Syɛɛnjóow 7 - Cebaara Bible 2010

¹ Mɛ́ɛtanʔa n pɔ́rɔ n sɔ̀lɔ lɔgbanri nùndaanna sìnmɛ na, á syɔɔn cânguugi pɔ́rɔ n sɔ̀lɔ wi canzeegi na.

² Bi kári kùugo kpaʔa ma, koro n pɔ́rɔ n sɔ̀lɔ lìigbɔɔlɔ kpaʔa gàrí na, níì cán koro gi nyɛ syɔɔn ye myɛ kwɔ́ɔganmi, wee wi nyɛ lè sìi na, wi i yákirii taagi gi ni.

³ Fúngi wɔʔɔlɔ n pɔ́rɔ n sɔ̀lɔ kataanri na. Níì cán syɔɔn yɛ́ɛgi ga wírè tanʔa, wi fúngi a gbǎn pye fundaanra na.

⁴ Sícilibèle fúnyo i nyɛ kùugo kpaʔa ni, nilabalabèle fúnyo si i nyɛ fundaanri kpaʔa ni.

⁵ Bi sícilio fúlolo lóʔo, koro n pɔ́rɔ n sɔ̀lɔ bi pye syɔɔnwaa, wee wi nilabalabèle ŋúnugo lúro lè.

⁶ Kánmee na wúuro có ni fologi kòdɔɔlɔ láara ni lè, kánmi bee na nilabalabèle kataanra nyɛ. Gee bee wɔ́ɔ i nyɛ gbanzan.

⁷ Fǎngi gbànna i cúromɔ wáa sícilio na, námara kpɔ́ʔɔri si i syɔɔn sɔnguri kálagi.

⁸ Keele kwɔ́ɔmɔ n pɔ́rɔ n sɔ̀lɔ li sélimi na. Kpàracogi fúngo n pɔ́rɔ n sɔ̀lɔ kpɔ́ɔmi fúngo na.

⁹ Mɔ a kɔ́ wári da mɔ fúngi taanri í, níì cán fundanʔari i kòró nidoliyi fúnyo ni.

¹⁰ Mɔ a kɔ́ gi joo í, si jo: Nyàʔá ki gi kaan á canzɔ̀lɔgwɔɔyi pɔ́rɔ n sɔ̀lɔ níjanʔa wóyi na? Níì cán sícilimi má ban mɔ yíbegi a yìri í.

¹¹ Sícilimi tɔ̀nɔ ní kɔ́rigi wóo i nyɛ sèjira, ní caà pɔ́rɔ n sɔ̀lɔ bele má be cángi nyaagi lè.

¹² Níì cán sícilimi nyínmɛ láara tɛ́ɛnnɛ i nyɛ móō wáliw nyínmɛ láara tɛ́ɛnnɛ lii. Cánni kanyɔɔnɔ li nyɛ ncan sícilimi i bi taafɔbèle sìi kpáa wéle.

¹³ Kolocɔlɔɔ kapyeli wéle: Gee wi kùru lè, wìí wi a gbǎn gi sánʔa gi sín?

¹⁴ Fundaanri canʔa na, da fundaanra kpéʔele, wɔʔɔgi canʔa na, mi sɔ̀ngi, Kolocɔlɔɔ n yi siinw kpéʔele wonijanya, a koro pye syɔɔn a gbǎn gi cán, gee gi maa ba pye woro kàdoʔo ma lè í.

¹⁵ Mii n gee naa myɛ nyaa mii gbanzan sìíw canya ni: Syɛɛnsiɔn i kúu àlí n gi yaʔa wi n sín, syɛɛnpeeo si i sìinɛʔɛgɛ taagi, àlí n gi yaʔa wi n pee.

¹⁶ Mɔ a kɔ́ sín bi sɔ̀lɔ ki dǎnw na í, mɔ a kɔ́ miyɛɛ dɛ̀ɛn sícilio bi sɔ̀lɔ í, nyàʔá na mɔ yɛlɛ bi kɔ́ miyɛɛ gálagi nya?

¹⁷ Mɔ a kɔ́ pee bi sɔ̀lɔ ki dǎnw na í, mɔ a kɔ́ pye nilabalaɔ í, nyàʔá na mɔ yɛlɛ bi kɔ́ kùu mɔ cânguugi ní sìnnan?

¹⁸ Ki n nyɔɔ mɔ í lálii kérigèle bee siin pínɛ cò, mɔ a kɔ́ ge yaʔa ge syɔɔ mɔ na í. Níì cán wee wi fɛ̀ɛgí Kolocɔlɔɔ na lè, wi i tɛɛyirile taagi kérigèle bee myɛ ni.

¹⁹ Sícilimi i sícilio nìrí n sɔ̀lɔ kùndigibéle kɛɛ na be nyɛ lè kàʔa nibin ni.

²⁰ Syɔɔn faala o beè woziɔn ní tári na, wee wi kacǎngèle kpéʔele lè, wi si o kapeele kpéʔele í.

²¹ Mɔ a wɔ́ɔ kɔ́ mɔ líiyi cáan bàā kajoori myɛ lúro í jàngó mɔ a kɔ́ mɔ dángala syɛ́ɛnrɛ lóʔo mɔ falipyeo nyɔ́ɔ na í.

²² Níì cán mɔ n gi sámaga n cán mɔ fúngi ni ncan mɔ tiimaa n pèle dánga tɔlɔyɔ saʔa.

²³ Mii n gee bee myɛ sɛʔɛ n wéle sícilimi báriga ni. Mii n jo: «Sícilimi a pye mii ma.» Kàjáa a bi tɛ́ɛgi si léeli mii na.

²⁴ Gee gi nyɛ lè beè, ki n léeli, níì cùru, n cùru, wìí wi a gbǎn nan gi na?

²⁵ A mii mii fúngi myɛ yaʔa sɛʔɛweleli, ní kérigèle caala na, ni caa bi gi cán gee gi nyɛ lè sícilimi, ní gee gi nyɛ lè kérigèle nyúngo bi gi cán péemi i nyɛ labalama, nidolimi si i nyɛ cúromɔ.

²⁶ Céwee wi lè karinyanga, woro wee fúngo gi lè cɔ̀ɔ, woro wee kɔ́yɔ yi nyɛ lè yapwɔɔrɔ, mii n wi kéeli nyaa a li soro n sɔ̀lɔ kùúw na. Syɔ́ɔnwee kéele li Kolocɔlɔɔ dɛ́nɛ lè, wi i syoo céw bee félege ma, wi si i kapeebyew có.

²⁷ Syɛɛnjóow n jo: Wéle, gee mii nyaa lè, amɛɛ mii kérigèle sɛʔɛ lè nibin nibin jàngó bi ge nyúngi cán.

²⁸ Wéle, mii n caa gbanʔama, mii si ga yafyɛn taa í. Mii n nànwaa nibin nyaa nànbēle saala kagunɔ nínge ni [wee wi sín lè]. Kàjáa cɔlɔɔ nibin cébèle myɛ nínge ni, mii ga kɔ́ɔ̀ pe wàa nyaa í.

²⁹ Gee si mii baa nyaa lè koro gi nyɛ: ncan Kolocɔlɔɔ n syɔɔn ye sámaga syɛɛnsinbéle, á pe baa kanmaa saʔa caa n gi gbàn peyɛɛ ma.