Sélimɛ 6 - Cebaara Bible 2010

Kolocɔlɔɔ n gi kɔ̀rirɔ bi syɔɔn ye kwɔ́ɔ

¹ Lǎli ni syɛ́ɛnbèle séli ni nɛʔɛgi lè tári na, á be wɔ́ɔ i calipiigèle sii be ma,

² lǎli bee ni a Kolocɔlɔɔ pìíbèle i syɛ́ɛnbèle cálipiigéle wéle n gi nyaa ke n tɔ̀nɔ n nyɔɔ. A be si ge kèle nyɛ́nɛ n wòlo n pye be càbala.

³ Lǎli bee ni a Yawe jo: «Mii pǐli ga yɛlɛ bi kòro ní syɔɔn ní làla o làla í. Níì cán wi i nyɛ cere. Wi sìíw yɛ̀ʔɛlɛ myɛ kánma a pye togoye kɔrɔni.»

⁴ Lǎli ni Kolocɔlɔɔ pìíbèle ba ni sìnɛ́ ní syɛ́ɛnbèle cálipiigéle ní ni pìíbèle sii be na lè, lǎli bee ni a nàndɔnɔ-tèleye pye tári na, àlí lǎli bee kàdoʔo ma, a pìíbèle bee pye booma nanniriyi yi pye lè ní fànʔa ní. A yi mɛ́ɛyi wɔ́ɔ̀ yiri gbanʔama.

⁵ A Yawe baa gi nyaa syɔɔn péemi n tɔ̀nɔ n kpɔ́ʔɔ tári na n baa sɔ̀lɔ, á wi fúngi sɔ̀ngurɔ myɛ kòro kapeebyeri na canʔa o canʔa.

⁶ A Yawe gi nyaa woro da caà yɛlɛ bi syɔɔn faan naa tári na í. A gi tɔ̀nɔ n pye wi ma funbɛɛnrɛ.

⁷ A Yawe jo: «Syɛ́ɛnbèle mii faan lè, mii a be pɛ́ɛ láʔa tásaligi na, poro ní yaweeri, ní yáriree di fulolo lè n fàra féjɛɛnri na. Níì cán mii n gi nyaa mii da caà yɛlɛ bi be faan í.»

⁸ Kàjáa Kolocɔlɔɔ maa kacànna pye Nowe na.

Yawe n gi kɔ̀rirɔ bi Nowe yaʔa sìi na

⁹ Nowe yòdaʔayi yi nyɛ yee naa. Nowe maa pye syɛɛnsiɔn. Wi maa pye kajoolo fun syɔ́ɔn wi lǎli syɛ̀ɛnnɛ nínge ni. Nowe maa pye pínɛnyɛnnɛgɛ na ní Kolocɔlɔɔ ní.

¹⁰ Nowe maa nàbiigéle taanri see, poro be nyɛ Sɛmi, ní Kami, ní Zyafɛti.

¹¹ Tári maa tɔ̀nɔ n kálagi Kolocɔlɔɔ yɛ́ʔɛ ma, ti maa tɔ̀nɔ n nyìn péemi na.

¹² A Kolocɔlɔɔ tári wéle n gi nyaa ti n tɔ̀nɔ n kálagi. Níì cán syɛ́ɛnbèle myɛ nàʔama maa pee tári na.

¹³ Lǎli bee ni a Kolocɔlɔɔ gi joo Nowe ma níì jo: «Mii n gi kɔ̀rirɔ n tímana bi syɔɔn ye myɛ kwɔ́ɔ láʔa yaà. Níì cán be péemi kèlē n tári nyìn. Mii si a be pínɛ kálagi ní tári ní.

¹⁴ Ki n yɛlɛ mɔ í kɔ́rɔkpɔʔɔ sámaga miyɛɛ wóʔo ní gofɛɛri tíire ní, mí kɔ́rɔkpɔɔgi bee tíla tíla kpaafunyo mí tári kùraa tɛ́ʔɛ mi gi pɔ̀li fúngi, ní kàdogi na.

¹⁵ Kánmee na mɔ yɛlɛ bi gi sámaga lè poro bi nyɛ bee naa: Ki tɔnɔganmi n yɛlɛ bi pye mɛ́tiribéle togoye kɔrɔsiin ní kpɔrigɔ. Ki kpɔ́ʔɔganmi si pye mɛ́tiribéle toko ní kagunɔ. Ki ǹjogi tɔnɔganma si pye mɛ́tiribéle kɛɛ ní kagunɔ.

¹⁶ Mɔ a yatɔngɔ sámaga kɔ́rɔkpɔɔgi na ǹjoʔo ma, mɛ́tiri-tíla si pye ki ní yatɔngi lariga ni, mí kɔ́rɔkpɔɔgi kpaaweele pye kàbanga nibin na. Mí gi sámaga kpaataʔaya, kàa í pye táàma, kàa si pye níngi ni, kàa si pye ǹjogi ni.

¹⁷ Mii si na, mii a lònɛʔɛgɛ tìrige bi tári tɔ́n, jàngó bi cere yáriri myɛ kálagi di nyɛ lè nyɛ̀ʔɛni láara ni, ŋɔngara si i nyɛ di ni. Dee myɛ di nyɛ lè tári na, ti a kùu.

¹⁸ Mii si a mii joogaanni kpéʔele ní mɔ ní. Mɔ ní mɔ piibèle, ní mɔ céw, ní mɔ piibèle càbala, yele a jée kɔ́rɔkpɔɔgi ni.

¹⁹ Mɔ a wɔ́ɔ yaweeri féleye myɛ lége kɔ́rɔkpɔɔgi ni siin-ziin, nàɔn ní cɔlɔɔ, koro ga pye ti wɔ́ɔ kòro sìi na ní mɔ ní.

²⁰ Di pye nàɔn ní cɔlɔɔ n yɛlɛ ní di féleyi ní, ti lè féjɛɛnri, ní yaweeri, ní yáriri di fulolo lè tári na, dee bee a pan mɔ ma siin-ziin, jàngó bi kòro sìi na.

²¹ Mɔ si na, tàa láa yáriri féleye myɛ ni ti nyɛ lè lìimɛ, mi lége yaà, dee bee a pye yele yaliiri, mɔ ní bele ní ye nyɛ lè yaà.»

²² A Nowe gee bee kpéʔele. Wi n ki myɛ kpéʔele n yɛlɛ ní gi ní àmɛɛ Kolocɔlɔɔ da gi joo n gbàn wi ma lè.