Sélimɛ 15 - Cebaara Bible 2010

Yawe n joogaanna kpéʔele ní Abirami ní

¹ Kérigèle bee kàdoʔo ma, a Yawe joo ní Abirami ní yanyaʔa ni, wi n jo: «Abirami, ki ga yɛlɛ mɔ í da fɛ̀ɛgí í. Mii wi nyɛ mɔ tunmɔzige-yárigi. Mii a tɔ̀nɔ́ tɔ̀nɔkpɔɔɔ kaan mɔ ma.»

² A Abirami jo: «Kàfɔw Yawe, nyàʔá si mɔ a zǐn kaan mii ma? Mii wi syée wee pyà fun ni. Wee wi a mii kpáagi kɔ́rigɔ lìi lè, woro wi nyɛ Eliyezɛɛri wi lè Damasi ye wów.»

³ A Abirami níì jo: «Ncan mɔ ga pyà kaan mii ma í, á gi nyaa mii kpáagi púlowaa wi a ba pye mii kɔriliiw.»

⁴ A Yawe si gi joo wi ma níì jo: «Nǎnw bee ban wi a mɔ kɔ́rigi lìi í. Fwɔɔ pìíwee mɔ tiimaa a see lè, woro wi a pye mɔ kɔriliiw.»

⁵ A wi Abirami kɔ́ri n yiri kàfugi na, ní baa wi pye: «Ki n yɛlɛ mi nyɛ̀ʔɛni sámaga mi wéle mí ŋɔripiigèle córo kapye mɔ fánʔa i nyɛ ge na bi gbǎn ge córo. A wi níì wi pye: Kánmi bee na si mɔ piibèle a ba nɛʔɛ.»

⁶ A Abirami tága Yawe na, koro na Yawe wi córo syɛɛnsiɔn.

⁷ A wi níì wi pye: «Mii wi nyɛ Yawe, mii wee wi mɔ yirige lè Uri kěgi ni ki lè Kalide ye wógi, bi ba tári naa kaan mɔ ma di pye mɔ wóro.»

⁸ A Abirami si jo: «Kàfɔw Yawe, nyàʔá ki a gi tɛ̀ɛn mii na mii í gi cán bi cán mii a ba tári naa taa di pye mii wóro?»

⁹ A Yawe wi yari: «Ki n yɛlɛ mi yɛ̀ʔɛlɛ taanri náapyaʔa, ní yɛ̀ʔɛlɛ taanri síkaa, ní yɛ̀ʔɛlɛ taanri bapɔlɔ cò n fàra kàtolo nibin, ní lòbwɔɔpile nibin na mi pan mii ma.»

¹⁰ A Abirami yaweegèle bee myɛ cò n pan, ní baa ge paʔala jaaya siin-ziin, níì jaa-jaayi bee yɛ́ɛyɛ sɔʔɔlɔ yiyɛɛ ni, kàjáa wi da féjɛɛngèle paʔala í.

¹¹ A kaàjɔɔ-féjɛɛnri i tíri ni maa yakuuri bee ma. A Abirami i di nɛnɛ.

¹² A ki ga pye cânjeeri na, a ŋúnɔmi tɔ̀nɔ n Abirami cò gbanʔama. A yébiliwɔɔlɔ fyáakpɔɔrɔ wɔ́ɔ̀ jée wi ni.

¹³ A Yawe si gi joo Abirami ma níì wi pye: «Ki n yɛlɛ mi gi cán mɔ yodaʔayi a kɔ́ sa pye nibɔɔnnɔ táraa ni, dee di lè ti o nyɛ pe worò í si pye yaà beè pulobèlē. Bele bee a ra be wɔʔɔ yɛ̀ʔɛlɛ saala siin fúngo ni.

¹⁴ Kàjáa syɛɛnfelegee má pe a pye lè pulobèlē, mii a ba kútii kúun syɛɛnfelegi bee na, si be yirige syɛɛnfelegi bee tára ni, pe si a yiri ní lɔrɔ saʔa ní.

¹⁵ Mɔ si na, mɔ a tɔ̀nɔ́ kári mɔ tóolɛɛbèle kurugo yɛɛ̀nyinge na. Mɔ a tɔ̀nɔ́ mɔ lɛɛri làla myɛ kwɔ́ɔ fundaanra na, pé náa ba mɔ tɔ́n.

¹⁶ Mɔ yodaʔayi a kòro yaà bi taa ba nan pe yìrigēle sicɛrɛ wóli na si náa lúru pan nɛɛ naa. Níì cán Amɔri syɛ́ɛnbèle sìnzinmɛ ga kɔ́ɔ̀ foro n nan mii í be nɛnɛ í.»

¹⁷ A cángi ga too á yébiligi tɔ̀nɔ n sámaga n wɔ́ɔ, a wi fúru naàniganra ní naanyìnge nyaa, gee ni wírige da pye lè, a toro jée káari nínge ni, dee wi da yabala lè.

¹⁸ Cángi bee na a Yawe joogaanna kpéʔele ní Abirami ní níì jo: «Mii n tári naa kaan mɔ yodaʔayi ma, nlaa yaà Ezyipiti cábigi na n kári fwɔɔ n sáà nan cábikpɔɔgi na, gi lè Ufurati.

¹⁹ Tári bee di lè Kenii ye, ní Kenazi ye, ní Kadimɔnii ye tári,

²⁰ n fàra Hɛti ye tári, ní Perezi ye wóri, ní Erefa ye wóri,

²¹ ní Amɔri ye wóri, ní Kanaan ye, ní Giirigasi ye, ní Yebusi ye wóri na.»