Sélimɛ 11 - Cebaara Bible 2010

Babɛli kpaataʔa-tɔ́nɔgi kéele

¹ Tári syɛ̀ɛnnɛ myɛ si maa ni syɛɛnfele-níjanra, ní syɛɛnkan-níjanya nyuu.

² A pe ga yìri canʔafolomɔ ma ni maa, a be baa jǐnlɔgbɔʔɔ nyaa Syineyari tári ni, a be tɛ́ɛn yaà beè.

³ A be gi joo peyɛɛ ma níì jo: «Ye kàwáa wo còfáa kpúmɔn wó wi sórigo náagi ni!» A còfáaw pye be ma kàdɛnɛyi sìndɛʔɛ ni, a be i faanri. A tári kùro pye be ma póori.

⁴ Koro kàdoʔo ma a be níì jo: «Ye kàwáa wo kàʔa tɛ́ʔɛ, wó kpaataʔa-tɔ́nɔgɔ faan fwɔɔ ki ǹjogi í sa nan nyɛ̀ʔɛni na. Kánmi bee na wolo a mɛ́ɛkpɔʔɔ taa, koro ga pye wolo a kɔ́ cariga bi kári tári myɛ yɛ́ʔɛ kurugo í.»

⁵ Kěgee, ní kpaataʔa-tɔ́nɔgee Adami pìíbèle da ni faanri lè, a Yawe tìgi n pan bi ba yi wéle.

⁶ A Yawe gi joo níì jo: «Wéle, àmɛɛ pe myɛ nyɛ lè syɛɛnfelege nibin, pe myɛ si i syɛɛnfele-níjanra nyuu, gee be séli ni kpéʔele lè gee, ki ga foro pe wógi na, yafyɛn a ní ba be láʔa pe nyɛnɛ kéelaa na í.

⁷ Yaa maa wo tìgi wo sa be syɛ́ɛnri nyáʔami yaà beè, koro ga pye pe a ní kɔ́ ra peyɛɛ syɛ́ɛnri lúro í.»

⁸ Tɛ́ɛgi bee ni Yawe be cariga n tórigo léelige tári myɛ yɛ́ʔɛ kurugo, a be láʔa kěgi faanna na.

⁹ Koro na be gi yiri Babɛli. Níì cán beè Yawe tári syɛ̀ɛnnɛ myɛ syɛ́ɛnrɛ nyáʔami. Nɛɛ bee Yawe be cariga n tórigo tári tɛ́ɛyɛ myɛ yɛ́ʔɛ kurugo.

Tofɔlɛɛyi mɛ́ɛyɛ, n séli Sɛmi na n sáà nan Abirami na

¹⁰ Sɛmi yòdaʔayi wéle yee. Lǎli ni Sɛmi taa lè yɛ̀ʔɛlɛ dabata, a wi Aripakisyadi see. Koro n pye lònɛʔɛgi maa sɔ̀lɔ, a yɛ̀ʔɛlɛ siin kwɔ́ɔ.

¹¹ Aripakisyadi seeli kàdoʔo ma, a Sɛmi níì yɛ̀ʔɛlɛ saala siin ní dabata taa. Wi si maa níì nànbiigèle kèle see n fàra calipiigèlē na.

¹² Lǎli ni Aripakisyadi taa lè yɛ̀ʔɛlɛ toko ní kpɔrigɔ ní yɛ̀ʔɛlɛ kagunɔ, a wi Syela see.

¹³ Syela seeli kàdoʔo ma, a Aripakisyadi níì yɛ̀ʔɛlɛ saala siin ní taanri taa. Wi si maa níì nànbiigèle kèle see n fàra calipiigèlē na.

¹⁴ Lǎli ni Syela taa lè yɛ̀ʔɛlɛ toko ní kpɔrigɔ, a wi Hebɛɛri see.

¹⁵ Hebɛɛri seeli kàdoʔo ma, a Syela níì yɛ̀ʔɛlɛ saala siin ní taanri taa. Wi si maa níì nànbiigèle kèle see n fàra calipiigèlē na.

¹⁶ A Hebɛɛri ga yɛ̀ʔɛlɛ toko ní kpɔrigɔ ní sicɛrɛ taa, a wi Pelegi see.

¹⁷ Pelegi seeli kàdoʔo ma, a Hebɛɛri níì yɛ̀ʔɛlɛ saala siin ní toko ní kpɔrigɔ taa. Wi si maa níì nànbiigèle kèle see n fàra calipiigèlē na.

¹⁸ A Pelegi ga yɛ̀ʔɛlɛ toko ní kpɔrigɔ taa, a wi Erewu see.

¹⁹ Erewu seeli kàdoʔo ma, a Pelegi níì yɛ̀ʔɛlɛ sirakele ní kpanjɛrɛ taa. Wi si maa níì nànbiigèle kèle see n fàra calipiigèlē na.

²⁰ A Erewu ga yɛ̀ʔɛlɛ toko ní kpɔrigɔ ní siin taa, a wi Serugi see.

²¹ Serugi seeli kàdoʔo ma, a Erewu níì yɛ̀ʔɛlɛ sirakele ní kɔrɔsiin taa. Wi si maa níì nànbiigèle kèle see n fàra calipiigèlē na.

²² A Serugi ga yɛ̀ʔɛlɛ toko ní kpɔrigɔ taa, a wi Nahɔri see.

²³ Nahɔri seeli kàdoʔo ma, a Serugi níì yɛ̀ʔɛlɛ sirakele taa. Wi si maa níì nànbiigèle kèle see n fàra calipiigèlē na.

²⁴ A Nahɔri ga yɛ̀ʔɛlɛ toko ní kpanjɛrɛ taa, a wi Tera see.

²⁵ Tera seeli kàdoʔo ma, a Nahɔri níì yɛ̀ʔɛlɛ dabata ní kpɔrigɔ ní kpanjɛrɛ taa. Wi si maa níì nànbiigèle kèle see n fàra calipiigèlē na.

²⁶ A Tera ga yɛ̀ʔɛlɛ togoye taanri ní kpɔrigɔ taa a wi Abirami, ní Nahɔri, ní Haran see.

²⁷ Tera yòdaʔayi wéle yee. Tera n Abirami, ní Nahɔri, ní Haran see, á Haran Lɔti see.

²⁸ A Haran kùu wi tóow Tera nyɛ́nɛ na táree ni be wi see lè. Uri kěgi ni wi kùu ki lè Kalide ye wógi.

²⁹ A Abirami ní Nahɔri càbala pɔri. Pe maa ni Abirami céw yiri Sarayi, ní i Nahɔri wów yiri Milika. Milika maa pye Haran pyà, Haran wi da wɔ́ɔ̀ Yisika see.

³⁰ Sarayi maa pye cenaa-sìnzeeo, pyà da pye wi ma í.

³¹ A Tera wi jáaw Abirami kɔ́ri n pínɛ ní wiyɛɛ ní n fàra wi pìinyanbiigi Lɔti na wi lè Haran jáaw, ní Sarayi wi lè wi pìíw Abirami céw. A be pínɛ n yiri Uri kěgi ni ki lè Kalide ye wógi bi kári Kanaan tári ma. A be sáà nan Karan na níì tɛ́ɛn yaà beè.

³² Tera sìíw yɛ̀ʔɛlɛ myɛ nyɔ́ɔ n pye sirakele ní kagunɔ, á wi kùu Karan ni.