Sofonii 3 - Cebaara Bible 2010

Zyerusalɛmi ye ga Kolocɔlɔɔ kayeli lóʔo í

¹ Wɔʔɔli a pye kèceegi na gi nɔ́nʔɔ lè, koro gee gi nyìn fǎngi gbànvɔɔlɔ na lè!

² Ki o joomɔ faala lúro í, ki o fɔ̀lɔ́ kpúmɔn-mí-kàrigala na í, ki o kiyɛɛ daari Yawe na í, ki o nùuní gi Kolocɔlɔw na í.

³ Ki syɛɛnkpolobèle be nyɛ gi níngi ni lè pe i nyɛ càarabēle bele be kaana lè. Ki kútiijoobèle i nyɛ cângwɔʔɔ nyɔ́ɔ kàsoloyo, yee yi lè yafyɛn ga kòro yi ma yi ba káa nyǐngi nyɔ́ɔ na í.

⁴ Ki kanyaajoobèle i nyɛ nɔ̀ʔɔrɔgɔ-syɛ̀ɛnnɛ, ní nǎnbèle pèle, bele be lè pe o nyɛ tágala syɛɛnnɛ be fáliw ni í. Ki sáriga-wòlobèle i yacanri nɔ́ɔnri, pe i làlwaw kálagi.

⁵ Yawe n sín ki níngi ni, wi o kakologo kpéʔele í. Nyɛ̀ʔɛ nyɔ́ɔ o nyɛ̀ʔɛ nyɔ́ɔ, wi i wi sínni yirigi gbɛ̀ɛ́nmi na, wi o láari gee bee pyele na í. Kàjáa syɛɛnnaa-sìnzinw ga fɛ̀ɛrɛ cán í.

⁶ «Mii n syɛɛnfeleye kwɔ́ɔ n yirige yaà. Mii n be jɛ̀ɛ́ngèle kpaataʔa-tɔ́nɔyɔ kálagi yi lè be fǎngi. Mii n be kàlari-kóloyi kálagi, syɛ̀ɛnnɛ ni o sɔ̀lɔ́ yaà í! Pe kěyi n jaa, syɛ̀ɛnnɛ ní o yaà í, tɛ́ɛnfɔɔlɔ ní o yaà í!

⁷ Mii maa ni gi nyuu níì jo: Mɔ mi tɛ́nɛ maa fɛ̀ɛgí mii na, mí fɔ̀lɔ kpúmɔn-mí-kàrigali na! Kánmi bee na kérigèle myɛ mii tɛ́ʔɛ n wi sàmi lè, mii màko a dée pye bi wi kálagi í. Kàjáa a be sèʔê tɔlɔyɔ wári be kálagimi kapyere kurugo.

⁸ Koro na ye mii sige, cángee na mii a yìri lè bi pye séerafɔlɔ,» Yawe wi jo nya, «níì cán mii n gi kɔ̀rirɔ n tímana bi syɛɛnfeleyi pínɛ yiyɛɛ ni, bi fǎnyi kpóʔoro yi pan mii ma, bi mii fundanʔagbɔɔri yàli yi na, mii fundanʔari gbànma myɛw. Níì cán mii yejaagi náa a tári myɛ sórigo.

Kolocɔlɔɔ a syɛɛnfeleyi kàriga

⁹ «Lǎli bee ni mii a syɛɛnfeleyi nyɔ́ɔwara jée mùnu koro ga pye pe myɛ í da Yawe mɛ́ɛgi yiri sáā báara wi ma ní fungo nibin ní.

¹⁰ Mii kpɔ̀ʔɔrɔfɔbèle, poro bele mii cariga lè, pe a ra yìrigí yaà Etyopii cábiyi jelige na bàā maa ní yakaanyi ní mii ma.

Isirayɛli wogorobèle kéele

¹¹ «Cángi bee na nàʔabeemi myɛ mɔ kpéʔele mii na lè, fɛ̀ɛrɛ a ní mɔ taa bi kéeli na í, níì cán lǎli bee ni bele be muguri ní nɛ̀ɛnyɛnɛgɛ ní lè mii a be cɔɔnri yirige mɔ níngi ni. Mɔ a láʔa nɛ̀ɛgbɔʔɔgi pyele na mii nyanbejǎngi na.

¹² Mii a syɛ́ɛnbèle pèle yaʔa mɔ níngi ni, bele be nyɛ lè màámi fɔ̀ɔlɔ ní fóomi fɔ̀ɔlɔ, pe a Yawe mɛ́ɛgi pye be tɛɛlaragi.

¹³ Isirayɛli wogorobèle a ní da kakoloyo kpéʔele í. Pe a ní da jànvaa nyuu í, námara nyíngéle a pye be nyɔ́ɔyi ni í, pe a ra líi sáā sìnɛ́, syɔɔn faala a ra be tɔ́ɔrɔ í.»

Zyerusalɛmi lúru-mí-télegeli kéele

¹⁴ Siyɔn calipile, da fàndaara yákpolo wáa! Isirayɛli ye, yaa yákpogèle wáa ní fundaanra ní! Zyerusalɛmi, da fundaanra kpéʔele, máā muguri ní mɔ fúngi myɛ ní!

¹⁵ Kútiiw wi da too mɔ na lè, Yawe n wi láʔa mɔ na, wi n mɔ nigoow kolo n lúrugo. Isirayɛli fànʔafɔw wi lè Yawe, wi i nyɛ mɔ níngi ni. Wɔʔɔgɔ ní o yaà, gee na mɔ a ra fɛ̀ɛgí lè í.

¹⁶ Cángi bee na, pe a gi joo Zyerusalɛmi ma si jo: «Siyɔn, mɔ a kɔ́ ra fɛ̀ɛgí í! Mɔ kɔ́yi a kɔ́ fɔlɔ í!

¹⁷ Yawe mɔ Kolocɔlɔw i nyɛ mɔ níngi ni, nànnirio wii, wee wi syɔɔn syoo lè. Wi fundaanratɔw a ra muguri mɔ kéeli na. Wi a kòro pyèrio mɔ tamagi kéele na. Wi a ra fàndaara mugurumɔ kpéʔele mɔ kéeli na.»

¹⁸ «Bele be fɔ̀n kpóʔorojǎngèle ni, àmɛɛ be léeli mɔ na lè, mii a be kpóʔoro, poro bele na fɛ̀ɛ́ri líbe lè.

¹⁹ Wéle, lǎli bee ni, bele myɛ be fànʔa cáan mɔ na lè, mii a keele tɛ́ʔɛ be na. Mii a tɔyaayi fɔ̀ɔlɔ syɔɔ, bele be nɛnɛ lè, mii a be kpóʔoro. Táree myɛ ni be nyɛ fɛ̀ɛ́ri ni lè, mii a be kpéʔele yaà beè sòololo, ní mɛ́ɛyɛ fɔɔlɔ.

²⁰ Lǎli bee ni mii a yele lúrugo pan, loro lǎli ni mii a ní yele kpóʔoro. Níì cán mii a yele kpéʔele mɛ́ɛyɛ fɔɔlɔ ní sòololo yárigéle tári syɛɛnfeleye myɛ nínge ni, koro a pye yele wóbèle be cò n kári lè lǎli ni mii ga be lúrugo n pan yele nyɛ́nɛ na lè,» Yawe wi jo nya.