Wɔrɔmi ye 5 - Cebaara Bible 2010

Amɛɛ wo nyɛ bɛ̀ɛlɛ na ní Kolocɔlɔɔ ní lè

¹ Amɛɛ wolo sínni taa lè tágali báriga ni, gee bee na wolo nyɛ bɛ̀ɛlɛ na ní Kolocɔlɔɔ ní wolo Kàfɔw Zyezu Kirisi bárigaw ni.

² Níì cán kpɔ́ʔɔri naa ni wolo nyɛ lè woro wi gi kaan a wolo tɛɛ̀jeʔe taa di ni tágali báriga ni. Wolo si wɔ́ɔ i nyɔ̌ngbɔɔlɔ táanri àmɛɛ wolo wolo sɔ̀ngumi taʔa gi na lè, ncan wolo a lɛɛlɛ taa Kolocɔlɔɔ nìjangbɔɔri ni.

³ Gee bee yagana si ban í, ncan wolo wɔ́ɔ i nyɔ̌ngbɔɔlɔ táanri wɔʔɔyi kéele na àmɛɛ wolo gi cán lè ncan wɔʔɔyi i kpàracogo kaangi syɔɔn ma,

⁴ kpàracogi si i tágadeeli kaangi, tágadeeli si i sɔ̀ngumi tɛɛtaʔaga kaangi.

⁵ Sɔ̀ngumi bee tɛɛtaʔaga si a fɛ̀ɛrɛ wáa syɔɔn na í, níì cán Kolocɔlɔɔ n wi tàmagi tìrige, a gi baa wolo fúnyi nyìn Pìicǎnni báriga ni lee wi kaan wolo ma lè.

⁶ Kányɛʔɛ na lǎli ni wolo da sèʔê pye lè báriga fun, a lǎli ga baa nan, lee Kolocɔlɔɔ da kɔ̀rirɔ n tɛ́ʔɛ lè, a Kirisi baa kùu Kolocɔlɔɔ yɛ́ʔɛnaa-sìnvyaabèle kéele na.

⁷ Alí wàa ga pye syɛɛnsiɔn, syɔɔn a wári fɔ̀lɔ́ kùu wi kéeli na í. Dɔ̀ʔɔ́ syɔɔnwaa a gbǎn soro yére bi kùu funjàngafɔlɔ kéele na.

⁸ Kàjáa Kolocɔlɔɔ n wi tàmagi tɛ̀ɛn wolo na kánmi naa na, koro gi nyɛ lǎli ni wolo da sèʔê pye lè kapeebyebèlē, a Kirisi baa kùu wolo kéeli na.

⁹ Koro na àmɛɛ wolo sínni taa lè Kirisi sìsyaanw wolo báriga ni, gee bee na wolo a ba syɔɔ kányɛʔɛ ni Kolocɔlɔɔ fundanʔari ma woro bárigaw ni.

¹⁰ Níì cán kapye Kolocɔlɔɔ n wolo bɛ̀ɛ ní wiyɛɛ ní wi Jáaw kùulo báriga ni, bi gi taa wolo maa pye wi nigoolo, ànbée gi wɔ́ɔ̄ nyɛ àmɛɛ wi wolo bɛ̀ɛ ní wiyɛɛ ní n kwɔ́ɔ lè, wi a ba wolo syɔɔ kányɛʔɛ ni wi Jáaw sìi báriga ni.

¹¹ N fàra gee bee na wolo wɔ́ɔ i nyɔ̌ngbɔɔlɔ táanri Kolocɔlɔɔ kéeli na wolo Kàfɔw Zyezu Kirisi bárigaw ni, woro wee báriga ni wolo bɛ̀ɛ́li bee taa lè tɔ́ɔliw ni.

Adami ní Kirisi kéeli

¹² Gee bee na àmɛɛ kapeeli jée lè dulunyanw ni syɔɔn nibin kéele na, á kùúw wɔ́ɔ̀ jée kapeeli kurugo, gee bee na kùúw fala n nan syɛ́ɛnbèle myɛ na, níì cán pe myɛ n kapeeli kpéʔele.

¹³ Níì cán sáni Kolocɔlɔɔ í làlwaw kaan Mowizi ma lè, kapeegèle maa téè pye naa dulunyanw ni. Kàjáa Kolocɔlɔɔ o kapeele córo syɔɔn na í, kapye làlwaw o beè í.

¹⁴ Koro ní ki myɛ ní nlaa Adami lǎli na n baa nan Mowizi wóli na kùúw maa fànʔa taa syɛ́ɛnbèle myɛ na, àlí bele be lè pe ga Adami kolomi félege kpéʔele í, kùúw maa wɔ́ɔ̀ fànʔa taa bele bee myɛ na. Syɔ́ɔnwee wi da yɛlɛ wi pan lè, Adami maa pye wee bee niwirio.

¹⁵ Kàjáa kolomi bee ní Kolocɔlɔɔ yakaangi o nyɛ sèjira í. Kányɛʔɛ ni syɔ́ɔnw bee nibin kapeele li pye sábabu, a syɛ̀ɛnnɛ saʔa kùu, koro ní ki myɛ ní Kolocɔlɔɔ n kpɔʔɔrɔ kaan dee di kpɔ́ʔɔ n sɔ̀lɔ lè, wi yakaangi gi nan lè syɛ̀ɛnnɛ saʔa na syɔɔn nibin kpɔ́ʔɔrɔ báriga ni, wi lè Zyezu Kirisi, koro n wɔ́ɔ̀ kpɔ́ʔɔ n sɔ̀lɔ.

¹⁶ Láʔala i nyɛ yakaangi bee, ní syɔ́ɔnw bee kapeele nínge ni. Níì cán syɔ́ɔnw bee nibin kapeele n kútiiw yìrige, wee kàdoʔo gi nyɛ lè wɔʔɔgi, kàjáa Kolocɔlɔɔ n yakaangi kaan kapeenɛʔɛgèle kpéʔelele kadoʔo ma, jàngó syɛ́ɛnbèle í sínni taa.

¹⁷ Níì cán syɔɔn nibin kapeele li gi kaan a kùúw baa fànʔa taa syɛ́ɛnbèle na syɔ́ɔnw bee nibin báriga ni, ki ga pye nya, bele be kpɔʔɔnɛʔɛri taa lè ní yakaangi ní ki nyɛ lè sínni, bele bee a ba pye fànʔafɔɔlɔ sìíw ni syɔɔn nibin báriga ni wi lè Zyezu Kirisi.

¹⁸ Gee bee na àmɛɛ kálagili kútii baa nan lè syɛ́ɛnbèle myɛ na syɔɔn nibin kapeele báriga ni, kánmi bee na sínni wɔ́ɔ baa nan syɛ́ɛnbèle myɛ na syɔɔn nibin kasinnɛ báriga ni jàngó be sìíw taa.

¹⁹ Níì cán àmɛɛ syɔɔn nibin sìnloʔomɔ syɛ̀ɛnnɛ saʔa kaan lè a be baa pye kapeebyebèlē, kánmi bee wonijanma na syɔɔn nibin lóʔolo a syɛ̀ɛnnɛ saʔa kaan pe ba pye syɛɛnsinbéle.

²⁰ Mowizi làlwaw si n pan jàngó kolomi í da nɛʔɛgi. Kàjáa tɛ́ɛgee ni kapeebyeri ga nɛʔɛ lè, Kolocɔlɔɔ kpɔ́ʔɔri n wɔ́ɔ̀ pye nɛɛ bee wonɛʔɛrɛ ní n sɔ̀lɔ,

²¹ koro ga pye àmɛɛ kapeebyeri fànʔa taa lè kùúw báriga ni, Kolocɔlɔɔ kpɔ́ʔɔri í wɔ́ɔ ra fànʔa taagi sínni báriga ni bàā sìibangwɔɔw kaangi syɛ́ɛnbèle ma wolo Kàfɔw Zyezu Kirisi bárigaw ni.