Sélimɛ 44 - Cebaara Bible 2010

Zyozɛfu n wi senyɛnbèle sɛʔɛ n wéle

¹ A Zyozɛfu syɛ́ɛnri naa joo n gbàn wi kpáagi kakarigaɔ ma níì wi pye: «Syɛ́ɛnbèle naa gɔ̀nvaʔaya nyìn lìíli na, lee pe a gbǎn tugo lè, mí pe myɛ nibin nibin wáli lúrugo mi le be ma pe gɔ̀nvaʔayi ni.

² Mii yagbaali li lè wálifiiw yagbaala, mi loro le wobili gɔ̀nvaʔaga ni ní wi bilesyɔɔ-wáliw ní.» Gee Zyozɛfu joo lè, a kpáagi kakarigaɔ gi kpéʔele.

³ Koro nyǐndaligi na, lǎli ni gbɛ̀ɛ́nmi cèlege lè, a be syɛ́ɛnbèle bee yaʔa a be i syée ní be jòfanibèle ní.

⁴ Lǎli ni pe yiri kěgi ni lè pe si da kɔ́ɔ̀ léeli í, a Zyozɛfu gi joo wi kakarigaw ma níì wi pye: «Yìri maa syée syɛ́ɛnbèle bee kurugo. Mɔ ga sáà be nɛnɛ n cò, mi be pye: ‹Nyàʔá na yele kapeele tɛ́ʔɛ n kacǎnni sàra?

⁵ Yagbaali bee ni ban mii kàfɔw gbo, ní i nyɛ̀ʔɛna kérigèle wéle ni nyuu li ni ì? Yele n kapeʔe pye dɛ.› »

⁶ A kakarigaw taʔa be na n sáà be nɛnɛ n cò níì syɛ́ɛnri bee joo be ma.

⁷ A be wi yari: «Wo kàfɔw, nyàʔá na mɔ dee naa nyuu? Mɔ falipyebèle a fɔ̀lɔ́ kéeli bee félege kpéʔele í.

⁸ Wéle, wáliw wolo sáà nyaa lè wolo gɔ̀nvaʔayi ni, wolo n yìri yaà ní wi ní Kanaan tári ma n pan ní wi ní mɔ ma. Mɛ̀ɛ́ si wolo a gbǎn wálifiio wàlá tɛɛ̀ yùu mɔ kafɔw kpaʔa ni bi sɛ́ɛ?

⁹ Yárigi ga nyaa mɔ falipyewee ma lè wolo ni, wee bee n yɛlɛ wi kùu, wolo wozanbèle si pye wolo kàfɔw púlobéle.»

¹⁰ A wi be yari: «Mii n yele wojoogi lóʔo, kàjáa yárigi ga nyaa wee ma lè, wee bee a pye mii púlo, yele wozanbèle si syɔɔ.»

¹¹ A pe myɛ nibin nibin fala n be gɔ̀nvaʔayi tìrige n tɛ́ʔɛ tári na níì yi múgu.

¹² A kakarigaw séli yɛʔɛfɔlɛɛw wóʔo na ni fuguri ni syée fwɔɔ n sáà nan pe cɔnɔzanw wóʔo na. A yagbaali sáà nyaa Bɛnzyamɛ gɔ̀nvaʔagi ni.

¹³ A be búroyi sulugu n láʔala peyɛɛ na, á pe myɛ níì túgori taʔa pe jòfanibèle na n lúru n jée kěgi ni.

Zyuda n kùsulugo kpéʔele Bɛnzyamɛ kéeli na

¹⁴ A Zyuda ní wi senyɛnbèle kári n sáà nan Zyozɛfu kpáagi na. Wi si maa sèʔê pye yaà. A be tìgi n too tári na wi yɛʔɛ̀ ma.

¹⁵ A Zyozɛfu be yari: «Nyàʔá na yele kéeli naa kpéʔele? Yele ga tɔ̀ʔɔ̂ gi cán ncan syɔɔn ga pye mii félege, wi n gbàn ni kérigèle nyaagi ni nyuu ì?»

¹⁶ A Zyuda jo: «Nyàʔá wolo a gbǎn cán bi joo mii kàfɔw mɔ ma? Gìí wolo a joo? Kanmìí na wolo a gbǎn joo bi woyɛɛ fílige? Kolocɔlɔɔ n mɔ falipyebèle sìnzinmɛ kéele nyaa. Wolo wéle bele, wolo i nyɛ mɔ púlobéle n fàra wee na, wee má yagbaali nyaa lè, ni kàfɔlɔ.»

¹⁷ A Zyozɛfu jo: «Mii ga yɛlɛ bi kéeli bee kpéʔele í. Wee má yagbaali nyaa lè, woro wi a pye mii púlow. Yele si na, yaa syée yɛɛ̀nyinge na yele tóow ma.»

¹⁸ Lǎli bee ni a Zyuda nùuni wi na níì jo: «Ni kàfɔlɔ, mii wi lè mɔ falipyew, nyɔɔ mii na, mí gi yaʔa mii í syɛɛnraa joo mɔ ma, mɔ fúngi si a kɔ́ tanʔa mii kurugo í. Ncan mɔ i nyɛ sèjira ní Faraɔnw ní.

¹⁹ Ni kàfɔlɔ, wolo wo nyɛ lè mɔ falipyebèle, mɔ maa wolo yíbe níì jo: ‹A tofɔlɔ ní cɔnɔvɔlɔ i yaà lé yele ma?›

²⁰ A wolo mɔ yari, ni kàfɔlɔ: ‹Wolo tóow i yaà, wi n tɔ̀nɔ n lɛɛ. Ní wɔ́ɔ̀ mɔ pye cɔnɔvɔlɔ i yaà. Wolo tóow n wee bee see wi lɛɛgwɔɔri làla ni. Pìíw bee yɛʔɛfɔlɔ si n kùu, á woro nibin kòro wi nɔ́ɔw seemɛ ni. Wi kéeli n tɔ̀nɔ n tofɔw dɛ́nɛ.›

²¹ A mɔ si gi joo wolo ma wo nyɛ lè mɔ falipyebèle níì jo: ‹Yaa maa ní wi ní mii ma nɛɛ naa koro ga pye mii tiimaa nyapile í ba taʔa wi na.›

²² A wolo mɔ yari, ni kàfɔlɔ: ‹Nìgɔcaripili a gbǎn láʔa li tóow na í. Li ga láʔa wi na, wi a kùu.›

²³ A mɔ si gi joo wolo ma wo nyɛ lè mɔ falipyebèle níì jo: ‹Yele cɔnɔw ga pye wi ga pínɛ n pan ní yele ní í, mii a ní kɔ́ yele yɛ́ɛyi nyaa í.›

²⁴ Lǎli ni si wolo lúru n nan mɔ falipyew na lè wi lè wolo tóow, syɛ́ɛnree mɔ joo lè, a wolo sáà di joo wi ma, ni kàfɔlɔ.

²⁵ A wolo tóow si níì wolo pye: ‹Yaa syée ye sa yaliire cɛɛri syɔɔ wo kéeli na.›

²⁶ A wolo si wi yari: ‹Wolo a gbǎn kári í. Fwɔɔ wolo cɔnɔw ga ni syée ní wolo ní, wolo a náa gbǎn kári. Níì cán wolo a ní gbǎn nǎnw bee yɛ́ʔɛ nyaa í, kapye wolo cɔnɔw o nyɛ ní wolo ní í.›

²⁷ Wolo tóow wi lè mɔ falipyew, a wi wolo pye: ‹Yele n gi cán pìibēle siin mii céw Arasyɛli see mii ma.

²⁸ Pe wàa nibin si n yiri mii taana n kári, a mii tɔ̀nɔ n jo kàkabalaga o nyɛ gi ni í, yaweegaa gi wi cò n sulugu sulugu. Mii si ga wɔ́ɔ níì wi nyaa nyáana í,

²⁹ yele si ga níì wee naa syɔɔ mii ma n kári, yarigaa ga sáà wi taa kólogi na, yele a tɔ̀nɔ́ mii ǹjoofiiretɔw lége kúsegi ni ní wɔʔɔgɔ ní.›

³⁰ Tɔ́ɔliw ni mii ga lúru n sáà nan mii tóow na, wi lè mɔ falipyew, nìgɔcaripili ga pye li o nyɛ ní wolo ní í, bi gi taa wi fúngi maa tɔ̀nɔ n pwɔɔ pìíw wóʔo na,

³¹ wi ga sáà gi nyaa pìíw o nyɛ ní wolo ní í, wi a tɔ̀nɔ́ kùu. Mɔ falipyebèle be lè wolo, wolo a gi kaan wolo tóow ǹjoofiiretɔɔ í jée kúsegi ni ní wɔʔɔgɔ ní, wi lè mɔ falipyew.

³² N fàra gee bee na, mɔ falipyew wi lè mii, mii n niyɛɛ nyúngi fàli pìíw wóʔo na mii tóow ma níì wi pye: ‹Mii ga pye mii ga lúru n pan ní pìíw ní í, ki n yɛlɛ mi mii córo kolomɔ fɔ́lɔ làla o làla.›

³³ Tɔ́ɔliw ni, mii i mɔ nyɛ́ɛri, mi gi yaʔa mɔ falipyew wi lè mii, mii í kòro naa pìíw sìndɛʔɛ ni bi pye mɔ púlo, ni kàfɔlɔ. Mí pìíw yaʔa waa syée ní wi senyɛnbèle bele ní.

³⁴ Níì cán kanmìí na mii a gbǎn kári sɛ́ɛ mii tóow ma nìgɔcaripili kàdoʔo na? Ee! Ki ga yɛlɛ mii í tɔ̀nɔ́ mii tóow wɔʔɔgɔ yɛ́ʔɛ nyaa í.»