Sélimɛ 48 - Cebaara Bible 2010

Zyakɔbi n dùba kpéʔele Zyozɛfu jáabèle ma

¹ Kérigèle bee pyele kadoʔo ma, a gi baa joo Zyozɛfu ma níì jo: «Wéle, mɔ tóow i yaà ni yáa.» A wi wi jáabèle siin kɔ́ri n pínɛ ní wiyɛɛ ní, pe lè Manase ní Efirayimi.

² A pe baa gi joo Zyakɔbi ma níì wi pye: «Wéle, mɔ jáaw Zyozɛfu i yaà ni maa naa mɔ ma.» A Isirayɛli fala n ŋàʔana n yìri n tɛ́ɛn wi yasinɛgi na.

³ A Zyakɔbi gi joo Zyozɛfu ma níì jo: «Kolocɔlɔɔ wi nyɛ lè Séew Myɛ Kàfɔlɔ, wi n wiyɛɛ dɛ̀ɛn mii na Luzi ma, Kanaan tári ni níì dùba taʔa mii na,

⁴ níì gi joo mii ma níì jo: ‹Wéle, mii a tɔ̀nɔ́ pìinɛʔɛrɛ kaan mɔ ma bi mɔ kpéʔele syɛɛnnɛʔɛmɛ. Mɔ a pye syɛɛnfele-nɛʔɛgɛ, si wɔ́ɔ tári naa kaan mɔ yodaʔayi ma naa mɔ kadoʔo ma di pye be worò làla o làla kwɔ́ɔmɔ fun.›

⁵ Tɔ́ɔliw ni, nànbiigèle siin mɔ see naa Ezyipiti tári ni lè, sáni mii í pan naa mɔ ma lè, pìíbèle bee i nyɛ mii wòolo. Efirayimi ní Manase i nyɛ mii wòolo àmɛɛ Wurubɛn ní Simeyɔn nyɛ lè.

⁶ Kàjáa pìíbèle bele mɔ ga ní baa see lè kàdoʔo ma, bele bee a pye mɔ woolo. Pe a be córo sèjira ní be yɛʔɛfɔbèle ní kɔ́rigi lɛɛlɛ na.

⁷ Lǎli ni mii yìri Padan ma ni maa lè, ní baa kòro cɛɛri si nan Efirata na, a Arasyɛli kùu mii taana yaà beè Kanaan tári ni n mii yaʔa tánʔani na. A mii wi tɔ́n nɛɛ bee Efirata kólogi nyɔ́ɔ na. Efirata wi lè Bɛtilehɛmi.»

⁸ Lǎli bee ni a Isirayɛli Zyozɛfu jáabèle wéle níì jo: «Bɛ̀lɛ́ be nyɛ bele naa?»

⁹ A Zyozɛfu wi tóow yari: «Mii jáabèle bɛɛ, bele Kolocɔlɔɔ kaan mii ma lè nɛɛ naa.» A Isirayɛli jo: «Pe nùuni naa mii na mii í dùba kpéʔele be ma.»

¹⁰ Isirayɛli nyapiigèle si maa tɔ̀nɔ n fɔ̀rɔ lɛɛri báriga ni. Wi da níì pye bi gbǎn ra nyaagi í. A Zyozɛfu wi jáabèle nùuni wi na. A Isirayɛli be cò n táriga wiyɛɛ na níì be syɔɔnri syɔɔnri.

¹¹ A Isirayɛli gi joo Zyozɛfu ma níì wi pye: «Mii sɔ̀ngumɔ da níì pye gi na n jo mii a ní mɔ yɛ́ɛgi nyaa í. Wéle, Kolocɔlɔɔ si n caà gi yaʔa a mii mɔ yodaʔayi nyaa.»

¹² Lǎli bee ni a Zyozɛfu be láʔa wi tóow yégunyo na níì tìgi n too n yɛ́ɛgi cíbele tári na.

¹³ Koro kàdoʔo ma a wi wi pìíbèle siin cò n pan, ní baa wi kàliige kɔ́gi taʔa Efirayimi na, n woro yaʔa Isirayɛli kàmɔnɔ ma, níì wi kàmɔnw taʔa Manase na, n woro yaʔa Isirayɛli kàliige ma. Ní níì be nùuni yaà wi na.

¹⁴ A Isirayɛli si wi kàliige kɔ́gi sánʔa n taʔa Efirayimi nyúngi na wi nyɛ lè wobili, níì wi kàmɔnw taʔa Manase nyúngi na. Wi maa wi kɔ́yi fàli n taʔa kánmi bee na bi gi taa Manase wi nyɛ wolɛɛw.

¹⁵ A wi dùba kpéʔele Zyozɛfu ma níì jo: Kolocɔlɔwee yɛ́ʔɛ ma mii tóolɛɛgi Abirahami, ní mii tóow Izaaki da ni síngi ni táanri lè, Kolocɔlɔw bee wi nyɛ mii nàʔafɔw nlaa mii nyɛ beè lè fwɔɔ n taa n baa nan níjanʔa na,

¹⁶ ní nyɛ̀ʔɛni tunduɔn wi mii syɔɔ kapeeyi myɛ ma lè, ki n yɛlɛ wi dùbaw taʔa nànbiigèle naa na, mii mɛ́ɛgi, ní mii tóolɛɛgi Abirahami mɛ́ɛgi, ní mii tóow Izaaki mɛ́ɛgi sáā yiri be na pe see bi nɛʔɛ tári ni.

¹⁷ Lǎli ni Zyozɛfu gi nyaa lè a woro tóow wi kàliige kɔ́gi taʔa Efirayimi nyúngi na, a gee bee wi bɛɛn. A wi si fala n wi tóow kɔ́lɔ cò n láʔa Efirayimi nyúngi na bi taʔa Manase nyúngi na.

¹⁸ Níì wi tóow pye: «Abaa, ànbée ban í. Wee naa wi nyɛ pìilɛɛw. Ki n yɛlɛ mi mɔ kaliige kɔ́gi taʔa woro nyúngi na.»

¹⁹ A wi tóow cée, níì wi pye: «Mii n gi cán, dóō, mii n gi cán. Woro a wɔ́ɔ ba pye syɛɛnfelegaa. Wi a wɔ́ɔ kpɔ́ʔɔ, kàjáa wi cɔnɔw a kpɔ́ʔɔ bi sɔ̀lɔ wi na, wi yòdaʔayi a ba pye syɛɛnfele-nɛʔɛyɛ.»

²⁰ A wi dùbaw kpéʔele be ma cángi bee kánmi naa na níì jo: «Ní mɔ mɛ́ɛgi ní Isirayɛli ye a ba ra dùbaw kpéʔele peyɛɛ ma si jo: ‹Kolocɔlɔɔ í mɔ yaʔa mɔ í pye àmɛɛ Efirayimi ní Manase nyɛ lè.› » Kánmi bee na wi Efirayimi kínige Manase yɛ́ʔɛ ma.

²¹ A Isirayɛli gi joo Zyozɛfu ma níì wi pye: «Wéle, mii wi a kùu wee kàjáa Kolocɔlɔɔ a pye ní yele ní bi ní yele lúrugo tórigo yele tóolɛɛbèle tára ma.

²² Mii si na, mii n lɛɛlaa nibin taʔa mɔ wóli na n sɔ̀lɔ mɔ senyɛnbèle wòʔolo na. Loro li nyɛ Sisyɛmi tɛ́nɛmi mii syɔɔ lè Amɔri syɛɛnfelegi ma mii ŋɔséew ní mii sedegi báriga ni.»