Sélimɛ 40 - Cebaara Bible 2010

¹ Kérigèle bee kpéʔelele kadoʔo ma, wee wi pye lè Ezyipiti fànʔafɔw yagbaʔa kaanna nyúngo na, ní wee wi pye lè wi búruw sámagala nyúngo na, a bele bee baa kapeele pye be kàfɔw na, wi lè Ezyipiti ye fànʔafɔw.

² A Faraɔnw fúngo tanʔa wi kpáagi falipyebèlē siin kurugo, gee bee n jo, wee wi pye lè wi yagbaagi sámagala nyúngo na, ní wee wi pye lè wi búruw sámagala nyúngo na.

³ A wi be pye a pe be cò n le gáridibèle kùndigi kpaʔa kàso ni, kàsokpaagee ni Zyozɛfu pye lè wodɔɔn ní.

⁴ A gáridibèle kùndigi be yaʔa Zyozɛfu kɔ́lɔ na waa be kɔ̀rɔsíi sáā be màkow nyɔɔgi. A be kòro yaà kàsow ni n làlaa kwɔ́ɔ.

Zyozɛfu n kàsolebèle siin ŋúnɔyɔ kɔ́rɔ joo

⁵ Wee wi pye lè Ezyipiti fànʔafɔw yagbaʔa sámagala nyúngo na, ní wee wi pye lè wi búruw sámagala nyúngo na, poro bele pe da pye wodɔnbéle ní kàsow ni lè, a be myɛ siinw baa ŋúnɔ ní ŋúnɔyɔ ní yébilinijanga ni, yoro yee kɔ́rɔ wi da fàli lè.

⁶ A ki ga pye nyǐngi nyɔ́ɔ na, a Zyozɛfu pan be ma n baa be wéle n gi nyaa a be yɛ́ɛyi tɔ̀nɔ n tanʔa.

⁷ A wi be yíbe poro bele be pye Faraɔnw kpaʔa falipyebèlē lè ní i nyɛ ní woro ní kàsow ni woro kàfɔw kpaʔa ni lè, níì jo: «Nyàʔá gi yele yɛ́ɛyi tanʔa nya níjanʔa?»

⁸ A be wi pye: «Wolo n ŋúnɔ ní ŋúnɔyɔ ní bi gi taa syɔɔn faala o naa bi yi kɔ́rɔw joo wolo ma í.» A Zyozɛfu be yari: «Kolocɔlɔɔ má ban yi kɔ́rɔw joolo nyɛ ì? Koro na ye yi joo ye tɛ̀ɛn mii na.»

⁹ Wee wi pye lè yagbaagi sámagala nyúngo na, a woro wi ŋúnɔgi joo n tɛ̀ɛn Zyozɛfu na níì jo: «Wéle, mii n ŋúnɔ n gi nyaa a ɛrɛzɛn tírige i nyɛ mii yɛ́ʔɛ ma.

¹⁰ Kágangèlē taanri si maa pye ɛrɛzɛn tírigi bee na. A ki ga baa fùn níì fyɛ́ɛnrɛ kpéʔele, a gi kágangèle bee ɛrɛzɛnlɛɛɔ jɔnjɔnyɔ kpéʔele.

¹¹ A mii Faraɔnw yagbaala nyaa mii kɔ́gi ni, a mii ɛrɛzɛnw cɛnɛ níì wi nyìmini n le Faraɔnw yagbaala ni, ní sáà yagbaali le Faraɔnw kɔ́lɔ ni.»

¹² A Zyozɛfu wi yari: «Ki kɔ́rɔw wi nyɛ wee naa. Kágangèle taanri i nyɛ canya taanri.

¹³ Canya taanri ga kwɔ́ɔ, Faraɔnw a ní mɔ nyúngi yìrige, si ní mɔ lége mɔ fáliw ni. Mɔ a ní ra wi yagbaali nii wi kɔ́gi ni bi yɛlɛ ní mɔ yagbaagi kaanna kundigire fáli kánlɛɛmɛ ní.

¹⁴ Kàjáa lǎli ni mɔ ga sáà kacǎnni taa lè, mii i mɔ nyɛ́ɛri ki n yɛlɛ mi sɔ̀ngi mi taa mii na, mí kacànna kpéʔele mii na. Mii kéeli tɛ̀ɛn Faraɔnw na, mí mii yirige kpáagi naa ni.

¹⁵ Níì cán fànʔa na pe mii cò n yirige Heburubèle tára ni, àlí mii ga caa wɔ́ɔ̀ kàso kalele kpéʔele nɛɛ naa í.»

¹⁶ Wee wi pye lè búruw sámagala fáli nyúngo na, a woro ga gi nyaa a fànʔafɔw yagbaʔa fáli kùndigi ŋúnɔgɔ kɔ́rɔ joolo tɛ́nɛ, a wi gi joo Zyozɛfu ma níì jo: «Mii n wɔ́ɔ̀ ŋúnɔ ní ŋúnɔgaa ní n gi nyaa búrufiio sɛ̀ʔɛgēle taanri mii nyúngi ni.

¹⁷ Faraɔnw búru-nidaanmaɔ si maa pye ǹjoʔo ma sɛ̀ʔɛli ni. N wi yaʔa mii nyúngi ni wodugoo ní sɛ̀ʔɛli ni, a féjɛɛnri i maa n ba ni wi jóori.»

¹⁸ A Zyozɛfu wi yari: «Ki kɔ́rɔw wi nyɛ wee naa. Sɛ̀ʔɛgèle bee taanri i nyɛ canya taanri.

¹⁹ Canya taanri ga kwɔ́ɔ, Faraɔnw a mɔ nyúngi ceri bi láʔa mɔ na, si mɔ cɔ̀rɔ tiige na. Féjɛɛnri a ra maa bi ba ra mɔ céri jóori.»

²⁰ Candaanri wógi bee si maa pye Faraɔnw canzeʔe yɛɛgbara fɛ́tii. A wi lìigbɔɔlɔ sámaga wi syɛɛnkpolobèle myɛ ma. Wee wi pye fànʔafɔw yagbaʔa sámagala nyúngo na lè, ní wee wi pye wi búruw sámagala nyúngo na lè, a wi be nyúnyi yìrige wi syɛɛnkpolobèle nínge ni.

²¹ Wee wi pye wi yagbaagi fáli nyúngo na lè, a wi woro lúrugo n télege wi fáliw na, a woro i Faraɔnw yagbaala nii wi kɔ́gi ni.

²² Wee si wi pye lè búruw sámagala nyúngo na, níì be pye a be woro cɔ̀rɔ tiige na n yɛlɛ ní gi ní àmɛɛ Zyozɛfu da gi kɔ́rɔw joo lè.

²³ Koro ní ki myɛ ní, wee wi pye fànʔafɔw yagbaʔa sámagala fáli nyúngo na lè, wee bee ga sɔ̀ngi n taa Zyozɛfu kéeli na í, a wi fɛ̀ʔɛ wi na.