Sofonii 1 - Cebaara Bible 2010

¹ Yawe syɛ́ɛnri di nan Kusyii jáaw Sofonii na lè, Kusyii wi lè Gedaliya jáaw, Gedaliya wi lè Amariya jáaw, Amariya wi lè Ezekyasi jáaw, koro n pye Zyuda fànʔafɔw Zyozyasi fǎngi làla ni wi lè Amɔn jáaw.

Kolocɔlɔɔ a keele tɛ́ʔɛ tápow na

² Yawe n jo: «Mii a yáriri myɛ kwɔ́ɔ bi láʔa tásaligi na.

³ Mii a syɛ́ɛnbèle ní yaweeri kwɔ́ɔ bi láʔa yaà, mii a nyɛ̀ʔɛni féjɛɛnrɛ ní sólomi lɔ̀ʔɔ fàala kwɔ́ɔ bi láʔa yaà, ní kérigèle ge syɔɔn pùuní lè, bi koro ní syɛɛnpeebèle kwɔ́ɔ bi láʔa yaà, mii a syɔɔn ye kwɔ́ɔ bi láʔa yaà tásaligi na,» Yawe wi jo nya.

Kolocɔlɔɔ a keele tɛ́ʔɛ Zyuda ní Zyerusalɛmi na

⁴ «Mii a mii kɔ́gi sánʔa bi taʔa Zyuda ní Zyerusalɛmi ye myɛw na. Baali wóbèle be kòro lè mii a be kálagi bi yirige tɛ́ɛgi naa ni, sejeebèle be báara wi ma lè poro mɛ́ɛgi n fàra sáriga-wòbèle na,

⁵ ní bele be tuun nyɛ̀ʔɛni ŋɔripiigéle yɛ́ʔɛ ma kpáayi ǹjoyo ni lè, ní bele be tíri ni tuun ní i kɛ̀ɛ́ Yawe na lè, ní wɔ́ɔ i kɛ̀ɛ́ Milikɔmi na lè,

⁶ ní bele be lúru Yawe kurugo lè, ní bele be lè pe o Yawe caa í, pe si wɔ́ɔ o wi yíbe í.

⁷ Ye kòro pyèrio Kàfɔw Yawe yɛ́ʔɛ ma! Níì cán Yawe cángi n nùuni, Yawe n tɔ̀nɔ n sárigaw sámaga, wi n wi woyeribèle sámaga n yaʔa wiyɛɛ ma kɔlɔ̀ na.»

⁸ Yawe n jo: «Mii sárigaw canʔa na, mii a keele tɛ́ʔɛ syɛɛnkpolobèle ní fànʔafɔw jàala na, ní bele myɛ na be yalenibɔnri nii lè.

⁹ Cángi bee na bele myɛ be yegi ni kpaaweegèle kána lè, ní bele pe be Kàfɔw kpaʔa nyìngí péemi, ní námaraw na lè, mii a keele tɛ́ʔɛ be na.

¹⁰ Cángi bee na yákpowáara a ra lúro yaà Fábèle kpàánweele ma, Yawe wi jo nya, sùpiire a ra lúro yaà kèyabifɔngi ma, kálagigbɔɔlɔ tinmɛ a ra lúro yaà dǎndamayi na.

¹¹ Yele Makitɛsyi ye, yaa sùpiiri wáa, níì cán Kanaan syɛ́ɛnbèle myɛ n kwɔ́ɔ gi ni, nǎnbèle bele má wálifiiw fáli kàlifáa lè, pe a kwɔ́ɔ bi yirige yaà.

¹² Lǎli bee ni mii a Zyerusalɛmi fuguri bi màʔa ní fètingéle ní, mii a keele tɛ́ʔɛ bele na be tìgi n tɛ́ɛn be sindɛɛgi na lè ní i gi nyuu be fúnyi ni níì jo: ‹Yawe o kacànga wàlá kapeʔe kpéʔele í.›

¹³ Pe lɔ́ri a fuguri láa, pe kpáayi a kòro wowaaya ní. Pe a kpaaya faan, pe si a tɛ́ɛn yi ni í, pe a ɛrɛzɛn tírire cɔ́rɔ, pe si a gbaa di dùvɛɛnw na í.

Yawe cángi kéele

¹⁴ «Yawe cângbɔɔgi n nùuni, ki n nùuni, ki i maa kelekele. Nànniriw a ra yákpobɛnʔɛ wáa Yawe cángi tìnmɛ kéele na.

¹⁵ Cángi bee i nyɛ fundanʔagbɔɔrɔ canʔa, ní wɔʔɔgɔ, ní funjurugoro canʔa, kálagila, ní kálagigbɔɔlɔ canʔa gii, yébilimɛ ní yébiliwɔɔlɔ canʔa gii, nyɛ̀ʔɛwɔɔlɔ ní nìgolowirige canʔa gii.

¹⁶ Tòmaʔa wiile canʔa, ní kapɛɛnnɛ sùpiiwáara canʔa gii, kèniriyi, ní jɛ̀ɛ́ngèle kpaataʔa-tɔ́nɔyɔ kánma na.

¹⁷ Mii a syɔɔn ye le wɔʔɔgi ni, pe a ra táanri àmɛɛ fúunbéle nyɛ lè, níì cán pe n kapeele pye Yawe na. Mii a be sìsyaanw wo àmɛɛ támiige nyɛ lè, pe céri a pye kànyaʔara.

¹⁸ Pe wálifiiw yoo, pe tɛ́ɛw yoo, toro a gbǎn ba be syɔɔ Yawe fundanʔagbɔɔri canʔa na í. Wi yejaagi náa a tápow sórigo, ki a tɔ̀nɔ́ pye fyáakpɔɔrɔ àmɛɛ wi a tári syɛ̀ɛnnɛ myɛ kálagi kwɔ́ɔ lè.»