Sélimɛ 17 - Cebaara Bible 2010

Kɛ́nɛw kpéʔelele joogaanna

¹ Lǎli ni Abirami taa lè yɛ̀ʔɛlɛ dabata nibin fɔ̀n, a Yawe wiyɛɛ dɛ̀ɛn wi na níì wi pye: «Mii wi nyɛ Kolocɔlɔɔ, wee wi nyɛ lè Séew Myɛ Kàfɔlɔ. Ki n yɛlɛ mi kòro maa táanri mii yɛ́ʔɛ ma mí pye dìgire fun.

² Mii a mii joogaanni yaʔa li pye mii ní mɔ níngi ni, si tɔ̀nɔ́ mɔ kpéʔele syɛɛnnɛʔɛmɛ.»

³ A Abirami too n yɛ́ɛgi cíbele tári na. A Kolocɔlɔɔ níì wi yari:

⁴ «Wéle, mii n tɔ̀nɔ n mii joogaanni kpéʔele ní mɔ ní. Mɔ a tɔ̀nɔ́ ba pye syɛɛnfele-nɛʔɛyɛ tóo.

⁵ Pe a ní da mɔ yiri Abirami í, fwɔɔ pe a ra mɔ yiri Abirahami. Níì cán mii n mɔ kpéʔele mɔ í pye syɛɛnfele-nɛʔɛyɛ tóo.

⁶ Mii a gi yaʔa mɔ piibèle í tɔ̀nɔ́ nɛʔɛ, bi pye syɛɛnfeleyaa, àlí fànʔafɔɔlɔ a yiri mɔ ni.

⁷ Mii a mii joogaanni yaʔa li kòro mii ní mɔ níngi ni, si wɔ́ɔ ba kòro mii ní mɔ yodaʔayi nínge ni mɔ kadoʔo ma. Li a kòro mii ní be làrigèle myɛ syɛ̀ɛnnɛ nínge ni bàā syée yaà làla o làla. Kánmi bee na mii a pye mɔ Kolocɔlɔw, si wɔ́ɔ ba pye mɔ yodaʔayi Kolocɔlɔɔ mɔ kadoʔo ma.

⁸ Kanaan tári ni mɔ tɛ́ɛn lè dee n pye nibɔɔn, mii a ti myɛ kaan mɔ ní mɔ yodaʔayi ma, ti a pye mɔ yodaʔayi wóro làla o làla. Mii si pye be Kolocɔlɔw.»

⁹ A Kolocɔlɔɔ gi joo Abirahami ma níì wi pye: «Mɔ si na, n fàra mɔ yodaʔayi na, yi a ra yìrigí mɔ kadoʔo ma lè, yi yìrigèle làrigēle myɛ syɛ̀ɛnnɛ ni, ki n yɛlɛ ye mii joogaanni syɛ́ɛnrɛ cò.

¹⁰ Wéle, kánmee na yele a joogaanni cò, lee mii kpéʔele ní yele ní lè, mɔ ní mɔ yodaʔayi ní, mɔ kadoʔo ma, koro gi nyɛ, bele myɛ be nyɛ lè nǎnbèle yele níngi ni, ki n yɛlɛ be kɛ́nɛw kpéʔele.

¹¹ Yele a ra kɛ́nɛw kpéʔele koro í pye joogaanni fɛ̀ɛ, li nyɛ mii ní yele níngi ni lè.

¹² Nànbile o nànbile ga see yele níngi ni, ki n yɛlɛ li kɛ́nɛ canya kɔrɔtaanri wógi na. Anbée ki a ra kpéʔele yele yìrigèle myɛ syɛ̀ɛnnɛ ma, a wi see mɔ kpáagi ni yoo, a gi náà pye pulowaa wi lè wi o nyɛ mɔ yodaʔaga í, á mɔ wi syɔɔ táraa wóo ma wáli na yoo.

¹³ Syɔ́ɔnwee be see mɔ kpáagi ni lè, ní púlowee mɔ syɔɔ wáli na lè, ki n yɛlɛ pe myɛ í kɛ́nɛw kpéʔele koro ga pye mii joogaanni fɛ̀ɛ í pye yele céri ni làla o làla.

¹⁴ Nàɔn o nàɔn ga pye wi ga kɛ́nɛw kpéʔele í, wee bee a kwɔ́ɔ yirige wi syɛ́ɛnbèle nínge ni àmɛɛ wi mii joogaanni kálagi lè.»

¹⁵ A Kolocɔlɔɔ níì gi joo Abirahami ma níì wi pye: «Mɔ céw Sarayi si na, mɔ a ní da wi yiri Sarayi í, fwɔɔ wi mɛ́ɛgi a pye Sara.

¹⁶ Mii a dùbaw taʔa wi na si wɔ́ɔ nànbile kaan mɔ ma wi bárigaw ni. Mii a dùbaw taʔa wi na, wi a ba pye syɛɛnfeleyaa nɔ́ɔ. Syɛɛnfeleyaa fànʔafɔɔlɔ a yiri wi ni.»

¹⁷ A Abirahami too n yɛ́ɛgi cíbele tári na ní i gi tɛ́ʔɛ. Níì gi joo wiyɛɛ fúngi ni níì jo: «Nàɔn í yɛ̀ʔɛlɛ dabata taa lé si ní gbǎn pyà see? Ba Sara wi yɛ̀ʔɛlɛ togoye sicɛrɛ ní kpɔrigɔ taa lè, woro í gbǎn pyà see lé?»

¹⁸ A wi gi joo Kolocɔlɔɔ ma lǎli bee ni níì jo: «Ee! Ki n yɛlɛ Isimayɛli í tɛ́nɛ kòro beè sìi na mɔ yɛ́ʔɛ ma.»

¹⁹ A Kolocɔlɔɔ jo: «Ɛɛn, mɔ céw Sara si a nànbile see mɔ ma, mɔ a ra wi yiri Izaaki. Mii a mii joogaanni yaʔa li kòro wi ma, ní wi yòdaʔayi ma wi kàdoʔo ma li pye bàngwɔɔ joogaanna.

²⁰ Gee si mɔ joo Isimayɛli kéeli na lè, mii n gi lóʔo. Mii a dùbaw taʔa wi na. Mii a wi yaʔa wi tɔ̀nɔ́ see saʔa bi wi kpéʔele syɛɛnnɛʔɛmɛ. Wi a fànʔafɔbiigéle kɛɛ ní siin see. Mii a wi kpéʔele syɛɛnfelege, gee ki a tɔ̀nɔ́ nɛʔɛ lè.

²¹ Gee si gi mii joogaanni kéele kwɔ́ɔ lè, Izaaki ní mii a li sogi, woro wee Sara a see mɔ ma lè yɛɛláa níbeena nyɔʔɔmɔ na.»

²² Lǎli ni Kolocɔlɔɔ syɛ́ɛnri bee joo n kwɔ́ɔ Abirahami ma lè, a wi núngo Abirahami taana n lúru n lúgu.

²³ A Abirahami fala n wi pìíw Isimayɛli kɛ́nɛ n fàra bele myɛ na be see wi kpáagi ni lè, ní bele myɛ wi syɔɔ wáli na lè, gee bee n jo nàɔn o nàɔn wi pye wi kpáagi ni lè. A wi bele bee kɛ́nɛ cángi bee wonijanga n yɛlɛ ní gi ní àmɛɛ Kolocɔlɔɔ da gi joo wi ma lè.

²⁴ Abirahami maa taa yɛ̀ʔɛlɛ dabata nibin fɔ̀n lǎli ni wi kɛ́nɛw kpéʔele lè,

²⁵ á Isimayɛli taa yɛ̀ʔɛlɛ kɛɛ ní taanri lǎli ni wi kɛ́nɛw kpéʔele lè.

²⁶ Cángi bee wonijanga Abirahami ní wi jáaw Isimayɛli kɛ́nɛw pínɛ n kpéʔele,

²⁷ n fàra wi kpáagi nànbēle myɛ na be see wi kpáagi ni lè, ní bele wi syɔɔ wáli na lè táraa nikwɔɔ wòolo ma.