Syɛɛnjóow 2 - Cebaara Bible 2010

¹ Mii n gi joo mii fúngi ni níì jo: «Wo kári! Mii a sa fundaanri tɛʔɛ bi mɔ sɛʔɛ wéle, laala mi wéle kataanni na.» Ki wéle, koro myɛ wɔ́ɔ i nyɛ gbanzan.

² Mii n gi joo kataanri kéele na níì jo: Ti i nyɛ nidolimɔ! Ní fundaanri kéele na níì jo: Nyàʔá di nyɔɔgi?

³ Mii maa ni caa bi pye fundaanra na dùvɛɛnw gbaala báriga ni, si mii fúngi yaʔa gi kòro sícilimi na, si niyɛɛ bwɔɔ labalami na, fwɔɔ bi taa mii í gi nyaa kapye ki n nyɔɔ syɔɔn ye ma paa gi kpéʔele kánmi bee na cángi láara ni be sìíw canya nyɔ́ɔ ni.

⁴ Mii n falikpoloyo kpéʔele n foro, mii n kpaaya faan n yaʔa niyɛɛ ma, mii n ɛrɛzɛn tírire cɔ́rɔ n yaʔa niyɛɛ ma.

⁵ Mii n nángwɔɔbéle fála n yaʔa niyɛɛ ma n fàra tiire séye na, níì tiisanri féleye myɛ cɔ́rɔ yi ni.

⁶ A mii lɔ̀ʔɔ wéeye túgu n yaʔa niyɛɛ ma bàā tiiyiliri fɔɔnri ní yi lǒgi ní.

⁷ Mii n pulonànbēle ní pulocabala syɔɔ, mii n be pìíbèle taa, bele be see mii kpáagi ni lè, a mii pye yaweekpologèlē, ní yaweeyiligēle fɔ́lɔ n sɔ̀lɔ bele myɛ na be pye mii yɛ́ʔɛ na Zyerusalɛmi ni lè.

⁸ Mii n wɔ́ɔ̀ wálifiiw ní tɛ́ɛw fàari n kpóʔoro n fàra fànʔafɔbèle lɔ́rɔ, ní tátɛɛyi lɔ́rɔ na. Mii n ŋúnuŋuu-nànbēle ní ŋúnuŋuu-càbala taa n fàra syɔɔn ye yanidaanmagi na, ki lè cenɛʔɛrɛ.

⁹ Mii n baa kpɔ́ʔɔ, níì báriga n sɔ̀lɔ bele myɛ na be pye lè yaà mii yɛ́ʔɛ ma Zyerusalɛmi ni. Mii sícilimi si maa kòro mii ma.

¹⁰ Gee myɛ láa ki da pye mii nyapiigèle na lè, mii ga ge kún gi kàa na í. Mii ga cée mii fúngi má fundaanra faala pyele na í. Níì cán mii maa ni fundaanra kpéʔele mii fáliw myɛ kéele na, koro gi pye mii fáliw bee myɛ tɔ̀nɔ.

¹¹ A mii sɔ̀ngi mii kɔ́yi falikpeʔeleo myɛ kéele na, ní fɔ̀rɔgee mii da taa jàngó bi wi foro lè. Wéle, gee bee myɛ maa pye gbanzan, ní bi taʔa káfalaga na da nɛnɛ, tɔ̀nɔ o nyɛ gi ni tári na í.

¹² Lǎli bee ni a mii si kàri bi sícilimi, ní nidolimi, ní cúromi kéele wéle. Níì cán wee wi a ba tɛ́ɛn fǎngi na bi taʔa fànʔafɔw na lè, nyàʔá wi a gbǎn kpéʔele? Fwɔɔ gee gi kpéʔele n kwɔ́ɔ lè.

¹³ Gee mii nyaa lè koro gi nyɛ ncan tɔ̀nɔ i nyɛ sícilimi ni n sɔ̀lɔ labalami na, àmɛɛ tɔ̀nɔ nyɛ gbɛ̀ɛ́nmi ni lè n sɔ̀lɔ yébilimi na.

¹⁴ Síciliw i nyaagi wiyɛɛ yɛ́ʔɛ ma, nilabalaw si i tala ni syée yébilimi ni, kàjáa mii si n gi cán kanijanna li pe myɛ siinw taagi.

¹⁵ A mii gi joo niyɛɛ fúngi ni níì jo: Yárigee ki a nilabalaw taa lè, koro ki a wɔ́ɔ nan mii na. Lǎli bee ni nyàʔá mii sícilimi nyɔɔ? A mii níì gi joo niyɛɛ fúngi ni níì jo: Gee bee wɔ́ɔ i nyɛ gbanzan.

¹⁶ Níì cán síciliw kéele sɔngudaara a gbǎn kòro beè làla o làla í, nilabalaw wóro a wɔ́ɔ kòro beè í. Amɛɛ cányi kwóo ni syée lè, ànbée be fɛ̀ʔɛ́ pe myɛ siinw kéele na. Síciliw tɔ̀nɔ́ i kúu, a nilabalaw wɔ́ɔ i kúu!

¹⁷ Koro na sìíw kéele mii bɛɛn, níì cán mii má, fáliw myɛ syɔɔn kpéʔele lè tári na, wi n pee, ncan ki myɛ i nyɛ gbanzan, ní bi taʔa káfalaga na da nɛnɛ.

¹⁸ Faligbanw myɛ mii kpéʔele lè tári na, wi kéeli n mii bɛɛn àmɛɛ mii a ba wi fundaanri yaʔa wee ma wi a ba tɛ́ɛn fǎngi na bi taʔa mii na lè.

¹⁹ Wìí wi gi cán kapye wi a ba pye sícilio wàlá nilabalaɔ? Bi gi taa woro wi a ba pye fáliw myɛ nyúngo na, wee na mii fɔ̀rɔ lè tári na n wi pye ní sícilimɛ ní! Koro wɔ́ɔ i nyɛ gbanzan.

²⁰ Mii bárigaw n baa kwɔ́ɔ fáliw myɛ kéele na, wee mii kpéʔele tári na lè.

²¹ Ncan syɔɔnwaa i yaà wi n fáliw kpéʔele ní sícilimɛ, ní cánna, ní fàndaara ní, wi lɛɛli n si baa kaan wee ma wi lè wi ga fali pye í. Koro ní i nyɛ gbanzan, ní kapeekpɔʔɔ.

²² Fáliwee myɛ, ní fɔ̀rɔgee syɔɔn taa wi ni lè cángi láara ni, nyàʔá tɔ̀nɔ wi taa gee bee ni?

²³ Wi sìíw canya myɛ i nyɛ wɔʔɔgɔ yagana, wi fáliw i nyɛ wi ma funjurugoro, àlí yébiligi ni ŋɔ́ndaala o nyɛ wi fúngi ni í. Koro wɔ́ɔ i nyɛ gbanzan.

²⁴ Syɔɔn í lìi si gbaa si fundaanra pye wi fáliw kéele na, yarigaa ga pɔ́rɔ wi ma n sɔ̀lɔ gee bee na í. Mii si wɔ́ɔ i koro wéle n jo ki n yìri Kolocɔlɔɔ kɔ́gi ma.

²⁵ Níì cán wìí syɔ́ɔn wi a gbǎn lìi si wɔ́ɔ fundaanri pye wi kàdoʔo na?

²⁶ Syɔ́ɔnwee kéele li Kolocɔlɔɔ dɛ́nɛ lè, wi n sícilimi, ní cánni, ní fundaanri kaan wee bee ma. Kàjáa wi n gi yaʔa kapeebyew í da yáriri kpóʔoro bàā kɔngi, koro ga pye ti ba kaan wee ma wi nyɔɔ Kolocɔlɔɔ nyɛ́nɛ na lè. Koro wɔ́ɔ i nyɛ gbanzan, ní bi taʔa káfalaga na da nɛnɛ.