Syɛɛnjóow 10 - Cebaara Bible 2010

¹ Sísyɔɔnguuro i nùndaanna sìnzamagaɔ sinmɛ kaangi pi i kɔ́nʔɔri pi nǔngi n si pɛɛn. Kánmi bee na labalama cɛɛri i sícilimi ní mɛ́ɛtaangi kálagi.

² Síciliw fúngo i syée ní wi ní wi kàliige ma, nilabalaw fúngo si i syée ní wi ní wi kàmɔnɔ ma.

³ Nilabalaw ga ni syée kólogi na, àmɛɛ gi nyɛ lè yákirii o wi ma í, pe myɛ n gi cán wi i nyɛ nilabalaga.

⁴ Wee wi nyɛ kùndigiri na lè, wi fúngi ga yìri mɔ kurugo, mɔ a kɔ́ núngo mɔ tɛ́ɛgi ni í. Níì cán pyèrigi i kapeekpoloyo yéregi.

⁵ Kapeegaa i yaà, gee mii nyaa tári na lè, pùununɔ lii, lee li yìri fànʔafɔlɔ ma lè:

⁶ Nidolimi n télege kpɔ́ɔmi tɛ́ɛyɛ ni, á lɔ́ri fɔ̀ɔlɔ tɛ́ɛn màámi tɛ́ɛyɛ ni.

⁷ Mii n pulobèlē nyaa syɔɔnyɔ na, ní si fànʔafɔbiigéle nyaa ke i táanri tɔ́lɔyi na àmɛɛ pulobèlē nyɛ lè.

⁸ Wee wi weʔe túru lè, wi a too gi ni, wee wi weʔe kúunri kàkɔlɔgɔ na lè, wàbiga a wi nɔn.

⁹ Wee wi kàdɛnɛrɛ wóo lè, ti a wi kpàli, wee wi kàjere yabala lè, kapeʔe i wi laba.

¹⁰ Kpánagi ga pɛɛn, ki nyɔ́ɔgi si ga jɔɔgɔ í, fwɔɔ mɔ í da kpúmɔn ní fànʔa ní. Kàjáa sícilimi kanyɔɔnɔ li nyɛ kérigèle cɔɔnrilɔ.

¹¹ Wàbiga ga syɔɔn nɔn gi sìnvwɔɔgɔmi kéele na, kanyɔɔnɔ ní o nyɛ gi fwɔɔgɔfɔw na í.

Mɔ a kɔ́ ra nyuu bi sɔ̀lɔ í

¹² Síciliw nyɔ́ɔ syɛ́ɛnrɛ n nyìn kpɔ́ʔɔri na. Kàjáa nilabalagi nyɔ́ɔwara i gi kálagi.

¹³ Ki nyɔ́ɔgi syɛ́ɛnrɛ sélimɛ i nyɛ nidolimɔ, ki syɛ́ɛnri kwɔ́ɔmɔ si i nyɛ cúrobeemɛ.

¹⁴ Nilabalagi i syɛ́ɛnri nɛʔɛgi. Gee ki a ba pye lè syɔɔn ga gi cán í, wìí wi a gi tɛ̀ɛn syɔɔn na gee ki a ba pye wi kàdoʔo ma lè?

¹⁵ Nilabalagi fáli i gi fɔ̀rɔgí, koro gee gi lè ki ga caà gi kozɔ̀lɔgi cán bi kári kěgi ma í.

¹⁶ Tára mɔ, wɔʔɔgi i nyɛ mɔ na, mɔ wee fànʔafɔlɔ wi nyɛ lè nìgɔcaripiige, mɔ wee syɛɛnkpolobéle be sɔ̀ɔ́ ni líi lè!

¹⁷ Tára mɔ, dùbaw i nyɛ mɔ na, mɔ wee fànʔafɔlɔ wi nyɛ lè mɛ́ɛkpoloyi fɔ̀ɔlɔ yodaʔagaa, mɔ wee syɛɛnkpolobéle be líi làrijǎnni ni lè, koro ga pye poro í da fànʔa taagi singbaadinre fun ni.

¹⁸ Sàlagi kéele na kpaatɔn-díiri n ni màrí, wee kɔ́yɔ yi sàla lè, wi kpáagi n ni ŋuu.

¹⁹ Lìile i kpéʔele fundaanra pyele kéele na, dùvɛɛnw si i fundaanra kaangi sìíw ma, wáliw si i kérigèle myɛ cɔɔnri.

²⁰ Mɔ a kɔ́ fànʔafɔlɔ dánga í, àlí mɔ sɔnguri ni, mɔ a kɔ́ lɔrɔfɔlɔ dánga í, àlí bi mɔ yaʔa mɔ kpaafun-zínɛgi ni. Níì cán ǹjoʔo ma féjɛɛnnaa a kári ní mɔ syɛ́ɛnri ní, fókaanya yálaa a sa di joo, dee mɔ joo lè.