Sélimɛ 49 - Cebaara Bible 2010

Zyakɔbi n wi jáabèle nyɛ̀ʔɛnaw kéele joo

¹ A Zyakɔbi wi jáabèle yeri níì be pye: «Ye kpóʔoro naa mii ma. Gee ki a ba pye yele na lè nyɛ̀ʔɛna, mii a ba gi joo tɛ̀ɛn yele na.

² Ye kpóʔoro naa ye ba lóʔo, Zyakɔbi jáabèle. Ye yele líiyi cáan ye yele tóow Isirayɛli syɛ́ɛnri lóʔo.

³ Wurubɛn, mɔ wi nyɛ lè mii pìilɛɛw, mii bárigaw ní mii fǎngi yaselige gi nyɛ mɔ. Mɔ n sɔ̀lɔ pe myɛ na kpɔ́ɔmi kàbaan na, n wɔ́ɔ̀ sɔ̀lɔ be na séew kàbaan na.

⁴ Mɔ i nyɛ àmɛɛ lɔ̀ʔɔ nyɛ lè, gee gi tugu ni yìrigí lè, mɔ a gbǎn yɛʔɛmaw taa í. Níì cán mɔ n lúgu mɔ tóow yasinɛgɛ na. Mɔ n tɔ̀nɔ n mii yasinɛgi nɔ́nʔɔ àmɛɛ mɔ lúgu gi na lè.

⁵ Simeyɔn ní Levii i nyɛ senyɛ̀nnɛ. Pe ŋɔséebèle i nyɛ yapeeye.

⁶ Mii fúngi a kɔ́ pínɛ ní be ní pe làra-mí-jooli kpóʔorolo ni í. Mii sɔ̀nguri a kɔ́ pínɛ ní be syɛɛnkpoʔolomi ni í. Níì cán pe fundanʔaratɔw n nànbēle kpóo. Pe n náapɛʔɛlɛ kadoʔo ma kápangboloyo cɛnɛ pe líiweepɛɛnni báriga ni.

⁷ Pe fundanʔari n yɛlɛ ti dánga àmɛɛ di pee lè, pe fundanʔagbɔɔri í dánga àmɛɛ di gbàn lè. Mii a be wàli bi láʔa peyɛɛ na Zyakɔbi ni. Mii a be cariga bi màʔa Isirayɛli ni.

⁸ Zyuda, mɔ mɔ senyɛnbèle a ba ra kpɔ́ʔɔgi. Mɔ a ba mɔ kɔ́gi taʔa mɔ nigoobèle kànyáabéle na. Mɔ senyɛnbèle a ba ra tíri da tuun bàā be yɛ́ɛyi cíbele mɔ taana.

⁹ Zyuda i nyɛ càarabɔ-yɛlɛɔ. Dóō, mɔ n yìri kpóoli tɛ́ʔɛ ma n lúru ni maa. Wi n yégunri cáan, wi n tìgi n sínɛ àmɛɛ càarabɔlɔ nyɛ lè, ní àmɛɛ càarajaa nyɛ lè. Wìí syɔ́ɔn wi a wi yìrige?

¹⁰ Fǎngi kàgbeele a tée yiri Zyuda narigi ni í. Kùndigiri sàbinnɛ a wɔ́ɔ yiri wi tɔ́lɔyi lariga ni í. Fwɔɔ bi taa li Kàfɔw í pan. Woro wee má syɛɛnfeleyi a ba yiyɛɛ gaan lè.

¹¹ Wi i wi jòfaniw pwoo ɛrɛzɛn tírigi na, ní i wi jòfanicaagi pyà pwoo ɛrɛzɛn tíricǎngi na. Wi i wi búrogi jé dùvɛɛnw ni, ní i wi burogbɔɔgi jé ɛrɛzɛnw sìsyaan ni.

¹² Dùvɛɛnw n wi nyapiigèle nyɛ́nɛgɛ, á nɔ́nɔw wi gǎngèle fílige.

¹³ Zabulɔn a tɛ́ɛn sólomi lòkpɔʔɔ nyɔ́ɔ na. Wi a pye bàtobèle tɛɛ̀yérege nyɔ́ɔ na wi láʔagologi a kári fwɔɔ sa nan Siidɔn nyɔ́ɔgi na.

¹⁴ Isakari i nyɛ jòfanikpɔʔɔ, gee gi sínɛ jásaabéle siin nínge ni lè.

¹⁵ Wi maa gi nyaa ŋɔ́ndaali tɛ́ʔɛ n tɔ̀nɔ n nyɔɔ. Níì tári nyaa a di tɔ̀nɔ n tɛ́nɛ. Wi i wi fókaannyungi nii túgori láara ni. Wi n pye puloo ni pɔ́rɔtɔɔri kpéʔele.

¹⁶ Dan a ba ra kútiiw kúunri wi syɛ́ɛnbèle na àmɛɛ Isirayɛli syɛɛnfeleyi wozanya nyɛ lè.

¹⁷ Dan a pye wàbiga kologo nyɔ́ɔ na, wi a pye màátɔn kobile ni, bàā syɔ́ɔnyi nɔngi yédeleegèle na fwɔɔ bi syɔɔnfǎnw láʔa cáan wi too bi càli.

¹⁸ Ee Yawe, syɔɔli mɔ kaangi lè, loro li nyɛ mii sɔ̀ngumi tɛɛtaʔaga.

¹⁹ Gee si gi Gadi kéeli kwɔ́ɔ lè, kapɛɛnkpumɔnbéle kabiga a tǐn pan ba too wi na, wi si a tǐn yìri bi be kɔ́ri láa.

²⁰ Azɛɛri yaliiri a ra nɛʔɛgi. Fànʔafɔlɔ yaliicànra a ra taagi wi ma.

²¹ Nɛfitalii i nyɛ àmɛɛ sɔ̀ɔ nyɛ lè, wee be yaʔa wiyɛɛ ma lè. Wi i pìicànbēle sii.

²² Zyozɛfu i nyɛ tiisanga káganfolovɔngɔ, tiisanga káganfolovɔngɔ, gee gi nyɛ lè pùnweele nyɔ́ɔ na, káganyi n yìri gungo ǹjoʔo ni.

²³ Sedeyi fɔ̀ɔlɔ n wi ŋɔ́n, pe n wi ŋɔɔn. Pe n pye wi kàsiitun-nyɛ̀nnɛ.

²⁴ Kàjáa wi sedegi n sèʔê kòro ki kanlɛɛmi na. Fǎngee gi pye wi kɔ́yi ni lè, gee bee n taa Zyakɔbi Séekpɔɔw Fɔ́lɔ kɔ́yɔ báriga ni. Kánmi bee na wi baa pye bànaʔaw, wi lè Isirayɛli fálagi.

²⁵ Mɔ tóow Kolocɔlɔɔ bárigaw ni, woro wee wi nyɛ lè mɔ dɛɛmɛfɔw, Séew Myɛ Kàfɔlɔ báriga ni, woro wee wi a dùbaw taʔa mɔ na lè dùbawee wi yìrigí lè nyɛ̀ʔɛni ma, ní dùbawee wi yirigi lè weekpɔɔ-cùrugi ni, yíregèle na be ŋɔri lè koro dùbaw, ní nafɔlɔ láagi dùba.

²⁶ Dùbawee mɔ tóow kaangi lè, wi n sɔ̀lɔ mii seefɔbèle wóo na, fwɔɔ n sáà nan bàngwɔɔ dǎndamayi ǹjoyo na. Wi n yɛlɛ wi pye Zyozɛfu nyúngi ni. Wi nyùnlibiw ni, woro wee wi nyɛ lè wi yɛʔɛfɔbèle fànʔafɔbile.

²⁷ Bɛnzyamɛ i nyɛ solomikaʔa, gee gi káari sulugu ni cáan lè. Ki ga pye nyǐngi nyɔ́ɔ na, káaree wi cò lè, wi n ni dee bee káa. Ki ga pye cângwɔɔgi nyɔ́ɔ na, pe n yáriri lɛɛ, dee be taa kapɛɛnni na lè.»

²⁸ Poro myɛw be nyɛ Isirayɛli syɛɛnfeleyi kɛɛ ní siin. Syɛ́ɛnri bee si be tóow joo be ma lǎli ni wi da ni dùbaw kpéʔele be ma lè. Wi n dùbaw kpéʔele pe myɛ nibin nibin ma feleye feleye n yɛlɛ ní be kánmi ní.

Zyakɔbi kùúw kéele

²⁹ Koro kàdoʔo ma a wi gi joo n gbàn be ma níì jo: «Mii a kùu bi fàra mii tóolɛɛbèle na. Ki si n yɛlɛ ye sa mii tɔ́n mii tóolɛɛbèle taana, Efurɔn wi lè Hɛti ye wów, woro ségi nyanbeweʔe ni,

³⁰ nyanbeweegi ni ki nyɛ lè Makpela ni, Mamire taana Kanaan tári ni. Abirahami wi da nyanbeweegi bee ní ségi syɔɔ Efurɔn ma, wi lè Hɛti ye wów, n gi pye woro kútɔndɛʔɛ.

³¹ Nɛɛ bee be Abirahami tɔ́n n fàra wi céw Sara na, ní wɔ́ɔ baa Izaaki ní wi céw Erebeka tɔ́n yaà. A mii wɔ́ɔ baa Leya tɔ́n yaà.

³² Ségi ní nyanbeweegi gi yaà gi ni lè, pe n gee bee syɔɔ wáli na Hɛti ye ma.»

³³ Lǎli ni Zyakɔbi kwɔ́ɔ syɛ́ɛnri na wi joo n gbàn wi jáabèle ma lè, a wi wi tɔ́lɔyi lúrugo n taʔa yasinɛgi na, á pǐli yiri wi ni. A wi kùu n fàra wi toolɛɛbèle na.