Sélimɛ 4 - Cebaara Bible 2010

Kayɛn ní Abɛli kéeli

¹ A Adami wi céw Ɛvi cán wi cɔɔ̀, a wi fícɛnnɛ taa n Kayɛn see. A wi jo: «Mii n nàɔn see Yawe bárigaw ni.»

² Koro kàdoʔo ma a wi Kayɛn cɔnɔw Abɛli see. A Abɛli baa pye bànaʔaɔ, Kayɛn si i nyɛ tèfalaɔ.

³ A làlaa ga kwɔ́ɔ, a Kayɛn kári ní tári yaliifálaraa ní n sáà wòlo sáriga Yawe ma.

⁴ A Abɛli si kári ní wi bǎbèle pìiselibèle pèle, ní be sǐnmi myɛ ní. A Yawe fɔ̀lɔ Abɛli ní wi sárigaw na.

⁵ Kàjáa wi ga fɔ̀lɔ Kayɛn, ní wi sárigaw na í. A Kayɛn fúngi tɔ̀nɔ n tanʔa gbanʔama, a wi yɛ́ɛgi tanʔa.

⁶ A Yawe wi yari: «Nyàʔá na mɔ mɔ fúngi tanʔa, ba nyàʔá na mɔ mɔ yɛ́ɛgi tanʔa?

⁷ Mɔ ga ni síngi mɔ a mɔ nyúngi yìrige. Mɔ si ga pye mɔ o síngi í, kapeeli li lee mɔ kpaaweeli na, li i caa bi tɛ́ɛn mɔ nyúngi na, mɔ má si gi nyɛ mɔ í pye li nyúngi na.»

⁸ A Kayɛn si kɔ́ɔ̀ joo ní wi cɔnɔw Abɛli ní. Amɛɛ be pye ségi ni lè, a Kayɛn yìri wi cɔnɔw Abɛli kurugo n wi kpúmɔn n kpóo.

⁹ A Yawe Kayɛn yíbe níì jo: «Sán mɔ cɔnɔw Abɛli nyɛ?» A Kayɛn jo: «Mii ga cán í. Mii lé wi nyɛ mii cɔnɔw kpaàweleo?»

¹⁰ A Yawe jo: «Nyàʔá na mɔ koro pye? Mɔ cɔnɔw sìsyaan i yákpoli wáa tári na fwɔɔ a li i nangi mii na.

¹¹ Mɔ cɔnɔw mɔ kpóo lè, tásaligi ki gi nyɔ́ɔgi múgu n wi sìsyaanw syɔɔ mɔ kɔ́gi ni n gbaa lè, tɔ́ɔliw ni mɔ a dánga bi léeli gi na.

¹² Mɔ ga tári fála, ti a tée ní di yasanri kaan mɔ ma í. Mɔ a pye ninyaari-mí-màʔaga, ní nifaalaga tári na.»

¹³ A Kayɛn gi joo Yawe ma níì jo: «Mii kolomi wɔʔɔgɔ túgoro n líbe n tóro mii í gbǎn di tugo.

¹⁴ Wéle, mɔ n mii nɛnɛ n léeli tɛɛ̀falagi naa na níjanʔa a gi nyaa mii n yɛlɛ bi kári sa làra léelige mɔ na. Mii a pye ninyaari-mí-màʔaga, ní nifaalaga tári na. Syɔ́ɔnwee faala wi ga sáà mii nyaa lè, wi a mii kpóo.»

¹⁵ A Yawe wi yari: «Syɔ́ɔnwee wi ga mɔ Kayɛn kpóo lè, mɔ kpóoli kapeele gɔlɔ́ a wòlo wee bee na bi ba taa ki tɛɛyɛ kɔrɔsiin.» A Yawe fɛ̀ɛ kpúmɔn Kayɛn na koro ga pye syɔ́ɔnwee faala wi ga wi nyaa lè, wi a kɔ́ wi kpóo í.

¹⁶ A Kayɛn núngo Yawe taana n kári n sáà tɛ́ɛn Nɔdi tári ni, Edɛn canʔafolomɔ kabangi na.

Kayɛn yòdaʔayi

¹⁷ A Kayɛn sínɛ ní wi céw ní, a wi ficɛnnɛ taa n Henɔki see. A wi si baa kègaa faan níì gi mɛ́ɛgi le ni gi yiri Henɔki, wi jáaw mɛ́ʔɛ na.

¹⁸ A Henɔki baa Iradi see, á Iradi Mehuyayɛli see, á Mehuyayɛli Metusyayɛli see, á Metusyayɛli Lemɛki see.

¹⁹ A Lemɛki càbala siin láa. Pe maa ni wozeliw yiri Ada, ní i siin wów yiri Siila.

²⁰ A Ada Yabali see. Syɛ́ɛnbèle bele be kòró fànikpaayi ni lè, ní i yaweeri gbóo, Yabali wi nyɛ bele bee tóolɛʔɛ.

²¹ Pe maa ni wi senyɛnw mɛ́ʔɛ yiri Yubali. Bele be kɔ̀ríw kpúmɔn, ní i máagèle wíi lè, Yubali wi nyɛ bele bee tóolɛʔɛ.

²² A Siila si wɔ́ɔ̀ Tubali-Kayɛn see. Tubali-Kayɛn wi pye kanyɛɛnri ní túnmɔri yárira myɛ sámagafɔlɔ. Pe maa ni wi senyɛnjew mɛ́ʔɛ yiri Naama.

²³ A Lemɛki gi joo wi cébèle ma níì jo: «Ada ní Siila, ki n yɛlɛ ye mii jóomi lóʔo. Lemɛki cébèle, ki n yɛlɛ ye líiyi cáan ye lóʔo. Mii n nàɔn kpóo mii kpàligi kéele na, mii n nìgɔcariɔ kpóo mii kpumɔnnamigi kéele na.

²⁴ Kapye Kayɛn kpóoli kapeele gɔlɔ́ a wòlo gi tɛɛyɛ kɔrɔsiin, mii Lemɛki kpóoli kapeele gɔlɔ́-wòloro a pye tɔlɔyɔ togoye taanri ní kpɔrigɔ ní kɔrɔsiin.»

²⁵ A Adami níì sínɛ ní wi céw ní, a wi nànbile see níì li mɛ́ɛgi le ni li yiri Sɛti, ncan wi maa jo: «Kolocɔlɔɔ n níì yòdaʔagaa nikwɔɔ kaan mii ma Abɛli sìndɛɛgi ni, woro wee Kayɛn kpóo lè.»

²⁶ A Sɛti wɔ́ɔ baa nànbile see níì li mɛ́ɛgi le ni li yiri Enɔsyi. Lǎli bee ni syɛ́ɛnbèle séli ni Yawe mɛ́ɛgi yiri.