Sofonii 2 - Cebaara Bible 2010

Màámi fɔ̀ɔlɔ yerile kéele

¹ Ye yeyɛɛ gbóʔoro yé sɔ̀ngi ye wéle, fɛ̀ɛfɔn-syɛɛnfelege,

² sáni kajoo-mí-cerili í pàlá pan lè, sáni cángi bee í ba sɔ̀lɔ àmɛɛ sùweʔe nyɛ lè, sáni Yawe fundanʔari káfugbanga í ba too yele na lè, sáni Yawe fundanʔari canʔa í ba nan yele na lè!

³ Yele bele myɛ ye nyɛ lè màámi fɔ̀ɔlɔ tári na, yaa Yawe caa, yele bele ye táanri wi kajoogèle na lè! Yaa sínni caa, yaa màabyeri caa! Dɔ̀ʔɔ́ yele a ba taa syɔɔ Yawe fundanʔari canʔa na.

Joogbanna, canʔajeemɛ syɛɛnfeleyi kánma na

⁴ Níì cán pe a ba foo Gaza na, Asikalɔn a ba kàri tɛɛ̀kalagiga, Asidɔdi a ba nɛnɛ núngo yaà cânvulɛɛlɛ na, Ekurɔn a ba kíle kɔ́n.

⁵ Wɔʔɔli a pye syɛ́ɛnbèle na be nyɛ lè wodɛ́ɛnbéle ní sólomi lɔ̀ʔɔ nyɔ́ɔ na, gee bee n jo Kerɛti ye syɛɛnfelegi na. Kanaan, mɔ wi lè Filisitini ye tári, Yawe syɛ́ɛnri di nyɛ dee mɔ kánmi na: «Mii a mɔ kálagi, syɛ̀ɛnnɛ a ní pye mɔ ni í.»

⁶ Sólomi lɔ̀ʔɔ nyɔ́ɔ a pye yaweenaʔa-tɛ́ɛyɛ, bi pye tɛɛkòroyo bànaʔabèle ma, ní tɛɛsùluyo bǎbèle ma.

⁷ Solomɔ lònyɔɔw bee a pye Zyuda kpáagi wozanbèlē wóo. Nɛɛ bee pe a ra be yaweeri nàʔá. Cángi ga kwɔ́ɔ Asikalɔn kpáayi a pye be tɛɛ̀syɔɔnyi. Níì cán Yawe be Kolocɔlɔw a kacànna pye be na, si be yirige púlori ni.

Joogbanna, canʔafolomɔ syɛɛnfeleyi kánma na

⁸ «Mii n Mowabi ye tɛʔɛlɛyi lóʔo, ní Kolocɔlɔɔ mɛ́ɛkalagiri syɛ́ɛnrɛ Amɔn ye joo lè n mii syɛ́ɛnbèle faʔa, níì yìri pe tári láʔagoloyo kánma na.»

⁹ Yawe, Isirayɛli ye Kolocɔlɔw wi lè Nyɛ̀ʔɛni Sùlasiibéle Kafɔlɔ, wi n jo: «Koro na mii woweew mɛ́ʔɛ na, Mowabi a ba pye àmɛɛ Sodɔmi nyɛ lè, Amɔn ye si pye àmɛɛ Gomɔri nyɛ lè, bi pye tɛɛgaa, gee nyàápeegi a tɔ́n lè, ní solomɔ tɛɛwòlogo, ní tɛɛ̀kalagiga, bi kòro nya làla o làla. Mii syɛ́ɛnbèle be kòro lè, poro a ba be fuguri, mii syɛɛnfelegi wozanbèlē pe a pye beè lè, poro a ba be taa kɔrigɔ.»

¹⁰ Gee bee a pye be na pe nɛ̀ɛnyɛnɛgi kéele na, níì cán pe n faʔara wáa Nyɛ̀ʔɛni Sùlasiibéle Kafɔlɔ Yawe syɛ́ɛnbèle na ní wɔ́ɔ̀ yìri be kurugo.

¹¹ Yawe a pye fyáara yáriga be ma, níì cán wi a tári kolocɔlɔbèlē myɛ kálagi bi yirige yaà. Lǒgi nínge tátɛɛgéle syɛɛnfeleye myɛ a ra tíri da tuun wi yɛʔɛ̀ ma, yi myɛ nibin nibin, yi tarà ni.

Joogbanna, wòrogulo ní solomɔkulo syɛɛnfeleyi kánma na

¹² «Yele Etyopii ye wɔ́ɔgēle, mii ŋɔséew a yele súu kpóo.»

¹³ Wi a wi kɔ́gi sánʔa solomɔkulo kàbangi kánma na, wi a Asirii kálagi, wi a Niniivi pye tɛɛ̀kalagiga, bi gi pye lɔ̀ʔɔ fun tára àmɛɛ fìími tára nyɛ lè.

¹⁴ Yaweeri gboogéle a ra sìnɛ́ wi níngi ni, n fàra yaweeri féleye myɛ na. Alí zangbuloweʔe, ní kéremisyoolo a ra syɔ̀ɔ́n wi gàángèle ǹjoyo yataʔaya nínge ni. Fúlomɔ a ra yirigi fɛ̀nɛtiribèle ni. Kálagili a pye kpaaweeli na, níì cán sɛdiri tíiri yatɔnrɔ a láʔa yaà.

¹⁵ Fundaanri kàʔa si gi gee, koro gee ki da tɛ́ɛn lè sági yɛɛ̀nyinge na ní i gi nyuu kiyɛɛ fúngi ni níì jo: «Mii tɔ̀nɔ́gēle, yafyɛn ní o beè mii kàdoʔo ma í!» Acaa! Ki si n baa pye gee tɛɛ̀kalagiga, ki n pye yaweeri tɛɛkòrogo! Bele myɛ be sɔ̀lɔ́ gi taana lè, pe i féfeegèle wíi ní i kɔ́yi yìrigí.