Sélimɛ 35 - Cebaara Bible 2010

Zyakɔbi n yiri Sisyɛmi ni bi sa tɛ́ɛn Betɛli ni

¹ A Kolocɔlɔɔ gi joo Zyakɔbi ma níì jo: «Yìri maa lúru Betɛli ma mi sa tɛ́ɛn yaà beè, mí sáriga-wòlo-yafanʔa kpéʔele yaà beè Kolocɔlɔɔ ma, woro wee wi da wiyɛɛ dɛ̀ɛn mɔ na lè, lǎli ni mɔ da ni fé mɔ senyɛnw Ezau na lè.»

² A Zyakɔbi gi joo wi kpáagi wòolo ma n fàra bele myɛ na pe da pye ní wi ní lè níì jo: «Ye kolocɔlɔɔ-nibɔnbèle yirige yeyɛɛ níngi ni, ye yeyɛɛ jée ye mùnu, yé yele búroyi fàli.

³ Wolo a yìri bi lúgu kári Betɛli ma. Mii a sa sáriga-wòlo-yafanʔa kpéʔele yaà beè Kolocɔlɔɔ ma, woro wee wi mii nyɛ́ɛrigi lóʔo lè mii wɔʔɔgi làla ni, níì pye ní mii ní tánʔani làla ni, lee mii kpéʔele lè.»

⁴ Kolocɔlɔɔ-nibɔnbèle be pye be ma lè, a be bele bee myɛ kaan Zyakɔbi ma n fàra be líiyi vèʔebēle na. A Zyakɔbi di tɔ́n terebɛnti tíigi láara ni ki lè Sisyɛmi taana.

⁵ A be yìri beè n kári. A Kolocɔlɔɔ fyáakpɔɔrɔ wáa kěyi syɛ̀ɛnnɛ na, yee yi be màʔa lè, pe ga fɔ̀lɔ n yiri n taʔa Zyakɔbi jáabèle na ni nɛnɛ í.

⁶ Zyakɔbi ní bele myɛ pe da pye ní wi ní lè, a be kári fwɔɔ n sáà nan Luzi na, ki lè Betɛli, Kanaan tári ni.

⁷ A wi sáriga-wòlo-yafanʔa faan yaà níì tɛ́ɛgi bee mɛ́ʔɛ le ni gi yiri Ɛli-Betɛli. Níì cán nɛɛ bee Kolocɔlɔɔ da wiyɛɛ dɛ̀ɛn wi na, lǎli ni wi da ni fé bi syɔɔ wi senyɛnw ma lè.

⁸ Debora wi da pye lè Erebeka gbóofɔw, a woro kùu, a be wi tɔ́n Betɛli tìgimi ni, syɛni tíigi láara ni, á be kòro ni tíigi bee yiri Nyatinmi Syɛni tiige.

⁹ Lǎli ni Zyakɔbi yìri Padan-Arami ma n pan lè, a Kolocɔlɔɔ ní baa wiyɛɛ dɛ̀ɛn wi na, níì dùba taʔa wi na.

¹⁰ A Kolocɔlɔɔ gi joo wi ma níì jo: «Mɛ́ɛgi bee gi lè Zyakɔbi, pe a ní da gi yiri mɔ na í, fwɔɔ pe a ra mɔ yiri Isirayɛli.» Níì wi mɛ́ɛgi le kánmi bee na Isirayɛli.

¹¹ A Kolocɔlɔɔ níì wi pye: «Mii wi nyɛ Kolocɔlɔɔ, wee wi lè Séew Myɛ Kàfɔlɔ. Ki n yɛlɛ kàa í da fàrá mɔ na mɔ í pye syɛɛnnɛʔɛmɛ. Syɛɛnfelegaa, ní syɛɛnfeleye saʔa a yiri mɔ ni. Fànʔafɔɔlɔ a yiri mɔ sémɛɛnni ni.

¹² Táree mii kaan Abirahami ní Izaaki ma lè, mii a di kaan mɔ ma, si wɔ́ɔ di kaan mɔ yodaʔayi ma naa mɔ kadoʔo ma.»

¹³ Koro kàdoʔo ma tɛ́ɛgee ni Kolocɔlɔɔ joo ní Zyakɔbi ní lè, a Kolocɔlɔɔ núngo tɛ́ɛgi bee ni n lúgu ǹjogi ni n léeli wi na.

¹⁴ Tɛ́ɛgee ni Kolocɔlɔɔ joo ní Zyakɔbi ní lè, a wi kàdɛnɛgɛ gàánna yérige yaà beè, lee na wi sáriga-yólogoo ní sìnmɛ wo lè.

¹⁵ Tɛ́ɛgee ni Kolocɔlɔɔ joo ní Zyakɔbi ní lè, a Zyakɔbi tɛ́ɛgi bee mɛ́ʔɛ le ni gi yiri Betɛli.

Bɛnzyamɛ seeli ní Arasyɛli kùúw kéele

¹⁶ A be yiri Betɛli ni ni syée yɛʔɛ̀ ma. A Arasyɛli pìiwaa see. Tɛ́ɛgi bee, ní Efirata níngi si maa sèʔê léeli n yɛlɛ. Pìíw seeganma si maa tɔ̀nɔ n gbàn.

¹⁷ Lǎli ni Arasyɛli pye seeli na lè ní i wɔʔɔ, a fícɛricow wi pye: «Mɔ a kɔ́ ra fɛ̀ɛgí í, nànbilaa mɔ níì taa.»

¹⁸ N Arasyɛli yaʔa kúkoliw na, sáni wi ŋɔngari í yiri wi ni lè, a wi pìíw mɛ́ʔɛ le n jo paa wi yiri Bɛn-Onii. A tofɔw si wi mɛ́ɛgi le n jo paa wi yiri Bɛnzyamɛ.

¹⁹ A Arasyɛli kùu, a be wi tɔ́n Efirata kólogi nyɔ́ɔ na. Efirata wi lè Bɛtilehɛmi.

²⁰ A Zyakɔbi gàánna yérige wi nyángi na. Gàánni bee li nyɛ Arasyɛli kùúgi gàánna àlí n baa nan níjanʔa na.

²¹ A Isirayɛli taʔa n fala yɛʔɛ̀ ma n sáà wi fànikpaayi kóri Migidali-Edɛɛri màʔami na.

²² N Isirayɛli yaʔa tɛ́nɛmi bee ni, a Wurubɛn kári n sáà sínɛ ní Biiliha ní, wi da pye lè wi tóow cefàra-mí-láawaa. A wi tóow Isirayɛli kéeli bee lóʔo. Zyakɔbi jáabèle maa pye nànbiigéle kɛɛ ní siin.

²³ Pìíbèle Leya see wi ma lè, poro be nyɛ, Wurubɛn, wi pye lè Zyakɔbi pìilɛɛw, ní Simeyɔn, ní Levii, ní Zyuda, ní Isakari, ní Zabulɔn.

²⁴ Bele Arasyɛli see wi ma lè, poro si i nyɛ Zyozɛfu ní Bɛnzyamɛ.

²⁵ Arasyɛli falipyecew Biiliha wóbèle si i nyɛ Dan ní Nɛfitalii.

²⁶ Leya falipyecew Zilipa wóbèle si i nyɛ Gadi ní Azɛɛri. Poro be nyɛ Zyakɔbi jáabèle, bele wi see Padan-Arami ni lè.

Izaaki kùúw kéele

²⁷ A Zyakɔbi lúru n pan wi tóow Izaaki ma, Mamire ma, Kiiriyati-Haariba taana, gi lè Heburɔn, beè Abirahami ní Izaaki da sáà tɛ́ɛn lè.

²⁸ Izaaki maa taa yɛ̀ʔɛlɛ togoye kpanjɛrɛ.

²⁹ A Izaaki pǐli yiri, a wi kùu n fàra wi toolɛɛbèle na be kùu lè. Wi maa tɔ̀nɔ n lɛɛ n tín ní náà kùu. Wi jáabèle be lè Ezau ní Zyakɔbi, a poro wi tɔ́n.