Syɛɛnjóow 9 - Cebaara Bible 2010

¹ Mii n kérigèle bee myɛ yaʔa niyɛɛ fúngi ni, wéle, gee myɛ mii sɛʔɛ lè, koro gi nyɛ syɛɛnsinbèle, ní sícilibèle, ní be fáliw i nyɛ Kolocɔlɔɔ kɔ́yi ni, tàmagi yoo, paragi yoo, syɔɔn ye ga yafyɛn cán yi kánmi ni í. Yi siinw i nyɛ pe yɛʔɛ ma.

² Ki myɛ i nangi pe myɛ na kanijanma na: Kanijanna li syɛɛnsinw ní syɛɛnpeew taagi, wee wi nyɔɔ lè ní i nyɛ fɔɔnrɔ fun, ní wee wi nɔ́nʔɔ lè yoo, wee wi sáriga wóo lè, ní wee wi lè wi o sáriga wóo í yoo. Syɛɛncanw ní kapeebyew i nyɛ kanijanma na. Wee wi kɛ̀ɛ́ lè, ní wee wi fɛ̀ɛgí kàligi na lè, pe i nyɛ kanijanma na.

³ Kapeegaa wéle gee yee myɛ nínge ni yi kpéʔele tári na lè, koro gi nyɛ ncan kanijanna i pe myɛ taagi. A gi wɔ́ɔ i nyɛ ncan syɔɔn ye fúnyi n nyìn kapeeyi na, á nidolimi si i nyɛ be fúnyi ni pe wéemi làla ni. Koro kàdoʔo ma pe n kári kúbèle tɛ́ʔɛ ma.

⁴ Níì cán wee wi pwɔɔ niweebèle myɛ na lè, sɔ̀ngumɔ tɛɛtaʔaga i nyɛ wi ma. Alí pɔnweeo n caà pɔ́rɔ n sɔ̀lɔ càaraguugo na.

⁵ Niweebèle n gi cán ncan poro a ba kùu, kàjáa kúbèle ga níì yafyɛn cán í. Poro má, sàra ní o yaà í, níì cán pe n fɛ̀ʔɛ be kéeli na.

⁶ Pe tàmagi, ní be paragi, ní be nyabɛɛnni n kálagi n kwɔ́ɔ. Lɛɛlɛ faala si a ní pye be ma nyáana, gee myɛ ni gi kpéʔele tári na lè í.

⁷ Da syée mi sa ra mɔ yaliiri líi ní fundaanra ní, mí wɔ́ɔ maa mɔ duvɛɛnw gbo ní funjànga ní, níì cán Kolocɔlɔɔ n fɔ̀lɔ mɔ kapyegèle na n kwɔ́ɔ.

⁸ Mɔ búroyi n yɛlɛ yi pye woviiye ní làla o làla, sìnmɛ si a kɔ́ fɔ̀n mɔ nyúngi na í.

⁹ Mɔ céw kéele li mɔ dɛ́nɛ lè, pye fundaanra na ní woro ní, mɔ gbanzan sìíw canya myɛ ni, yoro yee Kolocɔlɔɔ kaan mɔ ma lè tári na. Níì cán koro gi nyɛ mɔ lɛɛli sìíw ni, ní faligbanw ni mɔ kpéʔele lè tári na.

¹⁰ Yariga o yariga mɔ kɔ́gi ga taa bàā kpéʔele lè, da gi kpéʔele ní mɔ fangi myɛ ní. Níì cán kapyele, ní katimanana, ní cánna, ní sícilimɛ o yaà kúbèle tɛɛkòrogo ni beè mɔ syée lè í.

Sícilimi kéele o córo làla o làla í

¹¹ Mii n wɔ́ɔ níì gi nyaa tári na bele be fé lè gbanʔama, kàfyaali fàndaara o nyɛ bele bee wóro í, kapɛɛnni fàndaara o wɔ́ɔ̄ nyɛ nànniribèle wóro í, sícilibèle ban pe be yaliiri taagi kelekele í, cánnɛʔɛni fɔ̀ɔlɔ ban be lɔ́ri taagi í, kacànna taala o nyɛ kacánbèle wólo í, níì cán làrijǎngèle ní làribeegèle i nangi pe myɛ na.

¹² Syɔɔn ga wi lǎli cán í, àmɛɛ fàala nyɛ, bele be cò be kùúw cɔ̀ɔ ni lè, ní àmɛɛ féjɛngèlē nyɛ, gele ge cò parà na lè. Kánmi bee na syɔɔn ye nyɛ, lǎli ni kapeegi ga foo n nan be na n be cò lè.

¹³ Mii n wɔ́ɔ̀ sícilimi naa kéele nyaa tári na, lee li pye mii ma lè kakpɔɔlɔ.

¹⁴ Kèpilaa n pye yaà, lee syɛ̀ɛnnɛ be lè pe da nɛʔɛ í. A fànʔafɔ-gbɔ́ɔwaa kári sa kapɛɛnnɛ kpúmɔn ní li ní, ní sáà tɛ́ɛn li taana kapɛɛnni kánma na n li màʔa, níì tɛɛ̀lúguyo faan li kánmi na.

¹⁵ Kàjáa nànwaa maa pye yaà kěgi ni fɔ̀ngɔfɔlɔ níì cìlige, a woro gi syɔɔ ní wi sícilimi ní. Syɔɔn faala si ga níì sɔ̀ngi n taa fɔ̀ngɔfɔnǎnw bee na í.

¹⁶ A mii si jo: Sícilimi n pɔ́rɔ n sɔ̀lɔ fǎngi na. Kàjáa pe i fɔ̀ngɔfɔw sícilimɛ faari, syɔɔn o wi syɛ́ɛnri córo í.

¹⁷ Sícilibèle syɛɛnnyínre lóʔolo n pɔ́rɔ n sɔ̀lɔ nilabalabèle kùndigi yákpowáara na.

¹⁸ Sícilimi n pɔ́rɔ n sɔ̀lɔ kapɛɛnkpumɔn-yáriri na. Kàjáa kapeebyeo nibin i kacàngēle saʔa kálagi.