Sélimɛ 33 - Cebaara Bible 2010

Zyakɔbi ní Ezau n peyɛɛ vàra

¹ A Zyakɔbi wi yɛ́ɛgi yìrige n wéle n Ezau nyaa wi i maa ní nǎnbèle saala siin ní. A wi fala n pìíbèle tíla tíla n kaan Leya, ní Arasyɛli, ní falipyecebèle siin ma.

² Wi maa falipyecebèle ní be pìíbèle kínige yɛʔɛ̀ ma, níì Leya ní wi pìíbèle taʔa bele bee na, ní náà Arasyɛli ní Zyozɛfu yaʔa a be pye pe myɛ kàdoʔo ma.

³ A woro tiimaa kíni yɛʔɛ̀ ma ni kpùmɔnɔ́ tári na n baa taa tɔlɔyɔ kɔrɔsiin, fwɔɔ n taa n sáà nùuni wi senyɛnw na.

⁴ A Ezau fàn n wi fàra, ní baa wi wáa n mígi yátiigi ni, níì wi syɔɔnri syɔɔnri. A be i nyaan.

⁵ A Ezau ga wi yɛ́ɛgi yìrige n wéle n cébèle ní pìíbèle nyaa, a wi Zyakɔbi yíbe níì jo: «Bɛ̀lɛ́ be nyɛ bele ní mɔ ní?» A Zyakɔbi wi yari: «Pìíbèle bele Kolocɔlɔɔ kaan mɔ falipyew ma lè, poro bɛɛ.»

⁶ A falipyecebèle nùuni yaà ní be pìíbèle ní n sáà tìgi n kpùmɔnɔ.

⁷ A Leya ní wi pìíbèle wɔ́ɔ̀ nùuni wi na n sáà tìgi n kpùmɔnɔ. Koro kàdoʔo ma a Zyozɛfu ní Arasyɛli nùuni wi na n sáà tìgi n kpùmɔnɔ.

⁸ A Ezau jo: «Kabiyi bee myɛ ní mii fàra lè, nyàʔá mɔ caa bi kpéʔele ní yoro ní?» A Zyakɔbi jo: «Dee bee i nyɛ jàngó mɔ í fɔ̀lɔ mii na, ni kàfɔlɔ.»

⁹ A Ezau jo: «Yanɛʔɛrɛ i nyɛ mii ma n kwɔ́ɔ, ni senyɛnnɛ, ki n yɛlɛ mi kòro ní mɔ wóri ní.»

¹⁰ A Zyakɔbi jo: «Eʔe, mii i mɔ nyɛ́ɛri, kapye mɔ n fɔ̀lɔ mii na, ki n yɛlɛ mi mii kpɔ́ʔɔri syɔɔ, níì cán àmɛɛ mii ní mɔ baa woyɛɛ nyaa lè, ki n pye mii ma àmɛɛ syɔɔn Kolocɔlɔɔ yɛ́ɛgi nyaa lè, á mɔ mii fàra ní fundaanra ní.

¹¹ Koro na kpɔ́ʔɔri mii tórigo mɔ ma lè, mii i mɔ nyɛ́ɛri, ki n yɛlɛ mi di syɔɔ. Níì cán Kolocɔlɔɔ n nyɔɔ mii na, a yáriri myɛ i nyɛ mii ma, dee màko wi nyɛ mii na lè.» A Zyakɔbi wári Ezau na, a wi kɔ́ɔ̀ di syɔɔ.

¹² A Ezau Zyakɔbi pye: «Kàwáa wo kólogi láa wo pínɛ waa syée. Mii a kíni mɔ yɛ́ɛgi na.»

¹³ A Zyakɔbi wi yari: «Ni kàfɔlɔ, mɔ n gi cán pìíbèle fànʔa ga nɛʔɛ í, á yaweeyiligēle ní yaweekpologèlē si i nyɛ ní mii ní dee di pìibēle kaangi pe i ŋɔri lè, syɔɔn ga di ŋàʔana a di canʔa nibin tánʔana kpéʔele yaweeyiligèle myɛ a kùu.

¹⁴ Ni kàfɔlɔ, ki n yɛlɛ mi kíni maa syée mɔ falipyew yɛ́ʔɛ na wi lè mii, mii a ra táanri da syée yaweeri kurugo yɛrirɛ bi yɛlɛ ní yaweeri, ní pìíbèle tánʔaganma ní bi taa sa nan mɔ na Seyiiri tári na, ni kàfɔlɔ.»

¹⁵ A Ezau jo: «Mi gi yaʔa mii í mii syɛ́ɛnbèle pèle tíla yaʔa naa ní mɔ ní.» A Zyakɔbi wi yari: «Nyàʔá na mɔ a náa koro kpéʔele? Ki n yɛlɛ mɔ í tɛ́nɛ fɔ̀lɔ mii na, ni kàfɔlɔ.»

¹⁶ A Ezau Seyiiri kólogi láa cángi bee wonijanga n lúru n kári.

¹⁷ Zyakɔbi si na, á woro taʔa n fala n sáà nan Sukɔti na níì kpaʔa faan yaà, ní wɔ́ɔ̀ kpáagéle kpúmɔn yaà yaweeri ma. Koro na be tɛ́ɛgi bee mɛ́ʔɛ le ni gi yiri Sukɔti.

Zyakɔbi n tɛ́ɛn Sisyɛmi taana

¹⁸ Zyakɔbi yìri yaà lè Padan-Arami ma, a wi baa nan Sisyɛmi kěgi na wonyiɔn ní, ki lè Kanaan tári ni. A wi bùguro kpúmɔn n tɛ́ɛn kěgi bee taana.

¹⁹ Tɛ́ɛgee ni wi bùguri kpúmɔn lè, a wi tɛ́ɛgi bee tára syɔɔ Sisyɛmi tóow Hamɔri yòdaʔayi ma, wálifiio támabéle dabata na.

²⁰ A wi sáriga-wòlo-yafanʔa kpéʔele yaà tɛ́ɛgi bee ni níì gi mɛ́ɛgi le ni gi yiri Ɛli-Elowe-Isirayɛli.