Sélimɛ 9 - Cebaara Bible 2010

Kolocɔlɔɔ n joogaanna kpéʔele ní Nowe ní

¹ A Kolocɔlɔɔ dùbaw taʔa Nowe ní wi jáabèle na níì be pye: «Ki n yɛlɛ ye see ye nɛʔɛ ye tári nyìn.

² Tári yaweere myɛ, n fàra féjɛɛnri myɛ na, ní yáriree myɛ di fulolo lè, n wɔ́ɔ̀ fàra fábèle myɛ na be nyɛ lè lǒgi ni, yele yɛ́ɛyi fyáara a pye dee bee myɛ na, ti a ra fɛ̀ɛgí yele na gbanʔama. Ti n le yele kɔ́yi ni.

³ Yáriree myɛ di fíigi ni máari lè, ní i nyɛ sìi na, ti a pye yele ma lìile. Mii n toro kaan yele ma àmɛɛ mii tiisanri kaan yele ma lè.

⁴ Kàjáa káaree di nyɛ ní di sìíw ní lè, gee bee n jo di sìsyaanw, yele a kɔ́ ra dee bee káa í.

⁵ Yele sìsyaanw wi nyɛ lè yele sìíw, mii a wɔ́ɔ ba yíbege kpéʔele wi kéeli na. Yaweʔe o yaweʔe ga syɔɔn kpóo, mii a yaweegi bee yíbe syɔ́ɔnw bee sìsyaan kéele na. Syɔɔn ga wɔ́ɔ̀ wi syɛɛnnyɛnnɛ kpóo, mii a wi yíbe wi syɛɛnnyɛnw sìsyaan kéele na. Mii a tɔ̀nɔ́ syɔɔn yíbe wi senyɛnw sìi kéele na.

⁶ Wàa ga wi syɛɛnnyɛnnɛ sìsyaan wo, syɔɔnwaa wi a wɔ́ɔ wee bee fɔ́lɔ wóo wo. Níì cán Kolocɔlɔɔ n syɔɔn kpéʔele woro niwirio.

⁷ Yele si na, ki n yɛlɛ yaa sii yaa kàa fàra yeyɛɛ na. Ki n yɛlɛ ye pye tári na yaa nɛʔɛgi.»

⁸ A Kolocɔlɔɔ níì gi joo Nowe ní wi jáabèle ma be pye ní wi ní lè, níì jo:

⁹ «Wéle, mii a mii joogaanni kpéʔele ní yele ní bi wɔ́ɔ ba li kpéʔele ní yele yòdaʔayi ní naa yele kàdoʔo ma,

¹⁰ bi li kpéʔele ní sìi yáriri myɛ ní di nyɛ ní yele ní lè, ti lè féjɛɛnri, ní kěgi yaweere, ní sìnbirigi wóro myɛw, dee myɛ di yiri ní yele ní kɔ́rɔkpɔɔgi ni lè, n fàra dee myɛ na ti a ba pye naa tári na lè.

¹¹ Mii a mii joogaanni kpéʔele ní yele ní, loro li nyɛ: Lònɛʔɛgɛ a ní tìgi bi cere yáriri myɛ kwɔ́ɔ bi yirige yaà í. Lònɛʔɛgɛ a ní pan bi ba tári kálagi í.»

¹² A Kolocɔlɔɔ jo: «Joogaanni fɛ̀ɛ wi nyɛ wee naa, wee mii a yaʔa wi pye mii ní yele níngi ni lè, ní sìi yáriri myɛ nínge ni bàā syée yaà yìrigèle myɛ syɛ̀ɛnnɛ ma be maa lè.

¹³ Mii a mii kùlobariw yaʔa wi pye nyɛ̀ʔɛni na, woro í pye joogaanni fɛ̀ɛ, joogaanni li nyɛ lè mii ní tári wòolo nínge ni.

¹⁴ Lǎli ni mii ga fàfaanri kpóʔoro tiyɛɛ na tári ǹjoʔo ni lè, á kùlobariw yiri di na,

¹⁵ mii a sɔ̀ngi mii joogaanni na li nyɛ lè mii ní yele ní yaweeri myɛ nínge ni. Lǒyi a ní kàri lònɛʔɛgɛ bi cere yáriri myɛ kálagi í.

¹⁶ Kùlobariw a pye nyɛ̀ʔɛni na, mii si a ra wee bee wéle sáā sɔ̀ngí bàngwɔɔ joogaanni na li nyɛ lè mii Kolocɔlɔɔ ní sìi yáriri myɛ nínge ni di nyɛ lè tári na.»

¹⁷ A Kolocɔlɔɔ gi joo Nowe ma níì wi pye: «Koro gi nyɛ joogaanni fɛ̀ɛ, lee mii kpéʔele lè mii ní cere yáriri myɛ nínge ni di lè tári na.»

Nowe jáabèle taanri kéele

¹⁸ Nowe jáabèle be yiri kɔ́rɔkpɔɔgi ni lè, poro pe da pye Sɛmi, ní Kami, ní Zyafɛti. Kami wi da pye Kanaan tóow.

¹⁹ Bele bee taanri be pye Nowe jáabèle, poro ni syɛ́ɛnbèle yiri n níì pye tári myɛ na.

²⁰ A Nowe tári vàlá séli, níì ɛrɛzɛn tírire cɔ́rɔ.

²¹ A wi si dùvɛɛnw gbaa a wi yɛ́ɛgi wɔ́ɔ wi na, a wi wiyɛɛ waragi n yaʔa níbori wi fànikpaagi nínge ni.

²² A Kanaan tóow Kami sáà wi tóow nyaa níbori, a wi pan n baa gee bee joo wi senyɛnbèle siin ma kàfugi na.

²³ Lǎli bee ni a Sɛmi ní Zyafɛti burogbɔɔgi láa n taʔa be fókaannyunyi na ní i syée ní kàdoʔo ní n sáà be tóow tɔ́n, wi da pye lè níbori. Pe maa be yɛ́ɛyi wáa n pari jàngó poro a kɔ́ poro tóow níbori nyaa í.

²⁴ Lǎli ni dùvɛɛnw cèlege Nowe ni lè, gee wi pìíbèle kàdotɔɔn kpéʔele wi na lè, a wi gee bee lóʔo.

²⁵ Lǎli bee ni a wi fala n jo: «Kanaan n yɛlɛ wi dánga wi pye wi senyɛnbèle ma púlobèle myɛ púlo.»

²⁶ A wi níì jo: «Sɛmi Kolocɔlɔw wi lè Yawe, wi n yɛlɛ ní kpɔ̀ʔɔrɔlɔ ní. Kanaan si pye Sɛmi púlo.

²⁷ Kolocɔlɔɔ í da kàa fàrá Zyafɛti na. Zyafɛti sáā kòró Sɛmi fànikpaayi ni. Kanaan si pye Zyafɛti púlo.»

²⁸ A Nowe níì yɛ̀ʔɛlɛ sirakele ní togoye kɔrɔsiin ní kpɔrigɔ taa sìi na lònɛʔɛgi sɔ̀lɔlɔ kàdoʔo ma.

²⁹ A Nowe sìíw yɛ̀ʔɛlɛ myɛ nyɔ́ɔ pye saala sicɛrɛ ní togoye kɔrɔsiin ní kpɔrigɔ, á wi kùu.