Syɛɛnjóow 3 - Cebaara Bible 2010

Yáriri myɛ ní di làla

¹ Yariga o yariga i nyɛ ní gi làla, làla i nyɛ yariga o yariga na gi nyɛ lè nyɛ̀ʔɛni láara ni.

² Làlaa i nyɛ seeli wólo, làlaa si i nyɛ kùúw wólo. Làlaa i nyɛ bi yariga cɔ́rɔ, làlaa si i nyɛ bi yacɔ́rɔgi kɔ́n.

³ Kpóoli làla i yaà, a pɔʔɔli làla i yaà. Jabagili làla i yaà, a faanni làla i yaà.

⁴ Nyɛnili làla i yaà, a kataanri làla i yaà. Sùpiiwáari làla i yaà, a yɔ́ɔli làla i yaà.

⁵ Kàdɛnɛri wáala lala i yaà, a kàdɛnɛri kpóʔorolo lala i yaà. Woyɛɛ wáa-mí-mígili làla i yaà, a woyɛɛ sìnwáa-mí-mígili làla i yaà.

⁶ Yarigaa caala lala i yaà, a yarigaa pùununɔ làla i yaà. Yarigaa kɔnnɔ lala i yaà, a yarigaa wáala lala i yaà.

⁷ Suluguli làla i yaà, a jɔlili làla i yaà. Pyèrigi làla i yaà, a jooli làla i yaà.

⁸ Tàmagi làla i yaà, a paragi làla i yaà. Kapɛɛnni làla i yaà, a yɛɛ̀nyingi làla i yaà.

⁹ Nyàʔá syɔɔn a taa wi fɔ̀rɔgi fáli ni?

¹⁰ Túgori Kolocɔlɔɔ taʔa syɔɔn ye na lè ni be kùrú mii n gee bee nyaa.

¹¹ Wi n yariga o yariga sámaga a gi nyɔɔ ki lǎli ni, àlí wi n bàngwɔɔ sɔ̀ngurɔ le syɔɔn ye fúnyi ni, bi gi taa kapyelee Kolocɔlɔɔ kpéʔele lè nlaa sélimi na fwɔɔ n baa nan kwɔ́ɔmi na, syɔɔn a gbǎn li kánmi cán bi foro í.

¹² Mii n gi cán yarigaa ga nyɔɔ syɔɔn ma n sɔ̀lɔ gee naa na í, koro gi nyɛ waa fundaanra kpéʔele, sáā gi kpéʔele, gee gi nyɔɔ wi ma lè wi sìíw ni.

¹³ Syɔɔn o syɔɔn í wɔ́ɔ ra líi sáā gbo sáā gi nyaagi, gee gi nyɔɔ wi fáliw myɛ nínge ni lè, gee bee i nyɛ Kolocɔlɔɔ yakanʔa.

¹⁴ Mii n gi cán yariga o yariga Kolocɔlɔɔ kpéʔele lè, ki i kòró beè làla o làla, yarigaa a gbǎn fàra gi na í, kàa a wòlo gi ni í. Kolocɔlɔɔ n koro pye jàngó waa fɛ̀ɛgí woro yɛ́ɛgi na.

¹⁵ Gee gi nyɛ lè beè, ki maa téè pye yaà, gee ki a ba pye lè beè, ki i naa n kwɔ́ɔ, gee gi sɔ̀lɔ n kwɔ́ɔ lè, Kolocɔlɔɔ i gi lúrugu ni maa.

Kùúw i nyɛ ki myɛ kwɔ́ɔmɔ

¹⁶ Wéle, gee mii níì nyaa lè tári na, koro gi nyɛ: Kútiiw tɛ́ʔɛ ni, péemi i yaà, sínni tɛ́ʔɛ ni, a péemi i yaà.

¹⁷ A mii gi joo niyɛɛ fúngi ni níì jo: Kolocɔlɔɔ a kútiiw kúun syɛɛnsinw ní syɛɛnpeew na, níì cán làla i nyɛ keele o keele, ní kapyele o kapyele na.

¹⁸ A mii gi joo niyɛɛ fúngi ni syɔɔn ye kéeli na níì jo: A Kolocɔlɔɔ be sɛʔɛ ni wéle wii jàngó be gi cán bi cán poro i nyɛ àmɛɛ yaweere nyɛ lè yagana.

¹⁹ Níì cán gee gi syɔɔn ye taagi lè koro wonijangi gi yaweʔe taagi. Syɔɔn i kúu, a yaweʔe i kúu, ŋɔngari wonijanra di nyɛ be siinw ni, syɔɔn ga kpɔ́ʔɔ n sɔ̀lɔ yaweʔe na í. Níì cán yáriri myɛ i nyɛ gbanzan.

²⁰ Pe myɛ i syée tɛɛnijanga ma. Pe myɛ n yiri támiigi ni, pe myɛ si a ní lúru jée támiigi ni.

²¹ Wìí wi syɔɔn pili kéele fílige n cán ncan lee bee i lúru ǹjogi ni, yaweʔe pǐli si na, loro si i tíri táàma tári ni?

²² A mii gi nyaa syɔɔn í da fundaanra kpéʔele wi kapyegèle kéele na, yarigaa ga pɔ́rɔ wi ma n sɔ̀lɔ gee bee na í, ncan koro gi nyɛ wi lɛɛli. Níì cán gee ki a ba pye lè naa wi kàdoʔo ma, wìí wi a wi yaʔa wi gi nyaa?