Sélimɛ 46 - Cebaara Bible 2010

Zyakɔbi n kári Ezyipiti ma

¹ A Isirayɛli kólogi láa ni syée ní yáriri myɛ ní ti da pye wi ma lè. A wi ga sáà nan Bɛɛri-Syeba na, a wi sáriga wòlo wi tóow Izaaki Kolocɔlɔw ma.

² A Kolocɔlɔɔ joo ní Isirayɛli ní yanyaaya ni, yébiligi ni. Wi maa wi yeri níì jo: «Zyakɔbi, Zyakɔbi.» A wi jo: «Cooì.»

³ A Kolocɔlɔɔ wi pye: «Mii wi nyɛ Kolocɔlɔɔ, wi lè mɔ tóow Kolocɔlɔɔ. Mɔ a kɔ́ fyáa Ezyipiti gàríw na í. Níì cán mii a sa mɔ kpéʔele yaà beè mɔ í pye syɛɛnfele-nɛʔɛgɛ.

⁴ Mii wi a kári yaà Ezyipiti ma ní mɔ ní, mii wi a wɔ́ɔ ba lúru pan ní mɔ ní. Zyozɛfu wi a ba mɔ nyapiigèle tɔ́n.»

⁵ A Zyakɔbi yiri Bɛɛri-Syeba ni, Isirayɛli wi lè Zyakɔbi, a wi jáabèle wi láa n fàra be pìíbèle ní be cébèle na wòtorobèle ni, bele Faraɔnw da tórigo pe sa wi láa lè.

⁶ A be wɔ́ɔ̀ be yaweeri kɔ́ri n fàra yáriri myɛ na, dee be taa yaà lè Kanaan tári ni. A be i syée n sáà nan Ezyipiti tári na. Kánmi bee na Zyakɔbi kári Ezyipiti ma ní wi yòdaʔayi myɛ ní.

⁷ Wi maa kári Ezyipiti ma, woro ní wi pìíbèle, be lè nǎnbèle ní cébèle, n fàra wi pìinyanbiiyi na yi lè nǎnbèle ní cébèle.

Zyakɔbi narigbaagi kéele

⁸ Isirayɛli wi lè Zyakɔbi, woro ní wi pìíbèle, ní wi pìinyanbiiyi be kári Ezyipiti ma lè, poro mɛ́ɛyi yi nyɛ yee naa: Wurubɛn, wi lè Zyakɔbi pìilɛɛw,

⁹ ní Wurubɛn jáabèle be lè Henɔki, ní Palu, ní Hesurɔn, ní Karimii.

¹⁰ N fàra Simeyɔn ní wi jáabèle na, be lè Yemuwɛli, ní Yamɛ, ní Ohadi, ní Yakɛn, ní Sohari, ní Sawuli wi lè Kanaan ye céw pyà.

¹¹ Ní Levii, ní wi jáabèle be lè Gerisyɔn, ní Kehati, ní Merarii.

¹² Ní Zyuda, ní wi jáabèle be lè Syela, ní Perɛsi, ní Zera. Zyuda jáabèle bele si be lè Ɛri, ní Onan, poro maa kùu Kanaan tári ni. Perɛsi wóbèle si i nyɛ Hesurɔn ní Hamuli.

¹³ Ní Isakari, ní wi jáabèle be lè Tola, ní Puva, ní Yɔbi, ní Syimurɔn.

¹⁴ Ní Zabulɔn, ní wi jáabèle be lè Serɛdi, ní Elɔn, ní Yaleyɛli.

¹⁵ Poro be nyɛ nànbiigèle, gele Leya see Zyakɔbi ma lè Padan-Arami ni, n fàra calipili na pe da ni yiri lè Dina. Mɔ ga pìíbèle bee ní be pìíbèle fàra peyɛɛ na, nǎnbèle ní cébèle, pe myɛ bìnɛw i nyɛ toko ní kpɔrigɔ ní taanri.

¹⁶ N fàra Gadi, ní wi jáabèle na, be lè Sifiyɔn, ní Hagii, ní Syunii, ní Ɛsibɔn, ní Erii, ní Arodi, ní Areyɛli.

¹⁷ Ní Azɛɛri, ní wi jáabèle be lè Yimina, ní Yisyiva, ní Yisyivii, ní Beriya, n fàra be senyɛnjew na pe yiri lè Sera. Beriya jáabèle si i nyɛ Hebɛɛri, ní Malikiyɛli.

¹⁸ Poro be pye Zilipa pìíbèle, woro wee Laban da kaan wi pìíw Leya ma lè. Zyakɔbi má wi da be see, pe myɛ bìnɛw n pye syɛ̀ɛnnɛ kɛɛ ní kɔrɔni.

¹⁹ Arasyɛli wi lè Zyakɔbi céw, woro pìíbèle be nyɛ Zyozɛfu ní Bɛnzyamɛ.

²⁰ A Zyozɛfu si Manase ní Efirayimi see n wi yaʔa yaà Ezyipiti tári ni. Wi céw Asinati wi pye lè Ɔn kěgi sáriga-wòloo Poti-Fera pìíw, woro wi pìíbèle bee siin see wi ma.

²¹ Bɛnzyamɛ jáabèle si i nyɛ: Bela, ní Bekɛɛri, ní Asyibɛli, ní Gera, ní Naaman, ní Ehii, ní Worosyi, ní Hupimi, ní Mupimi, ní Aridi.

²² Poro be nyɛ Arasyɛli pìíbèle, bele wi see Zyakɔbi ma lè. Pe myɛ bìnɛw n pye syɛ̀ɛnnɛ kɛɛ ní sicɛrɛ.

²³ Dan jáaw si i nyɛ Husyimi.

²⁴ Nɛfitalii jáabèle si i nyɛ Yaseyɛli, ní Gunii, ní Yesɛɛri, ní Syilɛmi.

²⁵ Poro be nyɛ Biiliha pìíbèle, bele wi see Zyakɔbi ma lè. Laban wi da Biiliha kaan wi pìíw Arasyɛli ma. A be myɛ bìnɛw pye yòdaʔaya kɔrɔsiin.

²⁶ Syɛ́ɛnbèle be pínɛ n kári ní Zyakɔbi ní Ezyipiti ma lè, be pye lè wi yòdaʔayi, pe n pye togoye taanri ní kɔrɔni. Wi pìíbèle càbala ga córo n le yaà í.

²⁷ Pìíbèle bele si Zyozɛfu see yaà lè Ezyipiti ni, poro n pye syɛ̀ɛnnɛ siin. Zyakɔbi narigbaagi syɛ̀ɛnnɛ be kári Ezyipiti ma lè, pe myɛ nyɔ́ɔ maa pye togoye taanri ní kpɔrigɔ.

Zyakɔbi n sáà tɛ́ɛn Ezyipiti ni

²⁸ A Zyakɔbi Zyuda tórigo wiyɛɛ yɛ́ʔɛ ma Zyozɛfu ma wi sa wi pye waa woro fàrá Gosyɛn ma. A be i syée n sáà nan Gosyɛn tári na.

²⁹ A Zyozɛfu wi wòtorow sámaga n kári wi tóow Isirayɛli tɛɛfaragi ni Gosyɛn ma. Wi tɛ́nɛ̀ wi nyaa lè a wi wi wáa n mígi yátiigi ni, níì kòro wi na n nyɛni n mɔn.

³⁰ A Isirayɛli gi joo Zyozɛfu ma níì jo: «Ki n yɛlɛ mii í kùu tɔ́ɔliw ni àmɛɛ mii tɛ́nɛ baa mɔ yɛ́ɛgi nyaa lè ní wɔ́ɔ̀ gi cán ncan mɔ sèʔé i nyɛ sìi na.»

³¹ A Zyozɛfu gi joo wi senyɛnbèle ma, n fàra syɛɛnsanbèle bele na be pye lè wi tóow kpaʔa wòolo, níì be pye: «Mii a kári sa yele panni kéele joo Faraɔnw ma si wi pye: ‹Mii senyɛnbèle ní syɛ́ɛnbèle bele be nyɛ lè mii tóow kpaʔa wòolo, be pye lè Kanaan tári ni, pe n pan naa mii ma.

³² Syɛ́ɛnbèle bee i nyɛ yaweeyiligēle naʔafɔɔlɔ, níì cán yaweegboobéle bɛɛ. Pe n pan ní be yaweeyiligèle, ní be yaweekpologèle ní n fàra be kɔlɔ̀ yáriri myɛ na.›

³³ Koro na lǎli ni Faraɔnw ga yele yeri lè ní sáà yele yíbe níì jo: ‹Nyàʔá gi nyɛ yele fáliw?›

³⁴ Ye wi pye: ‹Mɔ falipyebèle i nyɛ yaweegboobéle, nlaa wolo yìri lè pìibēle fwɔɔ n taa n baa nan níjanʔa na. Fáliwee wolo kpéʔele lè, woro wolo tóobèle da wɔ́ɔ ni kpéʔele.› Kánmi bee na yele a tɛ́ɛn Gosyɛn tɛ́nɛmi ni. Níì cán yaweeyiligèle nàʔafɔɔlɔ myɛ i nyɛ yanɔnʔɔgɔ Ezyipiti ye ma.»