Syɛɛnjóow 11 - Cebaara Bible 2010

Bi miyɛɛ cǒmi cán kagbangèle na

¹ Mɔ liili wáa lǒyi ǹjoʔo ni, níì cán ki mɔnmɔ o ki mɔnmɔ, mɔ a ba li taa.

² Lɛɛlɛ kaan syɛ̀ɛnnɛ kɔrɔsiin ma, àlí kɔrɔtaanri ma, níì cán wɔʔɔgee ki a ba too tári na lè, mɔ ga gi cán í.

³ Fàfaanyi ga nyìn zěgi na, yi n gi wo tári na. Tiige si ga too wòrogulo kàbangi na wàlá solomɔkulo kàbangi na, tɛ́ɛgee ni tíigi ga too lè, nɛɛ bee ki a kòro.

⁴ Wee wi káfalagi wéle lè, wi a lùguro lùgu í, wee wi kòro ni fàfaanyi wéle lè, wi a yaliire láa í.

⁵ Amɛɛ gi nyɛ lè mɔ ga káfalagi kozɔ̀lɔgɔ cán í, wàlá pyà kaceleye kpóloganma fícɛnnɛfɔlɔ láʔa ni í, kánmi bee na ki wɔ́ɔ̄ nyɛ mɔ ga Kolocɔlɔɔ kapyeli cán í, woro wee wi gi myɛ kpéʔele lè.

⁶ Da mɔ luguri lúru nyǐngi nyɔ́ɔ na, cângwɔɔgi nyɔ́ɔ na, mɔ a kɔ́ mɔ kɔ́gi yaʔa ki ŋɔ́n daa í. Níì cán dee ti a ba nyɔɔ lè, nyǐngi nyɔ́ɔ wóro yoo, cângwɔɔgi nyɔ́ɔ wóro yoo, mɔ ga di cán í, wàlá kapye ti myɛ siinw a ba nyɔɔ.

⁷ Gbɛ̀ɛ́nmi n tɛ́nɛ, cángi nyáana i nyɛ yacanga nyapiigèle ma.

⁸ Syɔɔn ga yɛɛnɛʔɛgéle taa sìi na, ki n yɛlɛ waa fundaanra kpéʔele ke myɛ ni, wi sɔ̀ngi wi taa gi na wi cán yébilimi canya yi a ba nɛʔɛ. Gee myɛ gi maa lè ki i nyɛ gbanzan.

Wo pye fundaanra na sáni lǎli í kɔ́ sɔ̀lɔ lè

⁹ Nìgɔcariɔ, da muguri mɔ cárimi làla ni, ki n yɛlɛ maa fundaanra kpéʔele mɔ cárimi canya ni, kóloyee mɔ fúngi tèé mɔ na lè, da yi táanri maa yɛlɛgi ní mɔ nyapiigèle kanyaagéle ní. Kàjáa ki n yɛlɛ mi gi cán Kolocɔlɔɔ a ba mɔ yérige kútiijoo-tɛ́ɛgi ni gee bee myɛ kéele na.

¹⁰ Fúngi kasɔngurɔ léeli miyɛɛ na, mí kapeegi wàli mi láʔa miyɛɛ céri na, níì cán cárimi ní pìími i nyɛ gbanzan.