Sélimɛ 42 - Cebaara Bible 2010

Zyakɔbi n wi jáabèle tun Ezyipiti ma

¹ A Zyakɔbi ga gi nyaa ncan bile i yaà Ezyipiti ma, lǎli bee ni a wi gi joo wi jáabèle ma níì jo: «Nyàʔá na yele kòro ni yeyɛɛ wéle?

² Mii n gi lóʔo ncan bile i yaà Ezyipiti ma. Ki n yɛlɛ ye kári yaà ye sa wàa syɔɔ, jàngó wo gbǎn kòro sìi na, wo a kɔ́ kùu í.»

³ A Zyozɛfu yɛʔɛfɔbèle kɛɛ yìri n kári Ezyipiti ma bi sa bilew syɔɔ.

⁴ Kàjáa Zyakɔbi da Zyozɛfu cɔnɔw Bɛnzyamɛ tórigo ní be ní í. Níì cán wi maa jo: «Dɔ̀ʔɔ́ kapeʔe a kɔ́ sa wi taa yaà.»

⁵ A Isirayɛli jáabèle, ní syɛ́ɛnbèle pèle pínɛ n kári bilew tɛɛsyɔʔɔ ni. Níì cán kateegi maa too Kanaan tári na.

Zyozɛfu ga wi senyɛnbèle tɔʔɔlɔ í

⁶ Zyozɛfu si wi da tɛ́ɛn tári nyúngo na, woro wi da be pye pe i bilew pára tátɛɛyi syɛ̀ɛnnɛ myɛ ma. A wi yɛʔɛfɔbèle si pan n baa tìgi n too wi yɛʔɛ̀ ma n yɛ́ɛyi cíbele tári na.

⁷ A Zyozɛfu ga wi yɛʔɛfɔbèle nyaa a wi be wéle n cán. Kàjáa a wi wiyɛɛ kàriga woro ga be cán í, níì syɛɛngbanra joo be ma níì jo: «Sán yele yìri?» A be jo: «Kanaan tári má wolo yìri n pan ba lìile syɔɔ.»

⁸ Zyozɛfu maa wi yɛʔɛfɔbèle wéle n cán, kàjáa pe da wi cán í.

⁹ A Zyozɛfu sɔ̀ngi n taa ŋúnɔyi na, yee woro da ŋúnɔ lè be kéeli na. A wi be pye: «Tundunlarabéle be nyɛ yele. Tári tɛɛfaʔaya yele pan ba kɔ̀rɔsíi.»

¹⁰ A be wi yari: «Eʔe, kàfɔw, yaliire mɔ púlobèle pan ba syɔɔ.

¹¹ Wolo myɛ i nyɛ nàɔn nibin jàala. Wolo n tɔ̀nɔ n fílige. Tundunlarabéle ban wolo nyɛ í.»

¹² A Zyozɛfu be pye: «Kányɛʔɛ ban í. Tári tɛɛfaʔaya yele pan ba kɔ̀rɔsíi.»

¹³ A be wi yari: «Wolo i nyɛ nàɔn nibin jàala Kanaan tári ni. Wo maa pye kɛɛ ní siin. Wolo kàdotɔnw n kòro yaà níjanʔa ní wolo tóo ní, á wàa nibin si kwɔ́ɔ gi ni.»

¹⁴ A Zyozɛfu be pye: «Koro si mii da joo yele ma níì jo yele i nyɛ tundunlarabéle.

¹⁵ Kéeli naa ní mii a yele sɛʔɛ wéle, loro li nyɛ n Faraɔnw yaʔa sìi na, yele ga pye yele ga pan ní yele cɔnɔzanw ní í, yele a tée yiri nɛɛ naa í.

¹⁶ Ki n yɛlɛ ye yele wàa nibin yaʔa waa syée wi sa yele cɔnɔw kɔ́ri waa maa. Yele wozanbèle a cò bi yaʔa naa kàsolebéle, koro ga pye ki cán kapye yele syɛ́ɛnri i nyɛ kányɛʔɛ. Kapye koro ban í, bi tɔ̀nɔ́ Faraɔnw yaʔa sìi na, yele i nyɛ tundunlarabéle.»

¹⁷ A wi pe myɛ pínɛ n le kàsow ni, a be kwɔ́ɔ yaà canya taanri.

¹⁸ A ki ga pye candaanri wógi na, a Zyozɛfu be pye: «Ki n yɛlɛ ye gee naa kpéʔele koro ga pye yele í koro sìi na. Níì cán mii i fɛ̀ɛgí Kolocɔlɔɔ na.

¹⁹ Kapye yele i nyɛ funvii-syɛ̀ɛnnɛ, ye yele senyɛnwaa nibin yaʔa wi kòro kàsow ni, kpáagi naa ni yele nyɛ lè. Yele wozanbèle si yaliiri syɔɔ bàā syée yele syɛ́ɛnbèle kurugo, bele be yaà ní kateegi ní lè,

²⁰ yé sa lúru yaa maa nɛɛ naa mii ma ní yele cɔnɔw ní. Koro a pye mii ma fɛ̀ɛ mii í gi cán bi cán yele syɛ́ɛnri i nyɛ kányɛʔɛ, yele si syɔɔ kùúw ma.» A be gi pye nya.

²¹ A be i gi nyuu peyɛɛ ma níì jo: «Kányɛʔɛ na wolo n tɔ̀nɔ n kolo wolo cɔnɔw kéele na. Níì cán wi funnyɛnigɛtɔw maa ni wolo nyɛ́ɛri, a wolo gee bee nyaa, kàjáa wolo ga fɔ̀lɔ n lóʔo wi ma í. Koro na wɔʔɔgi naa nan wolo na.»

²² Lǎli bee ni a Wurubɛn gi joo be ma níì be yari: «Mii da gi joo yele ma níì yele pye: ‹Ye a kɔ́ kapeele pye pìíw na í ì?› Yele si ga fɔ̀lɔ n lóʔo mii ma í. Awá tɔ́ɔliw ni doò, wi sìsyaanw kéele li yíbe wolo ma lee.»

²³ Pe si da gi cán ncan Zyozɛfu i poro syɛ́ɛnri lúro í, níì cán wàa wi da ni Zyozɛfu syɛ́ɛnri kàragí be ma.

²⁴ A wi léeli be na cɛɛri n sáà nyɛni, ní níì lúru n pan be ma n baa joo ní be ní. Níì Simeyɔn cò n yirige be níngi ni n le kàsow ni pe nyɛnɛ na.

Zyakɔbi jáabèle n lúru n kári Kanaan ma

²⁵ Koro kàdoʔo ma a Zyozɛfu gi joo n gbàn níì jo pe be gɔ̀nvaʔayi nyìn yaliiri na, pé be myɛ nibin nibin wáli le pe gɔ̀nvaʔayi ni, ní wɔ́ɔ̀ jo pe kôdanʔaliile kaan be ma. Koro gi kpéʔele be ma.

²⁶ A pe be bilew tugo pe jòfanibèle na n yiri nɛɛ bee n kári.

²⁷ Lǎli ni be sáà tìrige tɛɛgaa ni bi syɔ́ɔn beè lè, a be wàa nibin si kɔ́ɔ̀ wi gɔ̀nvaʔagi sánʔa si lìilaa wòlo bi kaan wi jòfaniw ma, a wi wéle n wi wáliw nyaa yaà wi gɔ̀nvaʔagi nyɔ́ɔ na.

²⁸ A wi gi joo wi senyɛnbèle ma níì jo: «Pe n mii wáliw lúrugo n kaan mii ma. Wi i naa wee mii gɔ̀nvaʔagi ni.» Lǎli bee ni a be fúnyi curugo be na. A be i peyɛɛ wéle, ní i gi nyuu níì jo: «Nyàʔá Kolocɔlɔɔ pye gee wolo na?»

²⁹ A be pan Kanaan tári ma be tóow Zyakɔbi ma, ní baa ki myɛ joo n tɛ̀ɛn wi na gee ki sáà poro taa yaà lè.

³⁰ Pe n wi pye: «Nànw wi nyɛ lè tári kàfɔlɔ, wi n sáà syɛɛngbanra joo wolo ma, níì jo wolo i nyɛ tundunlarabéle.

³¹ A wolo si gi joo wi ma níì wi pye: ‹Wolo i nyɛ funvii-syɛ̀ɛnnɛ. Tundunlarabéle ban wolo nyɛ í.

³² Wolo maa pye senyɛ̀nnɛ kɛɛ ní siin tofɔlɔ nibin jàala, kàjáa wolo senyɛnwaa nibin n kwɔ́ɔ gi ni, wolo kàdotɔnw wi yaà lǎli naa ni Kanaan tári ni ní wolo tóow ní.›

³³ Lǎli bee ni nǎnw wi nyɛ lè tári kàfɔlɔ, a wi wolo pye: ‹Kánmi naa na mii a gi cán bi cán yele i nyɛ funvii-syɛ̀ɛnnɛ. Ki n yɛlɛ ye yele senyɛnwaa nibin yaʔa naa mii taana, yáā syée ní yaliiri ní yele syɛ́ɛnbèle ma be yaà lè ní kateegi ní,

³⁴ yé sa ra maa mii ma ní yele cɔnɔbili ní li kòro yaà lè. Kánmi bee na mii a gi cán bi cán yele o nyɛ tundunlarabéle í, yele i nyɛ funvii-syɛ̀ɛnnɛ. Lǎli bee ni mii a yele senyɛnw lúrugo kaan yele ma, yele si wɔ́ɔ ra tári nyaari bàā yele kérigèle cɔɔnri.› »

³⁵ Lǎli ni pe be gɔ̀nvaʔayi yaliire kàriga lè, a pe myɛ nibin nibin be wáliw nyaa pe gɔ̀nvaʔayi ni. Lǎli ni pe ní be tóow wáliw nyaa lè, a be fyáa.

³⁶ A be tóow Zyakɔbi gi joo be ma níì jo: «Yele i mii bɔ̀nɔ́ mii pìíbèle ni! Zyozɛfu ní o beè í. Simeyɔn ní wɔ́ɔ o beè í. Yele si ní Bɛnzyamɛ kɔ́ri kári. Mii na kérigèle bee myɛ a too.»

³⁷ A Wurubɛn gi joo wi tóow ma níì jo: «Mii ga pye mii ga lúru n pan ní Bɛnzyamɛ ní n baa kaan mɔ ma í, mi mii nànbiigèle siin kpóo. Wi kaan mii ma mii a lúru pan ní wi ní ba kaan mɔ ma.»

³⁸ A Zyakɔbi jo: «Mii jáaw a kári ní yele ní í. Níì cán wi nafɔlɔ na yɛʔɛfɔw n kùu, woro nibin wi kòro. Keele ga sáà wi taa kólogi na yele tánʔani na, yele a mii ǹjoofiiretɔw yaʔa wi jée kúsegi ni funbɛɛnrɛ na.»