Tiiti 1 - Cebaara Bible 2010

Fòów kéele

¹ Mii Pɔli, wi lè Kolocɔlɔɔ púlo ní Zyezu Kirisi pìituɔn, wi n mii tun koro ga pye mii í da Kolocɔlɔɔ wonyɛnɛ-wòlobèle dɛ̀ɛmɛ́ paa syée yɛʔɛ̀ ma tágali ni, sáā kányɛɛgi tèé be na gee gi yɛlɛ lè ní Kolocɔlɔɔ yɛ́ɛgi fyáara ní,

² jàngó sìibangwɔɔw sɔ̀ngurɔ tɛɛtaʔaga í pye be ma, Kolocɔlɔɔ wi lè wi o finɛ nyáana í, wi maa sìíw bee nyɔ́ɔ fàli sáni làrigèle í séli lè.

³ Lǎlee wi da nyɛ́nɛ n wòlo lè, a li ga baa nan, a wi sìíw bee kéele tɛ̀ɛn wi syɛ́ɛnri báriga ni, dee wolo Syɔɔfɔw Kolocɔlɔɔ kàlifáa mii ma lè níì jo mii í da di nyuu.

⁴ Mii a sɛ́bɛw naa tórigo mɔ ma, Tiiti, mɔ wi lè mii pìiseew tágali ni li nyɛ wo myɛ siinw ma lè, ki n yɛlɛ Tofɔw Kolocɔlɔɔ ní wolo Syɔɔfɔw Kirisi Zyezu í kpɔ́ʔɔri ní fûnnyingi kaan mɔ ma!

Fáliw wi kaan Tiiti ma wi kpéʔele lè Kirɛti ni

⁵ Kéelee na mii mɔ yaʔa lè Kirɛti ni, loro li nyɛ kasangèle ke da kòro lè sìnjɔɔnri ni, mɔ í da gele bee cɔɔnri, si wɔ́ɔ Egilizibèle wólɛɛbéle télege télege kěyi myɛ ni, àmɛɛ mii da gi joo n gbàn mɔ ma lè níì jo,

⁶ wee mɔ ga nyaa lè kajoolo fun syɔ́ɔn wi si i nyɛ cɔlɔɔ nibin fɔ́lɔ, wi pìíbèle si i nyɛ tágafɔɔlɔ, syɛ́ɛnbèle si o be kéeli nyuu ni máari níì jo pe i nyɛ kanɔnʔɔbyebèlē, wàlá pìijamabéle í.

⁷ Níì cán àmɛɛ yɛɛ̀kiniw nyɛ lè Kolocɔlɔɔ fáliw kacɔɔnriɔ, fwɔɔ wi pye kajoolo fun, ki ga yɛlɛ wi pye nyùnwaʔafɔlɔ í, wàlá wi fúngi í tanʔama dɛ́nɛ í, wàlá wi wiyɛɛ gaan sínmi ma í, wàlá wi pye kàsiikuuɔn í, wàlá wi pye tɔ̀nɔpeew caafɔlɔ í.

⁸ Fwɔɔ wi pye nibɔnbèle tìrigefɔlɔ, wáā syɛ́ɛnbèle nyɔɔmɔ caa, si pye yákirifɔlɔ, ní syɛɛnsiɔn, ní funjàngafɔlɔ, si wiyɛɛ cǒmi cán,

⁹ wí wɔ́ɔ syɛɛnjóofiiri sámaga cò di yɛlɛ lè ní tamani ní, koro ga pye wi gbǎn ra syɛ́ɛnbèle kɛɛlɛ ní tamajanni bee ní, sáā kàkabalayi fɔ̀ɔlɔ nyɔ́ɔyɔ tɔ́ngi.

¹⁰ Níì cán syɛɛnjamabèle n nɛʔɛ, poro bele be nyùngo fun syɛ́ɛnri nyuu lè ní i syɛ́ɛnbèle fáana ni pùuní, bele be koro kpéʔele lè, pe saamaw i nyɛ kɛ́nɛw fɔ̀ɔlɔ.

¹¹ Fwɔɔ wo be nyɔ́ɔyi tɔ́n, níì cán pe i narigbaapoyaa nyáʔami àmɛɛ be yi syɛ́ɛnbèle tama lè kérigèle kèle na gele ge lè ke ga yɛlɛ í, pe i gee bee kpéʔele tɔ̀nɔw kánma na wee wi pee lè.

¹² Alí poro Kirɛti ye tiimaa kanyaajoowaa maa gi joo níì jo: «Kirɛti ye i nyɛ jànvaafɔɔlɔ làla o làla, ní i nyɛ yacobeeye ní sàlagafɔ-laaweekaaya-fɔɔlɔ.»

¹³ Séeraw bee i nyɛ kányɛʔɛ. Koro na gi yɛlɛ mɔ í fúlo be na gbanʔama, koro ga pye be cólogo tágali kàbaan na,

¹⁴ jàngó pe a kɔ́ fɔ̀lɔ Zyefubèle tánlɛɛyɛ ní kányɛɛgi céefɔɔlɔ kajoogéle na í.

¹⁵ Bele be nyɔɔ lè yáriri myɛ n nyɔɔ bele bee ma, kàjáa bele be nɔ́nʔɔ lè pe lè sìndagabèle, yafyɛn ga nyɔɔ bele bee ma í. Pe n be sɔ̀nguri ní be fúnyi nɔ́nʔɔ.

¹⁶ Pe i gi nyuu níì jo pe n Kolocɔlɔɔ cán, bi gi taa pe kapyegèle i gi tèé pe n wi cée. Pe n tɔ̀nɔ n pee ní i nyɛ sìnloʔobéle, pe fanʔa o gi na bi gbǎn kacànnaa faala kpéʔele í.