Syɛɛnjóow 4 - Cebaara Bible 2010

Sìnzinmi ní kanyaʔamiri, dulunyanw fáli ni

¹ A mii wɔ́ɔ̀ fǎngi gbànna kèlē myɛ nyaa, gele ge kpéʔele lè tári na, wéle, bele na be fǎngi gbàn lè poro i nyaan, kpɛʔɛlɛfɔlɔ si o be na í! Fǎngi i nyɛ be wɔʔɔfɔbèle ma, kpɛʔɛlɛfɔlɔ si o be na í!

² Koro na mii gi joo woguubèle kéele na, àmɛɛ be kùu n kwɔ́ɔ lè, níì jo pe i nyɛ fundaanra fɔ̀ɔlɔ n sɔ̀lɔ woweebèle na, poro bele be sèʔé nyɛ lè sìnguu ni.

³ Wee si wi sèʔê pɔ́rɔ n sɔ̀lɔ bele bee na lè, woro wi nyɛ, wee wi lè wi ga kɔ́ɔ̀ pye beè í, wi ga kɔ́ɔ̀ kapeeyi nyaa, yee yi kpéʔele tári na lè í.

⁴ Mii n gi nyaa ncan faligbanw myɛ, ní falinyɔɔgwɔɔw myɛ i nyɛ syɔɔn nyabɛɛnni wi syɛɛnnyɛnw kánma na. Koro wɔ́ɔ i nyɛ gbanzan, ní bi taʔa Káfalaga na da nɛnɛ.

⁵ Nilabalaɔ i wi kɔ́yi míri ní i wi tiimaa céri káa.

⁶ Kɔbonyɛnnɛ nibin ŋɔ́ndaala n pɔ́rɔ n sɔ̀lɔ kɔbonyɛ̀nnɛ siin faligbaɔn na wi nyɛ lè bi taʔa káfalaga na da nɛnɛ.

⁷ A mii níì gbanzan kánmaa nyaa tári na:

⁸ Wéle, syɔɔnwaa i nyɛ wi nibin, wàa o wi siin wóo í, nànbile wàlá senyɛnnɛ o nyɛ wi ma í, láʔala si o nyɛ wi fáliw na í, àlí wi nyapiigèle o tíngi lɔ́ri na nyáana í. Wi si o wiyɛɛ yíbe í bi jo: Wìí ma mii báara, níì mii pǐli kún fundaanri na? Koro wɔ́ɔ i nyɛ gbanzan, ní kapeʔe.

⁹ Syɛ̀ɛnnɛ siin n pɔ́rɔ n sɔ̀lɔ nibin na, níì cán sàracàɔn i nyɛ be ma be fáliw ni.

¹⁰ Níì cán wàa ga too, wee a wi yìrige. Kàjáa wɔʔɔgɔ i nyɛ wee na wi nyɛ lè wi nibin si too, wàa si a pye wi siin wóo bi wi yìrige í!

¹¹ Ki wɔ́ɔ i nyɛ syɛ̀ɛnnɛ siin ga pínɛ n sínɛ pe n káfugo le peyɛɛ ni. Wee si wi nyɛ lè wi nibin, mɛ̀ɛ́ wi a gbǎn káfugo le wiyɛɛ ni bi sɛ́ɛ?

¹² Wàa ga too syɔɔn nibin na n wi jáa, pe ga maa pye siin, wi a dée fànʔa taa be na í. Pe ga mɛɛngéle taanri mígi keyɛɛ na, ke o cɛnɛ kelekele í.

¹³ Pìíwee wi fɔ̀n lè, níì cìlige, wi n pɔ́rɔ n sɔ̀lɔ fànʔafɔ-nànlɛɛɔ na, wee wi labala lè, wee wi lè wi ní o yarila lúro í.

¹⁴ Níì cán pìíw bee a gbǎn yiri kàsow ni bi tɛ́ɛn fǎngi na, àlí wi ga maa see foomɔfɔlɔ wi fǎngi ni.

¹⁵ Mii n niweebèle myɛ nyaa, poro bele be táanri lè cángi láara ni, a be i nyɛ ní pìíw ní, woro wee wi baa tɛ́ɛn fǎngi na wee sìndɛʔɛ ni lè.

¹⁶ Syɛ́ɛnmi bee myɛ nyúngo na wi da pye lè, pi nyɔ́ɔgi da pye bi gbǎn cán í. Koro ní ki myɛ ní bele be maa lè kàdoʔo ma, bele bee a ba ra fundaanra kpéʔele wi kéeli na í. Koro wɔ́ɔ ní i nyɛ gbanzan, ní bi taʔa káfalaga na da nɛnɛ.

Mɔ a kɔ́ wári nyɔ́ɔgi fàli Kolocɔlɔɔ yɛ́ʔɛ ma í

¹⁷ Mɔ ga ni syée Kolocɔlɔɔ kpáagi ma lǎli ni lè, mi mɔ tɔ́lɔgi kɔ̀rɔsíi. Nùuni mi lóʔo koro n pɔ́rɔ n sɔ̀lɔ nilabalabèle sáriga-wòloro na. Níì cán pe ga gi cán poro i kapeʔe kpéʔele í.