Sélimɛ 16 - Cebaara Bible 2010

Isimayɛli seeli kéele

¹ Abirami céw Sarayi da pyà see wi ma í. Pulocewaa si maa pye Sarayi ma, Ezyipiti ye wóo, pe i wi yiri Agari.

² A Sarayi gi joo Abirami ma níì jo: «Wéle, àmɛɛ Yawe mii kún pìiseeri na lè, koro na ki n yɛlɛ mi sínɛ ní mii pulocew ní. Dɔ̀ʔɔ́ mii a nànbile taa wi bárigaw ni.» A Abirami fɔ̀lɔ Sarayi syɛ́ɛnri na.

³ Lǎli bee ni a Sarayi wi pulocew Agari cò wi lè Ezyipiti ye wów n kaan wi nǎnw Abirami ma wi pye wi cɔɔ̀. Abirami si maa yɛ̀ʔɛlɛ kɛɛ taa n kwɔ́ɔ Kanaan tári ni.

⁴ A Abirami sínɛ ní Agari ní, a wi fícɛnnɛ taa. Lǎli ni Agari gi nyaa woro i nyɛ ní fícɛnnɛ ní lè, a wi kàfɔjew fala n pye wi nyɛnɛ na yafaʔala.

⁵ A Sarayi fala n gi joo Abirami ma níì jo: «Mɔ na mii faʔari yɛlɛ di kòro. Ncan mii tiimaa wi mii pulocew sínɛgɛ mɔ láari ni, a wi ga gi nyaa woro i nyɛ ní fícɛnnɛ ní, a wi i mii córo yafaʔala. Yawe wi yɛlɛ bi pye kútiiceriw mii ní mɔ níngi ní.»

⁶ A Abirami gi joo Sarayi ma níì jo: «Mɔ pulocew wi wee mɔ kɔ́yi ni. Gee ga mɔ dɛ́nɛ lè, ki n yɛlɛ maa koro kpéʔele wi na.» Lǎli bee ni a Sarayi fala ni Agari kàragí ní fungbanga ní, a Agari fàn.

⁷ A Yawe nyɛ̀ʔɛni tunduɔn sáà wi nyaa pùnweelaa nyɔ́ɔ na fìími tára ni. Pùnweeli bee li nyɛ lè Syuri kólogi na.

⁸ A wi wi yíbe níì jo: «Agari, mɔ wi lè Sarayi pulocew, sán mɔ yìri, ní i syée sán?» A Agari jo: «A mii fàn n léeli mii kàfɔjew Sarayi na wii.»

⁹ A Yawe nyɛ̀ʔɛni tunduɔn wi yari: «Lúru maa syée mɔ kafɔjew ma mi sa miyɛɛ gaan wi ma.»

¹⁰ A Yawe nyɛ̀ʔɛni tunduɔn níì wi yari: «Mii a mɔ yodaʔayi yaʔa yi nɛʔɛ gbanʔama, bi pye syɔɔn a gbǎn yi córo í.»

¹¹ A Yawe nyɛ̀ʔɛni tunduɔn níì wi yari: «Wéle, mɔ wi nyɛ wee ní fícɛnnɛ ní, nànbile si mɔ a ba see, mɔ si a ra li yiri Isimayɛli, níì cán Yawe n mɔ wɔʔɔgi sùpile lóʔo.

¹² Mɔ piiw bee a ba pye àmɛɛ seʔe jofani nyɛ lè. Wi a ra syɛ́ɛnbèle myɛ túngu, syɛ́ɛnbèle myɛ si wɔ́ɔ ra wi túngu. Wi a ba tɛ́ɛn wi nibin, si yɛʔɛ̀ wáa wi senyɛnbèle myɛ ma.»

¹³ A Agari mɛ́ʔɛ le Yawe na, woro wee wi da ni nyuu ní wi ní lè, wi n jo: «Ata-Ɛli-Woroyi.» Níì cán wi maa jo: «Kányɛʔɛ gii lé wee wi mii nyaagi lè, woro mii nyaa nɛɛ naa?»

¹⁴ Koro na be kɔ̀lɔ́w bee mɛ́ʔɛ le ni wi yiri Lahayi-Woroyi wi lè Kadɛsyi, ní Beredi níngi ni,

¹⁵ A Agari baa nànbile see Abirami ma. Pìíwee Agari see lè, a Abirami wi mɛ́ɛgi le Isimayɛli.

¹⁶ Lǎli ni Agari pìíw see Abirami ma lè, Abirami maa taa lǎli bee ni yɛ̀ʔɛlɛ togoye sicɛrɛ ní kɔrɔni.