Wɔrɔmi ye 7 - Cebaara Bible 2010

Fɛ̀ɛ́wee cèpɔrigi tɛ̀ɛn lè

¹ Ni senyɛ̀nnɛ, yele bele ye nyɛ lè Mowizi làlwaw cánvɔɔlɔ, yele ní mii nyuu, yele ga gi cán ncan làlwaw i nyɛ syɔɔn nyúngi na wi wéemi làla myɛ ni ì?

² Kánmi bee na nàɔn ga cɔlɔɔ pɔri, làlwaw n céw pwɔɔ wi nǎnw na wi wéemi làla myɛ ni. Kàjáa wi nǎnw ga kùu, wi n syɔɔ wi nǎnw làlwa ma.

³ Gee bee na bi wi nǎnw yaʔa sìi na, wi ga sáà kòro nànwaa nikwɔɔ ma, pe a ra wi yiri nànjaacɔɔ̀, wi nǎnw si ga kùu, wi n syɔɔ wi nǎnw làlwa ma, wi ga kòro nànwaa nikwɔɔ ma, pe a ní gbǎn ra wi yiri nànjaacɔɔ̀ í.

⁴ Ni senyɛ̀nnɛ, kánmi bee wonijanma na yele kùu Mowizi làlwaw kàbaan na àmɛɛ yele nyɛ cere nibin ní Kirisi ní lè, níì pye wi wòolo woro wee Kolocɔlɔɔ nyán n yirige kúbèle nínge ni lè, jàngó wolo í da yasanra sangi Kolocɔlɔɔ ma.

⁵ Níì cán lǎli ni wolo da pye lè céri kôdanʔabéle, Mowizi làlwaw maa ni kapeegèle láanitaʔa kele yìrigí wolo ma, ke maa ni báara wolo céri tɛ́ɛyɛ ni ní i wolo tórogi kùúw ma.

⁶ Kàjáa tɔ́ɔliw ni wolo n syɔɔ làlwaw bee fànʔa ma, níì cán woro wi da wolo cò n yérige, wolo si n kùu wi kàbangi na, a koro gi kaan wolo ní o báara Kolocɔlɔɔ ma kanlɛɛmi na n yɛlɛ ní syɛɛnsɛbɛlɛɛri ní í, fwɔɔ kanvɔnmi na, bee wolo taa lè Pìicǎnni ma.

Mowizi làlwaw ní kapeebyeri kéele

⁷ Ki ga pye nya, nyàʔá si wolo a joo? A Mowizi làlwaw i nyɛ lé kapeele láà? Eʔe dɛ! Kàjáa kapye làlwaw bee da pye naa í, mii mǎà dée kapeegèle cán nyáana í. Kapye làlwaw bee da gi joo níì jo: «Mɔ a kɔ́ nyabɛɛnnɛ kpéʔele í,» mii mǎà dée nyabɛɛnnɛ kéele cán í.

⁸ Kapeebyeri si n kanmaa taa làlwaw bee tundunro báriga ni ni nyabɛɛntaari féleye myɛ yìrigí mii fúngi ni. Níì cán kapye làlwaw o yaà í, kapeebyeri n kùu.

⁹ Booma ni mii da pye lè Mowizi làlwaw sìnján ni, mii maa pye sìi na. Amɛɛ si làlwaw bee tundunro pan lè, a kapeebyeri baa pye sìi na, á mii kùu.

¹⁰ Tundunri ti da kaan lè sìíw kéele na, a dee bee si baa pye mii ma kùúw sábabu.

¹¹ Níì cán kapeebyeri n kanmaa taa tundunri báriga ni n mii fáana n kpóo.

¹² Mowizi làlwaw i nyɛ tɛɛlɛ fun, a wi tundunri wɔ́ɔ i nyɛ tɛɛlɛ fun, ti n sín níì nyɔɔ.

¹³ A yacangi bee si baa pye lé mii ma kùúw sábabu? Eʔe dɛ! Kàjáa kapeebyeri ti da yacangi bee pye sábabu níì mii kpóo, a koro gi kaan a mii gi cán ti i nyɛ kapeebyere, gee bee na ti baa pee n sɔ̀lɔ gbanʔama làlwaw bee tundunro báriga ni.

Syɔɔnwee kapeeli kàragí lè

¹⁴ Wolo n gi cán Mowizi làlwaw n nyɔɔ syɔɔn pili ma. A mii céri láanitaʔa kele si mii kíle n pára kapeebyeri ma.

¹⁵ Níì cán gee mii kpéʔele lè, mii o gi kɔ́rɔw cángi í. Gee mii caa lè, mii o gi kpéʔele í, gee si gi mii bɛɛngi lè, koro mii kpéʔele.

¹⁶ Awá, gee si gi lè mii o caa bàā gi kpéʔele í, kapye mii i gee bee kpéʔele, mii n yére gi ni n jo làlwaw n nyɔɔ.

¹⁷ Mii si ban wi ní i nyɛ ki kpéʔelefɔw í, kapeebyeri di tɛ́ɛn mii ni lè, toro di nyɛ ki kpéʔelefɔw.

¹⁸ Níì cán mii n gi cán yacanga faala o nyɛ mii ni í, gee bee n jo mii céri ni í. Gee gi mii dɛ́nɛ lè koro gi nyɛ mii í da kacǎngèle kpéʔele, mii si ga fànʔa taa bàā ge kpéʔele í.

¹⁹ Níì cán kacǎngèle mii caa bàā kpéʔele lè, mii o ge kpéʔele í, kàjáa kapeegèle ge lè mii o caa bàā ge kpéʔele í, koro mii kpéʔele.

²⁰ Gee si gi lè mii o caa bàā gi kpéʔele lè í, mii ga ni gee bee kpéʔele, mii ban wi ní i nyɛ ki kpéʔelefɔw í, kapeebyeri di tɛ́ɛn mii ni lè, toro di nyɛ ki kpéʔelefɔw.

²¹ Mii n kánmi naa nyaa niyɛɛ ni, mii ga ni caa bi kacànna kpéʔele lǎlee ni lè, mii n kàri n pye kapeele pyefɔlɔ.

²² Koro ní ki myɛ ní Kolocɔlɔɔ làlwaw kéele n mii dɛ́nɛ mii fúngi ni gbanʔama.

²³ Mii si n làlwawaa nikwɔɔ nyaa mii céri tɛ́ɛyɛ ni, làlwaw bee i kapɛɛnni kpúmɔn ní mii fúngi wóo ní, ní i mii có ni légi kapeebyeri làlwa púloro ni, wee wi nyɛ mii céri tɛ́ɛyɛ ni lè.

²⁴ Ee, mii i fɔ̀rɔgí ni caanri! Wìí wi a mii syɔɔ céri naa ma ti kúu lè?

²⁵ Mii i bariga kaangi Kolocɔlɔɔ ma wolo Kàfɔw Zyezu Kirisi bárigaw ni. Kánmi bee na mii nyɛ Kolocɔlɔɔ làlwaw púloro ni mii funzɔngumi kàbaan na, ní si i nyɛ kapeebyeri púloro ni mii céri kàbaan na.