Syɛɛnjóow 8 - Cebaara Bible 2010

¹ Wìí wi nyɛ àmɛɛ síciliw nyɛ lè? Wìí wi kérigèle kɔ́rɔ tɛ̀ɛnnɛ cán? Syɔɔn sícilimi i nìjanra taari wi yɛ́ɛgi na, wi yɛ́ɛgi tanʔana n si fàli.

Bàā lúro fànʔafɔw ma koro i nyɛ sícilimɛ

² Mii n jo: Fànʔafɔw kajoolo cò kàligi kéele na gi kpéʔele Kolocɔlɔɔ ma lè.

³ Mɔ a kɔ́ fungo wáriga bi núngo wi yɛʔɛ̀ ma bi léeli í, mɔ a kɔ́ miyɛɛ lége kapeʔe ni í, níì cán wi i ki myɛ kpéʔele gee gi wi dɛ́nɛ lè.

⁴ Amɛɛ fànʔafɔw syɛ́ɛnrɛ nyɛ ní fàngbɔʔɔ ní lè, wìí wi a wi pye: Nyàʔá mɔ kpéʔele?

⁵ Wee wi tundunri có lè, wi a tée kapeʔe faala cán í, síciliw fúngo si n kútiiw kánma ní wi làriguunni cán.

⁶ Níì cán kérigèle myɛ i nyɛ ní ge làla, ní ge kútii, àlí wɔʔɔgi ga wírè kpɔ́ʔɔ syɔɔn na.

⁷ Níì cán wi ga gi cán gee gi maa ba kpéʔele lè í, wìí syɔ́ɔn si wi a gbǎn gi joo wi ma kánmee na ki a ba kpéʔele lè?

⁸ Syɔɔn faala o nyɛ wi ŋɔ́ngari kàfɔlɔ bi gbǎn di cò yérige í, wàlá kùúw canʔa kàfɔlɔ í. Yaʔala o nyɛ kapɛɛnni ni í, péemi si wɔ́ɔ o bi kpéʔelefɔlɔ syoo í.

Sɔ̀nguraa, syɔɔn ye kéeli na

⁹ Mii n gee bee myɛ nyaa níì kapyegèle myɛ cò mii fúngi ni, gele ge nyɛ ni kpéʔele tári na lè. Làla i yaà syɔɔnwaa i tɛ̀ɛ́n wàa nyúngo na bi wɔʔɔlɔ cáan wi na.

¹⁰ Lǎli bee ni a mii syɛɛnpeebèle nyaa a be nyanya taa n kári. Pe maa ni yìrigí tɛɛcǎngi ma ni maa níì fɛ̀ʔɛ gee na pe da ni kpéʔele kěgi ni lè. Koro wɔ́ɔ i nyɛ gbanzan.

¹¹ Kútiiw wi yɛlɛ wi kúun peemɛ kapyele na lè, wi o forogi terire í, koro gi syɔɔn ye fúnyi kaan a yi nyìn kapeeyi kpéʔelele sɔngurɔ na.

¹² Alí kapeebyeo si ga caà kapeeyi kpéʔele tɔlɔyɔ dabata níì sìinɛʔɛɔ taa gee bee ni, mii na, mii n sèʔê gi cán fundaanri i nyɛ bele wóro bele be fɛ̀ɛgí Kolocɔlɔɔ na lè àmɛɛ wi yɛ́ɛgi fyáara nyɛ be ma lè.

¹³ Kàjáa fundaanri o nyɛ syɛɛnpeew wóro í, wi a sìinɛʔɛɔ taa í, wi i sɔ̀lɔ́ àmɛɛ kànyinnɛ nyɛ lè, níì cán fyáara o wi ni Kolocɔlɔɔ yɛ́ʔɛ ma í.

¹⁴ Gbanzan yárigaa i kpéʔele tári na, koro gi nyɛ syɛɛnsinbèle pèle i yaà gee gi be taagi lè, ki i yɛlɛgi ní syɛɛnpeebèle kapyele ní, syɛɛnpeebèle pèle si i yaà gee gi be taagi lè, ki i yɛlɛgi ní syɛɛnsinbèle kapyele ní. Mii n jo koro wɔ́ɔ ní i nyɛ gbanzan.

¹⁵ Koro na mii fundaanri sòoló, níì cán fundaanraa ga sɔ̀lɔ syɔɔn ma tári na kérigèle naa na í, koro gi nyɛ bàā líi sáā gbo, sáā fundaanra kpéʔele. Koro gi yɛlɛ bi kòro wi ma wi fáliw ni, sìíw canya ni, yee Kolocɔlɔɔ kaan wi ma lè tári na.

¹⁶ Mii ga sɔ̀ngi mii fúngi ni lǎli ni lè bi sícilimi kéele cán, si wɔ́ɔ faligbanyi myɛ wéle, yee yi kpéʔele tári na lè, àmɛɛ gi nyɛ lè syɔɔn nyapiigèle o ŋúnɔmɔ taagi í, canʔa ni yoo, yébilige ni yoo,

¹⁷ a mii Kolocɔlɔɔ kapyeli myɛ nyaa. Syɔɔn a gbǎn kapyegèle myɛ cán, gele ge kpéʔele tári na lè í. Gee syɔɔn caa ni fɔ̀rɔgí lè, wi a gbǎn gi taa í. Alí síciliw ga ni sɔ̀ngí woro n gi cán, wi a gbǎn gi taa í.