Syɛɛnjóow 5 - Cebaara Bible 2010

¹ Mɔ a wári kɔ́ mɔ nyɔ́ɔgi múgu í, mɔ a kɔ́ mɔ fúngi wáriga bi syɛɛnrɛ joo Kolocɔlɔɔ yɛ́ʔɛ ma í. Níì cán Kolocɔlɔɔ i nyɛ nyɛ̀ʔɛni na, mɔ si i nyɛ tári na, koro na ki n yɛlɛ mɔ syɛ́ɛnri i pye cɛɛri.

² Níì cán sɔ̀ngunɛʔɛrɛ di maa ní ŋúnɔgɔ ní, syɛɛnnɛʔɛrɛ si i yirigi nilabalaga yákpolo ni.

³ Mɔ ga nyɔɔfaliga kpéʔele Kolocɔlɔɔ ma, mɔ a kɔ́ mɔn ní gi foroli ní í, níì cán nilabalabèle a kacànna taa wi ma í, nyɔɔfalagi mɔ kpéʔele lè, ki n yɛlɛ mi gi foro.

⁴ Nyɔɔfaligi sìngbeʔelemɛ n pɔ́rɔ n sɔ̀lɔ sáni mɔ í gi kpéʔele lè mɔ si a kɔ́ gi foro í.

⁵ Mɔ a kɔ́ gi yaʔa mɔ nyɔ́ɔgi í mɔ céri lége kapeele ni í, mɔ a kɔ́ gi joo Kolocɔlɔɔ tundunw nyɛ́nɛ na si jo: «Pùununɔ lii» í. Nyàʔá na gi yɛlɛ Kolocɔlɔɔ fúngi í kɔ́ tanʔa mɔ syɛ́ɛnri kéele na, wí mɔ kɔ́yi fáli kálagi?

⁶ Gbanzan kèlē ga pye ŋúnɔnɛʔɛri ni, ke wɔ́ɔ i nyɛ syɛɛnnɛʔɛri ni. Koro na da fɛ̀ɛgí Kolocɔlɔɔ na.

Fǎngi gbànna kéele

⁷ Mɔ ga gi nyaa tátɛɛgaa ni, a be i fǎngi gbàngí foomɔfɔbèle na, a be wɔ́ɔ i kányɛɛgi ní sínni kálagi, gee bee a kɔ́ pye mɔ na funwɔɔrɔ í. Níì cán wogbɔɔwaa wi wàa kàragí, á wàa nikwɔɔ si sèʔê kpɔ́ʔɔ n sɔ̀lɔ bele bee siin na.

⁸ Gee ki a pɔ́rɔ tári ma lè koro gi nyɛ di fànʔafɔwaa taa wee wi a séyi fáli kéele kpɔ́ʔɔ lè.

Lɔ́ri a yafyɛn nyɔɔ í

⁹ Wee wáliw dɛ́nɛ lè, wi o tíngi wáliw na í. Wee yanɛʔɛri dɛ́nɛ lè, tɔ̀nɔ o wi ma gi ni í. Koro wɔ́ɔ i nyɛ gbanzan.

¹⁰ Kɔlɔ̀ yáriri ga ni nɛʔɛgi ti lìifɔbèle n wɔ́ɔ ni nɛʔɛgi. Nyàʔá gi nyɛ di taafɔw tɔ̀nɔ, kapye bàā di nyaagi yagana ní wi nyapiigèle ní ban í?

¹¹ Falipyew ŋúnɔmɔ n tɛ́nɛ, a wi náà cɛɛri lìi yoo, a wi saʔa lìi yoo. Kàjáa lɔrɔfɔw lìidinnɛ o wi yaari wi i ŋúnɔ í.

¹² Mii n bɔ̀nɔkpɔɔɔ nyaa tári na, woro wi nyɛ: Lɔ́ree di kàfɔw kpóʔoro lè, á ti baa wɔʔɔlɔ cáan wi na.

¹³ Lɔ́ri bee i kálagi kapyelaa báriga ni, lee li pee lè. Nànbili wi see lè, yarigaa ga níì kòro li kɔlɔ̀ ni í.

¹⁴ Kánmee na wi yiri wi nɔ́ɔw láʔa ni lè, ànbée wi a lúru kári nya wowaaɔ ní, wi a gbǎn wi fáliw tɔ̀nɔwaa cò wi kɔ́gi ni bàā syée í.

¹⁵ Koro wɔ́ɔ i nyɛ bɔ̀nɔkpɔɔɔ àmɛɛ syɔɔn a tɔ̀nɔ́ lúru kánmee na wi da pan lè. Nyàʔá gi nyɛ wi tɔ̀nɔw fáliw ni wi kpéʔele n wáa káfalagi kurugo lè?

¹⁶ Wi cányi myɛ ni, wi i líi yébilimi ni, ní fúngi wɔʔɔgɔ, ní fɔ̀rɔgi, ní fundanʔagbɔɔri ni.

¹⁷ Wéle, gee mii nyaa lè, koro gi nyɛ: Ki n tɔ̀nɔ n sámaga n nyɔɔ syɔɔn ma, waa líi sáā gbo sáā fundaanra kpéʔele fáliw myɛ nínge ni wi kpéʔele lè tári na, wi sìíw canya myɛ nyɔ́ɔ ni, yee Kolocɔlɔɔ kaan wi ma lè. Níì cán koro gi nyɛ wi lɛɛli.

¹⁸ A gi wɔ́ɔ i nyɛ syɔ́ɔnwee ma Kolocɔlɔɔ lɔ́ri ní kɔlɔ̀ yáriri saʔa kaan lè, ní wɔ́ɔ̀ di lìíli fànʔa kaan wi ma a wi i wi lɛɛli taagi di ni, ní wɔ́ɔ i fundaanra kpéʔele wi fáliw nínge ni, koro i nyɛ Kolocɔlɔɔ yakanʔa.

¹⁹ Wi a caa ra sɔ̀ngí da taagi wi sìíw canya kéele na í, ncan Kolocɔlɔɔ i wi fúngi nyìngí fundaanri na.