Sélimɛ 8 - Cebaara Bible 2010

¹ Koro kàdoʔo ma a Kolocɔlɔɔ ní wɔ́ɔ̀ sɔ̀ngi Nowe kéeli na, ní wɔ́ɔ̀ sɔ̀ngi yaweeri myɛ kéele na di lè sìnbirigi, ní kěgi wóro di pye lè ní wi ní kɔ́rɔkpɔɔgi ni. A Kolocɔlɔɔ káfalaga yìrige, a ki i funu tári na. A lǒgi fala n séli ni tíri.

² Weekpɔɔ-cùrugi púloweegéle ní nyɛ̀ʔɛni wéegéle maa tɔ́n, a zěgi láʔa.

³ Lǒgi maa ni tíri ni láari tári na cɛɛri cɛɛri. Cányi togoye kɔrɔsiin ní kpɔrigɔ kwɔ́ɔlɔ kadoʔo ma, a lǒgi tìgi.

⁴ Yɛ́ɛli yeye kɔrɔsiin wóʔo canya kɛɛ ní kɔrɔsiin wógi na, a kɔ́rɔkpɔɔgi tɛ́ɛn Ararati nyanbeleyi ǹjoʔo ni.

⁵ Lǒgi maa ni tíri ni syée fwɔɔ n taa n baa nan yɛ́ɛli yeye kɛɛ wóʔo na. Yeye kɛɛ wógi cânzelige na, a nyanbeleyi ǹjoyo i nyaagi.

⁶ A canya togoye siin ga kwɔ́ɔ, fɛ̀nɛtiriwee Nowe da kúun kɔ́rɔkpɔɔgi na lè, a wi wee bee múgu,

⁷ níì kàanrigaa yirige n tórigo, a koro i syée ní i maa bi taa lǒgi í syɔɔnri jée tári ni.

⁸ A wi wɔ́ɔ̀ kàtolo yirige n tórigo koro ga pye bi gi wéle kapye lǒgi n tìgi n láʔa tári na.

⁹ Kàjáa kàtoli ga sáà li tɔ́lɔyi tɛɛ̀tɛʔɛlɛ taa í, a li lúru n pan wi ma bi ba jée kɔ́rɔkpɔɔgi ni. Níì cán lǒgi maa sèʔê pye tári tɛ́ɛyɛ myɛ ni. A wi kɔ́gi yirige n li cò n lúrugo n lége wiyɛɛ gurugo kɔ́rɔkpɔɔgi ni.

¹⁰ A wi níì sige canya kɔrɔsiin, ní níì kàtoli yirige kɔ́rɔkpɔɔgi ni n tórigo.

¹¹ A kàtoli lúru n pan wi ma cângwɔɔgi nyɔ́ɔ na. Wéle, olivye wáganbirige maa pye a li gi cò ní li nyɔ́ɔgi ní n pan. A Nowe gi cán ncan lǒgi n tìgi n láʔa tári na.

¹² A wi níì sige canyaa kɔrɔsiin. Koro kàdoʔo ma ní níì kàtoli yirige n tórigo. Kàjáa li ga níì lúru n pan wi ma í.

¹³ Nowe sìíw yɛ̀ʔɛlɛ saala taanri ní nibin wóli yézelige cânzelige na, lǒgi maa waʔa n láʔa tári na. A Nowe kɔ́rɔkpɔɔgi yatɔngɔ láʔa, níì wéle naa kàfugi na. A wi gi nyaa a tári myɛ waʔa.

¹⁴ Yeziin wógi canya toko ní kɔrɔsiin wóʔo na, tári maa waʔa.

¹⁵ Lǎli bee ni a Kolocɔlɔɔ gi joo Nowe ma níì jo:

¹⁶ «Ki n yɛlɛ mi yiri kɔ́rɔkpɔɔgi ni, mɔ ní mɔ céw, ní mɔ piibèle, ní mɔ piibèle càbala ní.

¹⁷ Yaweeri féleye myɛ di nyɛ ní mɔ ní lè, ki n yɛlɛ mi wɔ́ɔ dee bee pínɛ mi yirige ní miyɛɛ ní. Gee bee n jo féjɛɛnri, ní yaweeri, ní yáriree myɛ di fulolo lè tári na, jàngó di cariga tári na bi see nɛʔɛ bi tári nyìn.»

¹⁸ A Nowe yiri kɔ́rɔkpɔɔgi ni, woro ní wi jáabèle, ní wi céw, ní wi jáabèle càbala ní.

¹⁹ Yaweeri myɛ, ní féjɛɛnri myɛ, n fàra yáriree myɛ na di fulolo lè tári na, n yɛlɛ ní di féleyi ní, a toro yiri kɔ́rɔkpɔɔgi ni.

²⁰ A Nowe sáriga-wòlo-yafanʔa faan Yawe ma níì tàa wòlo yaweecǎnri myɛ, ní féjɛɛnjǎnri myɛ ni n kpéʔele sáriga-sórigoo sáriga-wòlo-yafaangi na.

²¹ A Yawe sárigaw nùndaanna taa níì gi joo wiyɛɛ fúngi ni níì jo: «Mii a ní tári dánga syɔɔn kéeli na í. Ki i nyɛ kányɛʔɛ ncan syɔɔn sɔnguri n tɔ̀nɔ n pee nlaa yaà wi cárimi làla ni. Kàjáa mii a ní sìi yáriri myɛ kálagi bi yɛlɛ ní gi ní àmɛɛ mii gi kpéʔele lè lǎli naa ni í.

²² Lǎlee myɛ ni si tári a pye beè lè, yaliilùgu-lǎli, ní yaliilaa-lǎli, ní wéeri làla, ní káfugi làla, ní wɔ̀ɔ́gi, ní gbɛ̀ɛ́ngi làla, ní cángi, ní yébiligi làla a tée kwɔ́ɔ í.»