Syɛɛnjóow 12 - Cebaara Bible 2010

¹ Da sɔ̀ngí maa taagi mɔ Faanfɔw na mɔ cárimi canya ni, sáni canbeeyi í da maa lè, yɛ́ɛgèle si nan, gele ni mɔ a ra gi nyuu lè si jo: «Mii yanidaanmaga ní o nyɛ ge ni í,»

² sáni lè cángi, ní gbɛ̀ɛ́nmi, ní yégi, ní ŋɔripiigèle í ba kàri lè yébilimɛ, fàfaanyi si ní ba nyɛ̀ʔɛni tɔ́n zětoo-láʔari kàdoʔo ma,

³ cángee na kpáagi kɔ̀rɔsiifɔɔlɔ a ra cɛ̀lɛ́ lè, nànniribèle si kùru lè, ní gee ni bele be yɛlɛ bàā tire lè, pe a ní da tire í àmɛɛ pe a cɛ́rɛ lè, gee ni bele be wéle fɛ̀nɛtiribèle na lè, wɔɔmɔ a jée be ni,

⁴ lǎli ni kpàánweeli kɔ̀riyɔ a tɔ́n wáa kàlari-kólogi na lè, lǎli ni tíregi kàfulogo a cɛ́rɛ lè, lǎli ni syɔɔn a ra yìrigí féjɛɛnni ŋúnugo na lè, lǎli ni ŋúnuŋuu-cébèle ŋùumɔ a tìgi lè,

⁵ lǎli ni syɔɔn a ra fɛ̀ɛgí dǎndamagi na lè, fyáakpɔɔrɔ si pye syɔɔn na kólogi na, lǎli ni amandi tíigi a fyɛ́ɛn lè, kúdow si tìgí tɔ́n, lǎli ni yáriri láa a kwɔ́ɔ syɔɔn ni lè, àmɛɛ syɔɔn syée wi bàngwɔɔ tɛɛkòrogi ma lè, á nyɛnifɔbèle si i sɔ̀lɔ́ ni máari kàlari-kóloyi ni,

⁶ ní sáni wálifiiw mɛ́ɛnnɛ í ceri lè, sáni tɛ́ɛw yalele í jaa lè, sáni kasǎnni í jaa pùnweeli nyɔ́ɔ na lè, sáni sàkobili í kabi kɔ̀lɔ́w ǹjoʔo ni lè,

⁷ sáni támiigi í lúru jée tári ni, beè ki da pye lè, pǐli si lúru kári li kaanfɔw Kolocɔlɔɔ ma.

⁸ Ki myɛ i nyɛ gbanzan ní i nyɛ kanyɔɔnɔ fun, Syɛɛnjóow wi jo nya. Ki myɛ i nyɛ gbanzan.

Syɛɛnsanri

⁹ Gee naa n yɛlɛ ki wɔ́ɔ taʔa yaà bi jo Kacánw n pye sícilio, ní wɔ́ɔ̀ kòro ni syɛ́ɛnbèle tama cánni na. Wi n sɔ̀ngi ní wɔ́ɔ̀ gi sámaga n sɛʔɛ níì kàseegéle saʔa caa n soʔolo soʔolo keyɛɛ na.

¹⁰ Kacánw n ŋàʔana n syɛɛntaanra caa n sɛ́bɛ. Dee wi sɛ́bɛ lè, ti n tɔ̀nɔ n sɛ́bɛ di sɛ́bɛganmi na, ní i nyɛ kányɛʔɛ wóro.

¹¹ Sícilibèle syɛ́ɛnrɛ i nyɛ àmɛɛ ŋaafirigeye nyɛ lè, kérigèle sɛ́bɛfɔɔlɔ i nyɛ àmɛɛ ŋaaya nyɛ, yee be sámaga n kóri lè. Bànaʔaɔ nibin yakanʔa gii.

¹² Gee gi syɛɛnsanri kwɔ́ɔ lè, ni pyà, ki n yɛlɛ mi yákirii taa, ncan syɔɔn o kwóo sɛ́bɛnɛʔɛbéle sámagala na í, tamanɛʔɛni si i céri fɔ̀rɔgí.

¹³ Wo syɛ́ɛnri myɛ kwɔ́ɔmɔ lóʔo, poro bi nyɛ: Da fɛ̀ɛgí Kolocɔlɔɔ na, mí wi kajoodɛɛngèle sámaga mi cò. Koro gi nyɛ syɔɔn myɛw.

¹⁴ Níì cán Kolocɔlɔɔ a ba kútiiw kúun kapyegèle myɛ na, àlí gele myɛ ge làra lè, wojanna yoo, wobeele yoo.