Sélimɛ 2 - Cebaara Bible 2010

¹ Kánmi bee na Kolocɔlɔɔ kwɔ́ɔ nyɛ̀ʔɛni, ní tári, ní di yáriri myɛ faanna na.

² Amɛɛ Kolocɔlɔɔ kwɔ́ɔ yáriri myɛ faanna na lè, a ki ga pye canya kɔrɔsiin wógi na, a wi ŋɔ́n n daa fáliw myɛ na wi kpéʔele lè.

³ A Kolocɔlɔɔ si dùbaw taʔa canya kɔrɔsiin wógi na, níì gi sámaga n yaʔa wiyɛɛ ma, ncan cángi bee ni wi ŋɔ́n n daa fáliw myɛ na wi kpéʔele lè dulunyanw faanna na.

⁴ Kánmi bee na nyɛ̀ʔɛni ní tári sélimɛ da pye lǎli ni di faan lè. Lǎli ni Yawe Kolocɔlɔɔ tári ní nyɛ̀ʔɛni faan n kwɔ́ɔ lè,

Edɛn nángwɔɔw kéele

⁵ sìnbirigi tiipiigaa faala da kɔ́ɔ̀ fìin tári na í, nyàā faala da wɔ́ɔ kɔ́ɔ̀ fìin í. Níì cán Yawe Kolocɔlɔɔ da kɔ́ɔ̀ zàʔá cáan tári na í. Syɔɔn da wɔ́ɔ̀ pye yaà bàā tári fála í.

⁶ Kàjáa lɔ̀ʔɔ ki da ni yirigi tári ni ni tári myɛ fɔɔnri.

⁷ A Yawe Kolocɔlɔɔ syɔɔn sámaga ní támiigi ní, níì ŋɔ́ngari le wi fínaagèle ni ní wi tiimaa nyɔ́ɔgi káfalaga ní, a syɔɔn fala n pye sìi na.

⁸ Koro kàdoʔo ma a Yawe Kolocɔlɔɔ nángwɔɔ kɔligɔ sámaga Edɛn ni, canʔafolomɔ ma. Nǎnwee wi sámaga lè, a wi wee bee télege nángwɔɔw bee ni.

⁹ Tiige o tiige gi nyɔɔ lè, ki yasanri si wɔ́ɔ i nyɛ lìijànna, a Yawe Kolocɔlɔɔ dee bee féleye myɛ yaʔa a di fìin n yiri tári na. Sìíw tíige maa wɔ́ɔ̀ pye nángwɔɔw nínge ni n fàra kacànna ní kapeele cánna tíige na.

¹⁰ Cábiga maa ni fóo ni yirigi Edɛn ni n ba ni nángwɔɔw fɔɔnri, ní baa wálagi yaà beè n pye tɛɛyɛ sicɛrɛ.

¹¹ Cábiseligi mɛ́ʔɛ pe yiri Pisyɔn. Koro gi Havila tári myɛ máari. Tɛ́ɛw i nyɛ tári bee ni.

¹² Tɛ́ɛw bee i nyɛ wojandeleo, n fàra nùndaanni yáriga na pe yiri lè bideliyɔmi, n wɔ́ɔ̀ fàra onikisi kàdɛɛngèle na.

¹³ Cábisiin wógi mɛ́ʔɛ si i nyɛ Giyɔn. Koro gi Kusyi tári myɛ máari.

¹⁴ Cábitaanri wógi mɛ́ʔɛ si i nyɛ Tiigiri. Koro gi fóo ni syée Asirii canʔafolomɔ kabangi na. Cábiyi sicɛrɛ wóʔo si i nyɛ Ufurati.

¹⁵ A Yawe Kolocɔlɔɔ nǎnw láa n sáà télege Edɛn nángwɔɔw ni waa wi fála, sáā wi kpáaw wéle.

¹⁶ A Yawe Kolocɔlɔɔ syɛ́ɛnri naa joo n gbàn nǎnw ma níì wi pye: «Tíiree myɛ di nyɛ nángwɔɔw ni lè, mɔ a gbǎn ra di yasanri líi.

¹⁷ Kàjáa mɔ a kɔ́ kacǎnni ní kapeeli cánna tíige yasangaa lìi í. Mɔ ga gi kàa lìi cángee na lè, mɔ a kùu dɛ.»

¹⁸ A Yawe Kolocɔlɔɔ jo: «Nǎnw ga yɛlɛ wi kòro nya wi nibin í. Mii a dɛ̀ɛmɛfɔlɔ sámaga bi kaan wi ma, wi pye wi pínɛnyɛnnɛ.»

¹⁹ A Yawe Kolocɔlɔɔ tári tɛ́ʔɛ n sìnbirigi yaweere féleye myɛ, ní féjɛɛnri féleye myɛ sámaga n pan ní di ní nǎnw ma, si gi wéle kánmee na wi a ra di mɛ́ɛyi yiri lè. Mɛ́ʔɛ o mɛ́ʔɛ nǎnw ga le gi kàa na lè, gee bee í kòro gi mɛ́ɛgi.

²⁰ A nǎnw kěgi yaweere, ní féjɛɛnri, ní sìnbirigi yaweere myɛ mɛ́ɛyɛ le di na, kàjáa nǎnw ga wàa taa wiyɛɛ félege, wee wi a ra woro dɛ̀ɛmɛ́ lè í.

²¹ Lǎli bee ni a Yawe Kolocɔlɔɔ ŋúnɔgbɔɔmɔ cáan nǎnw na, a wi ŋúnɔ. A wi nǎnw kótiigaa nibin wòlo, níì céri lúrugo n tɔ́n di tɛ́ɛgi ni.

²² Kótiigee Yawe Kolocɔlɔɔ da wòlo lè nǎnw ni, a wi gee bee sámaga cɔlɔɔ n pan ní wi ní nǎnw ma.

²³ A nǎnw jo: «Tɔ́ɔliw ni wee naa i nyɛ mii kacelegaa, wi i nyɛ mii céri tɛ́ɛgaa. Pe a ra wi yiri cɔlɔɔ, níì cán wi n yiri nàɔn ni.»

²⁴ Gee bee na nàɔn a wi tóow ní wi nɔ́ɔw yaʔa si tan wi céw na, pe a ba pye cere nibin.

²⁵ Nǎnw ní wi céw, pe myɛ siinw maa pye níboribéle, pe si da fɛ̀ɛrɛ cán í.