Sélimɛ 25 - Cebaara Bible 2010

Abirahami kùúw ní wi yòdaʔayee wozanya

¹ Abirahami maa níì cewaa nikwɔɔ láa, pe i wi yiri Ketura.

² A Ketura pìíbèle naa see Abirahami ma, poro be nyɛ Zimiran, ní Yokisyan, ní Medan, ní Madyan, ní Yisyibaki, ní Syuwa.

³ A Yokisyan Saba ní Dedan see. Dedan yòdaʔayi si yi nyɛ Asyuri ye, ní Letusyi ye, ní Lewumi ye.

⁴ Madyan jáabèle si i nyɛ Efa, ní Efɛɛri, ní Henɔki, ní Abida, ní Ɛlidaa. Bele bee myɛ be pye Ketura yòdaʔayi.

⁵ Abirahami maa wi kɔlɔ̀ yáriri myɛ kaan Izaaki ma.

⁶ Gee si gi pìíbèle bele kéele kwɔ́ɔ lè, bele Abirahami da see cébèle bele na pe da pye lè wi cefàra-mí-láabèle, wi maa yakaanraa kaan bele bee ma wi wéemi làla ni, níì be léeli Izaaki na, a be sáà tɛ́ɛn canʔafolomɔ kabangi tára ni.

⁷ Abirahami sìíw yɛ̀ʔɛlɛ myɛ nyɔ́ɔ n pye togoye kɔrɔtaanri ní kpɔrigɔ ní kagunɔ, á wi kùu.

⁸ Abirahami fundaanratɔw maa tɔ̀nɔ n lɛɛ n tín níì kùu n fàra wi toolɛɛbèle na pe da kùu lè.

⁹ Wi pìíbèle be lè Izaaki ní Isimayɛli, a poro sáà wi tɔ́n Makpela nyanbeweegi ni. Ki maa pye Efurɔn ségi ni, Efurɔn wi lè Sohari jáaw, Sohari wi lè Hɛti yòdaʔagaa. Tɛ́ɛgi bee maa pye Mamire zǐnmi na.

¹⁰ Abirahami maa ségi bee syɔɔ lɔrɔ na Hɛti yòdaʔayi ma. A be Abirahami tɔ́n yaà beè n fàra wi céw Sara na.

¹¹ Abirahami kùúli kàdoʔo ma, a Kolocɔlɔɔ dùbaw taʔa Izaaki na. Izaaki maa sáà kòro Lahayi-Woroyi kɔ̀lɔ́w taana.

¹² Abirahami pìíw Isimayɛli yòdaʔayi yi yee naa: Sara pulocew Agari, wi da pye lè Ezyipiti ye wów, woro wi da pìíw bee see Abirahami ma.

¹³ Isimayɛli pìíbèle mɛ́ɛyɛ yi nyɛ yee naa n yɛlɛ ní gi ní àmɛɛ be taʔala peyɛɛ na lè seeli ni. Wi pìiseliw pe da ni yiri Nɛbayɔti, á Kedaari taʔa, á Adibeyɛli taʔa, á Mibisami taʔa,

¹⁴ á Misyima taʔa, á Duma taʔa, á Masa taʔa,

¹⁵ á Hadadi taʔa, á Tema taʔa, á Yeturi taʔa, á Nafiisyi taʔa, á Kedima taʔa.

¹⁶ Bele bee be pye Isimayɛli pìíbèle. Pe mɛ́ɛyi si wɔ́ɔ i nyɛ yoro. A be pye fànʔafɔbiigéle kɛɛ ní siin n yɛlɛ ní be syɛɛnfeleyi kánma ní. Pe maa be mɛ́ɛyi le be kěyi ní be tɛ́nɛmi vòyo na.

¹⁷ Isimayɛli sìíw yɛ̀ʔɛlɛ myɛ nyɔ́ɔ n pye togoye kɔrɔni ní kpɔrigɔ ní kɔrɔsiin, á wi kùu n fàra wi toolɛɛbèle na pe da kùu lè.

¹⁸ A Isimayɛli yòdaʔayi tɛ́ɛn tɛ́nɛmee ni bi nyɛ lè Havila, ní Syuri níngi ni. Syuri i nyɛ Ezyipiti taana Asirii tári kàbaan na. A Isimayɛli yòdaʔayi tɛ́ɛn n yɛʔɛ̀ wáa yi senyɛnbèle bele myɛ ma pe wɔ́ɔ̄ nyɛ lè Abirahami pìibēle.

ZYAKƆBI Ezau ní Zyakɔbi kéeli

¹⁹ Abirahami jáaw Izaaki yòdaʔayi yi nyɛ yee naa: Abirahami wi Izaaki see.

²⁰ Izaaki maa taa yɛ̀ʔɛlɛ togoye siin lǎli ni wi Erebeka láa lè wi cɔɔ̀, Erebeka wi lè Betuwɛli pìíw, Betuwɛli wi lè Arameyɛnw, ní i nyɛ Padan-Arami ye wóo. Erebeka yɛʔɛfɔw wi da pye Laban, wi lè Arameyɛnw.

²¹ A Izaaki Yawe nyɛ́ɛri gbanʔama wi céw kéele na, níì cán wi maa pye cenaa-sìnzeeo. A Yawe wi nyɛ́ɛrigbɔɔgi lóʔo, a wi céw Erebeka yére ŋǎnbéle fícɛnnɛ na.

²² N pìíbèle yaʔa pe nɔ́ɔw láʔa ni, a be i peyɛɛ cínɛ yaà. A Erebeka jo: «Ki ga pye nya, nyàʔá na mii yére fícɛnnɛ na?» A wi kári n sáà Yawe yíbe.

²³ A Yawe wi yari: «Syɛɛnfeleye siin yi nyɛ mɔ fícɛnni ni, mɔ a syɛɛnfeleye siin see. Syɛɛnfeleyi bee a ba wàli bi láʔa yiyɛɛ na. Syɛɛnfelegaa nibin fànʔa a ba kpɔ́ʔɔ bi sɔ̀lɔ kàa wóʔo na. Yɛʔɛfɔw a ba wiyɛɛ gaan cɔnɔvɔw ma.»

²⁴ Lǎli ni Erebeka làrizeeli baa nan lè, a be gi nyaa ncan ŋǎnbéle fícɛnnɛ li nyɛ wi na.

²⁵ A wozeliw yiri wonyɛɛɔn ní. Wi céri myɛ si i nyɛ mɔ a jo síire búrogo gii. A be wi mɛ́ɛgi le ni wi yiri Ezau.

²⁶ A wi senyɛnw náà yiri. Wi si maa Ezau cò yédeleeli na. A be wee bee mɛ́ʔɛ le ni wi yiri Zyakɔbi. Lǎli ni Erebeka be see lè, Izaaki maa taa lǎli bee ni yɛ̀ʔɛlɛ togoye taanri.

²⁷ A pìíbèle bee baa lɛɛ. A Ezau pye tòzoo-sícilio, wee senyaariri da dɛ́nɛ lè cama ni. A Zyakɔbi si pye syɛɛnnyíɔn, fànikpaayi kòrofɔwaa wi da pye.

²⁸ Ezau kéeli maa Izaaki dɛ́nɛ, níì cán Ezau seʔe káari tàanma maa wi nyúngi cò, á Zyakɔbi kéeli si Erebeka dɛ́nɛ.

²⁹ Cangaa Zyakɔbi maa jàʔala sɔʔɔ. A Ezau yìri sìnbirigi ni n lúru n pan. Wi maa tɔ̀nɔ n fɔ̀rɔ gbanʔama.

³⁰ A wi Zyakɔbi pye: «Jànyɛɛnri bee tàa kaan mii ma mii í lìi, níì cán mii fǎngi n tɔ̀nɔ n kwɔ́ɔ.» Koro na pe wi mɛ́ɛgi le ni wi yiri Edɔmi.

³¹ A Zyakɔbi wi yari: «Ki n yɛlɛ mi mɔ lɛ́ɛgi tɔ̀nɔ pára mii ma níjanʔa.»

³² A wi Zyakɔbi yari: «Kateegi gi syée sa mii kpóo wee, nyàʔá lɛʔɛ tɔ̀nɔw bee a nyɔɔ mii na?»

³³ A Zyakɔbi wi pye: «Ki n yɛlɛ mi kàli mii ma gbɛnʔɛnɛ.» A Ezau kàli wi ma níì wi lɛ́ɛgi tɔ̀nɔ pára wi ma.

³⁴ Lǎli bee ni a Zyakɔbi búru ní jàsɔ̄ʔɔraa kaan Ezau ma, a wi lìi níì gbaa. Níì yìri n kári. Kánmi bee na Ezau lɛ́ɛgi tɔ̀nɔ faʔa.