɛkalagibéle í, koro ga jáa be pye sínmi púlobéle í. Ki n yɛlɛ paa cepiibèle tama kacǎngèle ni,

⁴ sáā be kɛɛlɛ, koro ga pye pe tàmaga le ní be nǎnbèle ní si wɔ́ɔ gi le ní be pìíbèle ní,

⁵ si pye yákirifɔɔlɔ, ki ga yɛlɛ be pye kanɔnʔɔbyebèlē í, ki n yɛlɛ paa be kpáayi fáli kpéʔele, si wɔ́ɔ pye funjànya fɔ̀ɔlɔ sáā lúro be tiimaa nǎnbèle ma, koro ga pye Kolocɔlɔɔ syɛ́ɛnri mɛ́ʔɛ a kɔ́ kálagi í.

⁶ Mi wɔ́ɔ maa nìgɔcaribèle kɛɛlɛ be pye yákirifɔɔlɔ.

⁷ Gee gi mɔ tiimaa kwɔ́ɔ lè, ki n yɛlɛ mɔ kapyejǎngèle í pye be ma fɛ̀ɛ kérigèle myɛ ni, mɔ tamani í pye tɛɛlɛ fun si pye ní báriga ní,

⁸ mɔ syɛɛnjóori í nyɔɔ si pye kajoolo fun, koro ga pye fɛ̀ɛrɛ í wolo nigoobèle taa, àmɛɛ gi nyɛ lè pe a gbǎn kapeelaa faala taa bi joo taʔa wolo na í.

⁹ Ki n yɛlɛ mi púlobèle pye paa lúro be kàfɔbèle ma kérigèle myɛ ni páā be kanidaangèle kpéʔele, ki ga yɛlɛ paa be kábala í,

¹⁰ koro ga jáa bàā yúu be ma í, fwɔɔ be peyɛɛ dɛ̀ɛn tágala syɛɛnnɛ kányɛʔɛ ni, koro ga pye pe kapyegèle myɛ í da kpɔʔɔrɔ taari wolo Syɔɔfɔw Kolocɔlɔɔ tamani na.

¹¹ Kolocɔlɔɔ n wi kpɔ́ʔɔri tɛ̀ɛn jàngó syɛ́ɛnbèle myɛ í syɔɔli taa.

¹² Toro di gi tèé wolo na ki n yɛlɛ wolo í Kolocɔlɔɔ yɛ́ʔɛnaa-sìnvyaari ní dulunyanw ki laànitaʔa yaʔa sáā táanri yákirii na, ní sínni, ní Kolocɔlɔɔ yɛ́ɛgi fyáara na lǎli naa ni,

¹³ àmɛɛ wolo wo sɔ̀ngumi tɛɛtaʔajanga sige lè, gi lè Zyezu Kirisi lúrubanni àmɛɛ wi a ba wiyɛɛ dɛ̀ɛn lè wi nìjangbɔɔri ni, woro wee wi lè Kolocɔlɔɔ Wogbɔɔw ní wolo Syɔɔfɔw.

¹⁴ Woro tiimaa wi wiyɛɛ gaan wolo kéeli na, koro ga pye bi wolo syɔɔ kakolobyeri myɛ ma, si wolo jée mùnu jàngó wolo í pye woro tiimaa syɛ̀ɛnnɛ, kapyejǎngèle láa si wɔ́ɔ pye wolo na wolo í kòro bàā ge kpéʔele.

¹⁵ Da kérigèle bee nyuu kánmi bee na syɛ́ɛnbèle ma, máā be kɛɛlɛ, mí wɔ́ɔ maa be kapeegèle tèé be na bi yɛlɛ ní fǎngi myɛ ní mɔ taa lè. Mɔ a kɔ́ syɔɔnwaa faala yaʔa wi mɔ faʔa í.