Syɛɛnjóow 6 - Cebaara Bible 2010

¹ Kapeegaa i yaà, gee mii nyaa tári na lè, gee gi líbe syɔɔn ye na lè.

² Syɔɔnwaa i yaà, wee má Kolocɔlɔɔ lɔ́ri ní taali kánma ní kpɔ́ɔmi kaan lè, gee myɛ láa gi nyɛ wi na lè, wi ga fɔ̀n gi kàa ni í, kàjáa Kolocɔlɔɔ ga di lìíli fànʔa kaan wi ma í, nibɔnwaa n si baa di tɔ̀nɔ́w lìi. Koro i nyɛ gbanzan, bɔ̀nɔkpɔɔɔ wii.

³ Nàɔn ga pìibēle dabata see, níì yɛɛnɛʔɛgéle taa, wi sìíw canya nɛʔɛnɛ ní gi myɛ ní, wi sìíw ga pye wi ga tín fundaanri na í, wi si ga wɔ́ɔ̀ nyanga taa í, mii n jo pìiŋɔrizeeo fundaanra n sɔ̀lɔ wi wóri na.

⁴ Níì cán wee bee n pan gbanzan ní wɔ́ɔ̀ lúru n kári yébilimi ni, yébilimi n wi mɛ́ɛgi tɔ́n.

⁵ Wi ga cángi nyaa í, wi ga kàa cán í. Ŋɔ́ndaala i nyɛ woro ma n sɔ̀lɔ wee na.

⁶ Alí wee bee ga taa yɛ̀ʔɛlɛ saala kagunɔbèlē tɛ́ɛyɛ siin, wi si ga kataanna faala laala n wéle í, pe myɛ siinw o syée tɛɛnijanga ma ì?

⁷ Syɔɔn faligbanw myɛ i nyɛ wi nyɔ́ɔgi kéele na, wi yákpodirigi si sèʔé o nyìngí í.

⁸ Nyàʔá gi kòro síciliw ma n sɔ̀lɔ nilabalaw na? Tɔ̀nɔwìí wi nyɛ foomɔfɔlɔ ma, wee wi wi tánʔaganmi cán lè niweebèle yɛ́ʔɛ ma?

⁹ Nyapiigèle wonyaʔa n pɔ́rɔ n sɔ̀lɔ syɔɔn ma wi fúngi curugo-mí-màʔana na ki nyɛnɛ yáriri kurugo, koro wɔ́ɔ i nyɛ gbanzan, ní bi taʔa káfalaga na da nɛnɛ.

Sícilimi lálii

¹⁰ Gee gi nyɛ lè beè, ki maa téè yeri yaà ki mɛ́ɛgi na. Wo si n syɔɔn cán, wi a gbǎn cáan ní wàa ní, wee fànʔa gi nɛʔɛ n sɔ̀lɔ woro wógi na lè í.

¹¹ Syɛɛnnɛʔɛri ga pye yaà, gbanzan kérigèle n wɔ́ɔ̀ nɛʔɛ yaà, nyàʔá syɔɔn a taa gee bee ni?

¹² Koro na wìí wi gi cán gee gi nyɔɔ syɔɔn ma wi sìíw ni lè, wi gbanzan sìíw canya nyɔ́ɔ ni, yoro yee yi sɔ̀lɔ́ àmɛɛ kànyinnɛ nyɛ lè? Wìí wi a gi tɛ̀ɛn syɔɔn na, gee ki a ba pye naa wi kàdoʔo ma lè tári na?