Wɔrɔmi ye 3 - Cebaara Bible 2010

¹ Ki ga pye nya, nyàʔá gi Zyefuo pɔ́rɔ n sɔ̀lɔ syɛɛnsanbèle na? Ba nyàʔá gi nyɛ kɛ́nɛw kpéʔelele kanyɔɔnɔ?

² Gee gi Zyefuo pɔ́rɔ n sɔ̀lɔ syɛɛnsanbèle na lè, ki n kpɔ́ʔɔ kánmi féleye myɛ na. Ki wozeligi gi nyɛ ncan Zyefubèle má Kolocɔlɔɔ da wi nyɔɔsyɛɛnri kàlifáa.

³ Ki ga pye poro pèle o nyɛ tágala syɛɛnnɛ í, a gee bee a gbǎn Kolocɔlɔɔ kàriga lé wi a ní pye tágala syɔ́ɔn í?

⁴ Eʔe dɛ! Alí syɛ́ɛnbèle myɛ ga pye jànvaafɔɔlɔ, ki n yɛlɛ pe gi cán Kolocɔlɔɔ a sèʔé pye kányɛɛgi joofɔlɔ làrigèle myɛ ni, àmɛɛ gi sɛ́bɛ lè níì jo: «Mɔ ga ni nyuu lǎlee ni lè, ki n yɛlɛ pe gi cán mɔ tánʔa i nyɛ poro na, ní pe ga ni kútiiw nyuu ní mɔ ní lǎlee ni lè, ki n yɛlɛ mɔ í joo bi be jáa.»

⁵ Ki ga pye wolo kakolobyeri i gi tèé n jo Kolocɔlɔɔ n sín, nyàʔá si wolo a ní joo? Amɛɛ Kolocɔlɔɔ a ba wolo dulunyanw syɛ̀ɛnnɛ wɔʔɔ lè, a wolo a jo lé wi n kolo? (Mii i dee naa nyuu syɛ́ɛnbèle jooganma na.)

⁶ Eʔe dɛ! Níì cán Kolocɔlɔɔ ga maa kolo, mɛ̀ɛ́ wi a dée gbǎn kútiiw cáan dulunyanw syɛ̀ɛnnɛ na bi sɛ́ɛ?

⁷ Ki ga pye mii jànvaaw joolo n gi kaan kàa i taari Kolocɔlɔɔ kányɛɛgi joolo na, koro ga pye gee bee si nìjangbɔɔri taʔa Kolocɔlɔɔ na, nyàʔá na ki níì yɛlɛ wi kútiiw cáan mii na, mɔ a jo mii i nyɛ kapeebyeo?

⁸ Ki ga pye nya, nyàʔá na ki ga yɛlɛ wolo í da kapeegèle kpéʔele koro ga pye kacǎngèle sáā taagi kapeegèle kpéʔelele báriga ni í? Syɛ́ɛnbèle pèle i wolo mɛ́ɛyi kálagi níì jo wolo i gi nyuu nya. Kútiiw toolo n yɛlɛ bele bee na.

Syɔɔn faala ga sín í

⁹ Ki ga pye nya, wolo bele wo nyɛ lè Zyefubèle, a gee bee joo lé wolo n sɔ̀lɔ syɛɛnsanbèle na? Eʔe, wolo ga sɔ̀lɔ be na í. Níì cán wolo n gi fílige n joo n kwɔ́ɔ níì jo Zyefubèle ní syɛɛnfeleyi wozanya myɛ i nyɛ kapeebyeri kɔ́yɔ ni,

¹⁰ àmɛɛ gi nyuu lè Kolocɔlɔɔ syɛɛnsɛbɛri ni níì jo: «Syɔɔn nibin tɔ̀nɔ́ o beè, wee wi síngi lè í.

¹¹ Syɔɔn faala o beè, wee wi keele kɔ́rɔ cán lè í, wàlá wee wi Kolocɔlɔɔ caa lè í.

¹² Syɛ́ɛnbèle myɛ n pùuni n kólogi wáa, níì pínɛ n pye kanyɔɔnɔ fun syɛɛnnɛ. Syɔɔn faala o beè, wee wi kacàngēle kpéʔele lè í, àlí syɔɔn nibin.

¹³ Pe yákpodiriyi i nyɛ àmɛɛ nyanwee-múguyaʔaga nyɛ lè, pe i be nyíngèle téeri ni syɛ́ɛnbèle fáana, ki i nyɛ mɔ a jo wàbisɔɔnrɔ i nyɛ pe nyɔɔwari láara ni.

¹⁴ Syɛ́ɛnri di yirigi lè pe nyɔ́ɔyi ni, dee bee myɛ i nyɛ dánga syɛ́ɛnrɛ ní syɛɛnsororo.

¹⁵ Pe i fé funvuugo na koro ga pye bàā syɛ́ɛnbèle taagi da kúu,

¹⁶ tɛʔɛ o tɛʔɛ ni be sɔ̀lɔ́ lè, kálagili ní wɔʔɔli i nyɛ nɛɛ bee,

¹⁷ kólogee be yɛlɛ paa táanri lè, si pye bɛ̀ɛlɛ na ní be syɛɛnnyɛnbèle ní, pe ga gee bee cán nyáana í.

¹⁸ Pe o fɛ̀ɛgí Kolocɔlɔɔ na nyáana í.»

¹⁹ Wolo n gi cán gee myɛ gi nyuu lè Mowizi làlwaw sɛ́bɛ ni, ki i nyuu bele ma be nyɛ lè làlwaw bee kólogo ni, koro ga pye Kolocɔlɔɔ í dulunyanw syɛ̀ɛnnɛ myɛ nyɔ́ɔyɔ tɔ́n, si kútiiw cáan pe myɛ na.

²⁰ Níì cán Kolocɔlɔɔ a tée sínni kaan syɔɔnwaa faala ma Mowizi làlwaw kèlē kpéʔelele báriga ni í, níì cán gee gi nyɛ lè làlwaw bee fáli nyúngo, koro gi nyɛ bi gi tɛ̀ɛn syɛ́ɛnbèle na pe gi fílige cán bi cán poro i nyɛ kapeebyebèlē.

Kánmee na Kolocɔlɔɔ syɔɔn syoo lè

²¹ Kolocɔlɔɔ si n baa gi tɛ̀ɛn lǎli naa ni kánmee na syɔɔn a gbǎn woro sínni taa lè, sínni bee si a gbǎn taa Mowizi làlwaw báriga ni í, àlí làlwaw ní kanyaajoobèle maa wɔ́ɔ̀ gee bee joo,

²² Kolocɔlɔɔ sínni li kaangi syɛ́ɛnbèle ma lè tágali báriga ni, poro bele myɛ be tága Zyezu Kirisi na lè. Níì cán wi o wàa yirigi wàa ni í,

²³ syɛ́ɛnbèle myɛ n kapeegèle kpéʔele níì kólogo Kolocɔlɔɔ nìjangbɔɔri kurugo.

²⁴ Wi si i be kpɔ́ʔɔgi ní sínni ní wi kaangi be ma lè kawaʔa na syɔɔli báriga ni lee Kirisi Zyezu sámaga be ma lè.

²⁵ Woro Kolocɔlɔɔ yirige n wòlo sáriga, koro ga pye bele pe ga tága wi na lè, bele bee kapeegéle kusulugo í gbǎn taa syɔɔ wi sìsyaanw wolo báriga ni, Kolocɔlɔɔ n gee bee kpéʔele bi woro sínni tɛ̀ɛn. Níì cán booma ni wi maa ni kpàracogo kpéʔele syɛ́ɛnbèle kapeegéle kéele na,

²⁶ koro ga pye bi woro sínni tɛ̀ɛn tɔ́ɔliw naa ni àmɛɛ woro tiimaa sín lè ní i sínni kaangi bele ma be tági Zyezu na lè.

²⁷ Ki si ga pye nya, a tànʔa i nyɛ lé syɔɔn ma wi ní gbǎn wiyɛɛ gbɔ́ʔɔ? Koro a gbǎn pye í. Làlwawìí báriga ni? Kapyegèle làlwa báriga ni lé? Eʔe, fwɔɔ tágali làlwa báriga ni.

²⁸ Níì cán wolo n gi tímana n gi nyaa tágali báriga ni syɛ́ɛnbèle sínni taagi, Mowizi làlwaw kapyegèlē báriga ni ban í.

²⁹ Ba yele joo lé Kolocɔlɔɔ i nyɛ Zyefubèle yagana wóo? Wi wɔ́ɔ o nyɛ syɛɛnfeleyi wozanya wóo ì? Ɛɛn, wi wɔ́ɔ i nyɛ syɛɛnfeleyi wozanya wóo.

³⁰ Níì cán Kolocɔlɔɔ i nyɛ nibin, wi i sínni kaangi kɛ́nɛw kpéʔelefɔɔlɔ ma tágali báriga ni, ní wɔ́ɔ i li kaangi kɛ́nɛnaa-sìngbeʔelebèle ma tágali báriga ni.

³¹ A gee bee jo lé wolo n Mowizi làlwaw sàa tágali báriga ni? Eʔe dɛ! Wolo i wi kpɔ́ʔɔgi wii.