Sélimɛ 3 - Cebaara Bible 2010

Nǎnw ní céw nɛnɛ-mí-yirigele Edɛn nángwɔɔw ni

¹ Sìnbirigi yaweere Yawe Kolocɔlɔɔ da sámaga lè, dee bee myɛ ni, wàbigi ki da gbána n sɔ̀lɔ. Koro ki baa céw yíbe níì jo: «Kányɛʔɛ gi lé Kolocɔlɔɔ n jo: ‹Yele a kɔ́ ra nángwɔɔw tiire myɛ yasanra líi í?› »

² A céw wàbigi yari: «Wolo i nángwɔɔw tíire yasanra líi.

³ Kàjáa tíigee gi nyɛ lè nángwɔɔw nínge ni, gee gi koro yasanri kéele kwɔ́ɔ lè, Kolocɔlɔɔ n jo: ‹Yele a kɔ́ gi kàa lìi í. Yele a caa kɔ́ tánga gi kàa na í, kapye koro ban í, yele a kùu.› »

⁴ Lǎli bee ni a wàbigi céw yari: «Yele a kùu nyáana í.

⁵ Ncan Kolocɔlɔɔ n gi cán ncan yele ga tíigi bee yasangaa lìi cángee na lè, yele nyapiigèle a múgu. Yele a pye àmɛɛ Kolocɔlɔɔ nyɛ lè bi kacǎngèle ní kapeegèle cán.»

⁶ A céw gi nyaa tiisangi bee a pye lìijànna, á gi wɔ́ɔ̀ wélemɛ dɛ́nɛ, ní wɔ́ɔ i nyɛ bi gbǎn kérigèle sɛʔɛwelele sícilimɛ kaan syɔɔn ma, a wi fala n ki yasangaa cɔɔ n lìi, níì kàa kaan wi nǎnw ma wi pye yaà ní wi ní lè, a woro wɔ́ɔ̀ gi lìi.

⁷ Lǎli bee ni a pe myɛ siinw nyapiigéle fala n múgu, a be gi cán poro i nyɛ níboribéle, a be fala n děsyaan-wára jɔli tiyɛɛ na n pye fànnanya, n lúgo.

⁸ A ki ga pye cângwɔɔgi nyɔ́ɔ káfalala làrivununɔ ni, a be Yawe Kolocɔlɔɔ yákpoli lóʔo woro wee wi nyaari nángwɔɔw fúngo ni lè. A nǎnw ní wi céw sáà làra Yawe Kolocɔlɔɔ na nángwɔɔw tíire nínge ni.

⁹ A Yawe Kolocɔlɔɔ si nǎnw yeri, níì wi yíbe níì jo: «Sán mɔ nyɛ?»

¹⁰ A nǎnw wi yari: «Mii n mɔ yákpoli lóʔo nángwɔɔw ni, a mii fyáa. Níì cán mii i nyɛ níbori, a mii si baa làra.»

¹¹ A Yawe Kolocɔlɔɔ si wi yíbe níì jo: «Wìí wi gi joo mɔ ma níì mɔ pye mɔ i nyɛ níbori? Tíigee yasanra mii da jo lè mɔ a kɔ́ lìi í, a mɔ tɔ̀ʔɔ̂ gi kàa lìi lé?»

¹² A nǎnw jo: «Céwee mɔ kaan mii ma wi pye mii pínɛnyɛnnɛ lè, woro wi tíigi bee yasangaa kaan mii ma a mii lìi.»

¹³ Lǎli bee ni a Yawe Kolocɔlɔɔ gi joo céw ma níì jo: «Nyàʔá na mɔ gee bee kpéʔele?» A céw jo: «Wàbigi gi mii fáana n pùuni a mii gi kàa lìi.»

¹⁴ Lǎli bee ni a Yawe Kolocɔlɔɔ gi joo wàbigi ma níì jo: «Amɛɛ mɔ gee naa kpéʔele lè, koro na mii n mɔ dánga n sɔ̀lɔ kěgi yaweere myɛ ní sìnbirigi yaweere myɛ na. Mɔ a ra fulolo mɔ fícɛnni na, sáā támiigi líi mɔ sìíw canya myɛ ni.

¹⁵ Mii a nigooro lége mɔ ní céw nínge ni, si wɔ́ɔ di lége céw yòdaʔaga ní mɔ wógi nínge ni. Céw yòdaʔaga a mɔ nyúngi tɔ́nʔɔnɔ, Mɔ si a wi nɔn yédeleeli na.»

¹⁶ A wi gi joo céw ma níì jo: «Mii a ceseegi wɔʔɔgɔ gbàn mɔ na gbanʔama. Mɔ a ra wɔʔɔ fícɛnni yáala báriga ni. Mɔ sɔnguri a ra mɔ kíle mɔ nanw kàbaan na, woro si pye mɔ nyúngi na.»

¹⁷ A wi gi joo nǎnw ma níì jo: «Tíigee kéele mii da joo lè níì jo mɔ a kɔ́ gi yasangaa lìi í, àmɛɛ mɔ baa mɔ céw syɛ́ɛnrɛ lóʔo lè níì gi kàa lìi. Koro na tári n dánga mɔ kapeeli kéele na. Mɔ a ra wɔʔɔ gbanʔama si náa ra yaliire taagi di ni mɔ siiw canya myɛ ni.

¹⁸ Wúuro ní solovinge a wɔ́ɔ ra fíin di na mɔ ma. Séyi yafálara ti a pye mɔ yaliiri.

¹⁹ Mɔ yɛ́ɛcɔɔli kakpege na mɔ a ra líi fwɔɔ bi taa mɔ í ba lúru jée tári ni, beè mɔ yirige lè. Níì cán mɔ i nyɛ támiige, támiigi si ni mɔ a lúru jée.»

²⁰ A nǎnw wi céw mɛ́ʔɛ le ni wi yiri Ɛvi, níì cán woro wi pye niweebèle myɛ nɔ́ɔ.

²¹ A Yawe Kolocɔlɔɔ saliga búroyo sámaga nǎnw ní wi céw ma n le be na.

²² A Yawe Kolocɔlɔɔ jo: «Wéle, tɔ́ɔliw ni syɔɔn n kàri n pye àmɛɛ wolo wàa nyɛ lè n kacǎngèle ní kapeegèle cán. Ki si n yɛlɛ wo wi yérige wi a kɔ́ wi kɔ́gi sánʔa bi wɔ́ɔ sìíw tíige yasangaa cɔɔ bi lìi si kòro beè sìi na làla o làla í.»

²³ Koro na Yawe Kolocɔlɔɔ syɔɔn nɛnɛ n yirige Edɛn nángwɔɔw ni, koro ga pye táree ni wi yirige lè, wi sa ra dee bee fála.

²⁴ A wi ga syɔɔn nɛnɛ n yirige n kwɔ́ɔ Edɛn nángwɔɔw ni, a wi syerubɛnbèle télege yaà nángwɔɔw ni canʔafolomɔ ma, n fàra naanyìnge ŋɔsée na, a woro i nyaari kàbanyi myɛ na ni sìíw tiige kpáa wéle.