Sélimɛ 29 - Cebaara Bible 2010

Zyakɔbi n Arasyɛli fàra n nyaa

¹ A Zyakɔbi níì kólogi láa ni syée canʔafolomɔ kabangi syɛ̀ɛnnɛ tára ma.

² A wi sáà yiri kɔ̀lɔ́ na sìnbirigi ni. Yaweeyiligēle gboogéle taanri si i nyɛ wi taana wozinɛgéle ní. Níì cán kɔ̀lɔ́w bee na pe da ni yaweeri kaangi a ti i gbo. Kàdɛnɛgee si pe da tɛ́ʔɛ n kɔ̀lɔ́w tɔ́n lè, ki maa kpɔ́ʔɔ.

³ Yaweeri myɛ ga tiyɛɛ gbóʔoro yaà lǎli ni lè, pe n náà kàdɛnɛgi kòlogo n láʔa kɔ̀lɔ́w na, si yaweeri kaan ti n gbaa. Koro kàdoʔo ma pe n níì kàdɛnɛgi lúrugo n tɔ́n kɔ̀lɔ́w nyɔ́ɔ na.

⁴ A Zyakɔbi si bànaʔabèle yíbe níì jo: «Ni senyɛ̀nnɛ sán yele yìri?» A be jo: «Karan ma.»

⁵ A wi be pye: «A yele Nahɔri jáaw Laban cán lé?» A be jo: «Ɛɛn, wolo n wi cán.»

⁶ A wi níì be pye: «A wi cólogo lé?» A be jo: «Wi n tɔ̀nɔ n cólogo. Wi calipili li lè Arasyɛli, woro wi caa maa yaà wee ní wi yaweeyiligèle ní.»

⁷ A wi jo: «Wéle, cángi sèʔé i nyɛ ǹjoʔo ni, yaweeri làrigboʔorolo ban li nyɛ lee naa í. Ki n yɛlɛ ye di kaan ti gbaa yé di kɔ́ri ye sa ra nàʔá.»

⁸ A be jo: «Wolo fánʔa a taa í, fwɔɔ yaweeri gboogéle myɛ í kpóʔoro naa pé kàdɛnɛgi kòlogo bi láʔa kɔ̀lɔ́w na. Lǎli bee ni wolo si náa yaweeri kaan ti gbaa.»

⁹ N Zyakɔbi yaʔa jooli na ní be ní, a Arasyɛli kàri n nan ní wi tóow bàala ní. Níì cán wi maa pye bànaʔacaa.

¹⁰ Lǎli ni Zyakɔbi wi syɛɛnlɛɛw Laban pìíw nyaa lè wi lè Arasyɛli, ní wɔ́ɔ̀ wi nɔ́ɔw senyɛnnɛ Laban yaweeyiligèle nyaa, a wi fala n nùuni kɔ̀lɔ́w na n kàdɛnɛgi kòlogo n láʔa wi nyɔ́ɔgi na, níì Laban yaweeyiligèle kaan a ge gbaa.

¹¹ Koro kàdoʔo ma a Zyakɔbi Arasyɛli syɔɔnri syɔɔnri, níì fala ni nyaan ni yígi.

¹² A Zyakɔbi gi joo Arasyɛli ma níì wi pye woro i nyɛ wi tóow syɔ́ɔnwaa, ncan woro i nyɛ Erebeka pyà. A Arasyɛli fala n fàn n kári n sáà gee bee joo wi tóow ma.

¹³ Lǎli ni Laban tɛ́nɛ̀ wi cɔnɔw pyà Zyakɔbi panni kéele lóʔo lè, a wi fala n fàn n kári n sáà wi fàra, níì wi wáa n mígi níì wi syɔɔnri syɔɔnri níì wi kɔ́ri n kári woro kpaʔa ma. Gee myɛ gi Zyakɔbi taa lè, a wi gi joo n tɛ̀ɛn Laban na.

¹⁴ A Laban jo: «Mɔ tɔ̀nɔ́ i nyɛ mii kacelegaa, ní mii céri tɛ́ɛgaa.» A Zyakɔbi yebogo nibin kwɔ́ɔ Laban tɛ́ɛgi ni.

Zyakɔbi n Laban pìíbèle siin pɔri

¹⁵ Cangaa a Laban gi joo Zyakɔbi ma níì jo: «Amɛɛ mɔ nyɛ lè mii syɔ́ɔn, a koro yɛlɛ lé bi mɔ yaʔa mɔ í da báara mii ma kawaʔa na? Ki n yɛlɛ mɔ í gi tɛ̀ɛn gee gi yɛlɛ lè bi pye mɔ saraw.»

¹⁶ Calipiigèlē siin si maa pye Laban ma, pe maa ni calipiilɛɛli yiri Leya, ní i cɔnɔvɔw yiri Arasyɛli.

¹⁷ Leya nyapiigèle si maa lága, á Arasyɛli si tɔ̀nɔ n nyɔɔ cere na.

¹⁸ Arasyɛli kéeli maa tɔ̀nɔ n Zyakɔbi dɛ́nɛ, a wi gi joo Laban ma níì jo: «Mii a báara mɔ ma yɛ̀ʔɛlɛ kɔrɔsiin Arasyɛli kéeli na, wi lè mɔ calipiisanni.»

¹⁹ A Laban jo: «Mii ga wi kaan mɔ ma koro gi mii dɛ́nɛ n sɔ̀lɔ mii n wi kaan nànwaa nikwɔɔ ma na. Ki n yɛlɛ mi kòro naa mii tɛ́ɛgi ni.»

²⁰ Koro na Zyakɔbi báara yɛ̀ʔɛlɛ kɔrɔsiin Arasyɛli kéeli na. Amɛɛ si Arasyɛli kéeli da tɔ̀nɔ n Zyakɔbi dɛ́nɛ lè, a yɛ́ɛgèle bee kɔrɔsiin pye wi nyɛ́nɛ na mɔ a jo canya cɛɛri wii.

²¹ Koro kàdoʔo ma a Zyakɔbi gi joo Laban ma níì jo: «Ki n yɛlɛ mi mii céw kaan mii ma. Níì cán mii lǎli n foro, mii i caa bi pye ní wi ní.»

²² A Laban tɛ́ɛgi bee syɛ̀ɛnnɛ myɛ yeri n kpóʔoro níì lìigbɔɔlɔ sámaga.

²³ Kàjáa a cángi ga kwɔ́ɔ, a Laban kári ní Leya ní Zyakɔbi tɛ́ʔɛ ma, a Zyakɔbi sáà pye ní wi ní.

²⁴ Laban si maa wi falipyecew Zilipa kaan wi pìíw Leya ma wi pye wi falipyecɔɔ̀.

²⁵ A ki ga pye nyǐngi nyɔ́ɔ na, a Zyakɔbi gi nyaa Leya be kaan woro ma. A wi Laban pye: «Nyàʔá mɔ pye gee mii na? Arasyɛli kéeli na ban mii báara mɔ ma ì? Nyàʔá na mɔ mii jànváa?»

²⁶ A Laban jo: «Bi cɔnɔvɔw kaan kɔ̀rɔfɔw yɛ́ʔɛ na, koro o kpéʔele naa wolo ma í.

²⁷ Ki n yɛlɛ mi cégbooli naa foro ní wee ní. Wolo a wɔ́ɔ wee kaan mɔ ma, mɔ si ní yɛ́ɛgèle kèle kɔrɔsiin báara mii ma wi kéeli na.»

²⁸ A Zyakɔbi fɔ̀lɔ gee bee na, níì cégbooli foro ní Leya ní. Koro kàdoʔo ma a Laban wi pìíw Arasyɛli kaan wi ma wi pye wi cɔɔ̀.

²⁹ A Laban wi falipyecew Biiliha kaan wi pìíw Arasyɛli ma wi pye wi falipyecɔɔ̀.

³⁰ A Zyakɔbi wɔ́ɔ̀ pye ní Arasyɛli ní. A Arasyɛli kéeli wi dɛ́nɛ n sɔ̀lɔ Leya wóli na. A Zyakɔbi níì yɛ́ɛgèle kèle kɔrɔsiin báara Laban ma.

Zyakɔbi pìíbèle kéele

³¹ A Yawe ga gi nyaa Leya kéeli ga Zyakɔbi dɛ́nɛ í, a wi wi ceseegi múgu, á Arasyɛli si pye cenaa-sìnzeeo.

³² A Leya fícɛnnɛ taa n pyà see nàɔn, a wi wi mɛ́ɛgi le ni wi yiri Wurubɛn. Ncan wi maa jo: «Yawe n mii faʔari nyaa. Tɔ́ɔliw ni, mii kéeli a mii nǎnw dɛ́nɛ.»

³³ A wi níì fícɛnnaa taa n pyà see nàɔn. A wi jo: «Yawe n gi cán mii kéeli ga mii nǎnw dɛ́nɛ í, koro na wi níì pìíw naa kaan mii ma.» A wi pìíw bee mɛ́ʔɛ le ni wi yiri Simeyɔn.

³⁴ A wi níì fícɛnnaa taa n pìiwaa see nàɔn. A wi jo: «Kátali naa na, mii nǎnw a tɔ̀nɔ́ tan mii na, níì cán mii n nànbiigéle taanri see wi ma.» Koro na be pìíw bee mɛ́ʔɛ le ni wi yiri Levii.

³⁵ A wi níì fícɛnnaa taa n pyà see nàɔn. A wi jo: «Kátali naa na, mii a ra Yawe kpɔ̀ʔɔrɔ́.» Koro na wi pìíw bee mɛ́ʔɛ le ni wi yiri Zyuda. Lǎli bee ni a wi láʔa pìiseeri na.