Wɔrɔmi ye 2 - Cebaara Bible 2010

Kolocɔlɔɔ kútiiw kéele

¹ Gee bee na mɔ syɔ́ɔnwee faala mi miyɛɛ gbéʔele bele kútiijooo lè, mɔ a kɔ́ joo tànʔa i nyɛ mɔ ma í, níì cán mɔ wee mi miyɛɛ bye lè bele kútiijooo ní wɔ́ɔ i kérigèle bee wonijangéle kpéʔele, mi gi cán mɔ tiimaa wɔ́ɔ i kútiiw cáan miyɛɛ na.

² Wolo n gi cán bele be kérigèle bee félege kpéʔele lè, kútiiwee Kolocɔlɔɔ nyuu bele bee kéele na lè, wi i nyɛ kányɛʔɛ be na.

³ Bele be kérigèle bee kpéʔele lè, mɔ syɔ́ɔnwee mi miyɛɛ bye lè bele bee kútiijooo, bi gi taa mɔ wɔ́ɔ i kérigèle bee wonijangéle kpéʔele, a mɔ i sɔ̀ngí lé mɔ a syɔɔ Kolocɔlɔɔ kútiiw ma?

⁴ Wàlá àmɛɛ Kolocɔlɔɔ fúngi tɔ̀nɔ n nyɔɔ lè gbanʔama, á wi nyínimi ní wi kpàracogi wɔ́ɔ̀ nɛʔɛ lè, a koro jo lé mɔ o gee bee córo wii í láà? Mɔ ga gi cán ncan wi funjǎngi a gbǎn mɔ kàriga mɔ í kàdoʔo wáa mɔ kapeegèle ma ì?

⁵ Kàjáa àmɛɛ mɔ nyúngi tɔ̀nɔ n waʔa lè, ní àmɛɛ mɔ láa o nyɛ bi mɔ fúngi kàriga Kolocɔlɔɔ ma lè í, koro na mɔ tiimaa i kàa taari mɔ wɔʔɔli na bi taa sa nan wɔʔɔgbɔɔgi canʔa na, cángee na Kolocɔlɔɔ a ba gi tɛ̀ɛn lè syɛ́ɛnbèle na pe gi cán woro kútiiw n tɔ̀nɔ n sín.

⁶ Cángi bee na wi a ba syɛ́ɛnbèle myɛ nibin nibin sàra bi yɛlɛ ní be kapyegèle ní.

⁷ Bele si be kòro ni kasingèle kpéʔele lè ní lòmaana ní, ní i nìjanri caa, n fàra sòololi, ní cénaa-sìnvɔnʔɔri na, bele bee má wi a sìibangwɔɔw kaan.

⁸ Kàjáa bele fundaaya yi be kíle ni syée pe nyɛnɛ kérigèle kurugo lè, pe si tée o yèré kányɛɛgi ni lè í, níì kòro pe kakolobyeri na ni kpéʔele lè, Kolocɔlɔɔ fundanʔari ní wi kayaagi a ba too bele bee na.

⁹ Bele myɛ be nyɛ lè kakolobyebèle, wɔʔɔgɔ ní funjurugoro a ba too bele bee na, ki si a séli Zyefubèle na gbɛnʔɛnɛ, si náa nan syɛɛnfeleyi wozanya na.

¹⁰ Kàjáa bele myɛ be nyɛ lè kasinbyebèle, nìjanri, ní sòololi, ní yɛɛ̀nyingi a ba pye bele bee ma, ki si a séli Zyefubèle na gbɛnʔɛnɛ, si naa nan syɛɛnfeleyi wozanya na.

¹¹ Níì cán Kolocɔlɔɔ o syɔɔnwaa yirigi wàa ni í.

¹² Bele myɛ be kapeegèle kpéʔele lè, pe si o nyɛ Mowizi làlwaw kólogo ni lè í, bele bee a kálagi, kàjáa làlwaw bee kólogo kéele na ban pe a kálagi í, bele myɛ si be kapeegèle kpéʔele lè ní i nyɛ Mowizi làlwaw kólogo ni, kútiiw a ba too bele bee na bi yɛlɛ ní làlwaw bee syɛ́ɛnrɛ ní.

¹³ Níì cán ki o nyɛ mɔ a jo bele be làlwaw syɛ́ɛnrɛ lúro lè yagana, bele bee Kolocɔlɔɔ córo syɛɛnsinbèle í, fwɔɔ bele be làlwaw syɛ́ɛnrɛ lúro lè ní i di kpéʔele.

¹⁴ Syɛɛnfeleyee yi lè Mowizi làlwaw o nyɛ yi ma í, yi ga ni làlwaw kèlē kpéʔele gele yi fúnyi tèé yi na lè, koro n gi tɛ̀ɛn ncan làlwawaa i nyɛ yi tiimaa fúnyi ni, bi gi taa Mowizi làlwaw o nyɛ yi ma í.

¹⁵ Níì cán kérigèle gele Mowizi làlwaw tɛ̀ɛn lè, yi kapyegèle ga ni yɛlɛgi ní gele bee ní, gee bee i gi tèé làlwaw n sɛ́bɛ yi fúnyi ni. Yi fúnyi i nyɛ yi séera, ncan làlaa ni yi sɔ̀nguri i kolomɔ kaangi yi ma, làlaa ni ti wɔ́ɔ i tànʔa kaangi yi ma.

¹⁶ Gee bee si a ba yiri gbɛ̀ɛ́nmi na cángi bee na, gee ni Kolocɔlɔɔ a ba kútiiw joo lè kalaragèle myɛ kéele na ge nyɛ lè syɛ́ɛnbèle fúnyo ni, ki si a kpéʔele Zyezu Kirisi bárigaw ni bi yɛlɛ ní Syɛɛnjóocǎnri ní mii nyuu lè.

Zyefubèle ní Mowizi làlwaw kéele

¹⁷ Mɔ i miyɛɛ yiri Zyefuo, níì mɔ sɔngumi taʔa Mowizi làlwaw na, ní i miyɛɛ gbɔ́ʔɔgi ní Kolocɔlɔɔ kéeli ní,

¹⁸ mɔ n jo mɔ n Kolocɔlɔɔ kínidɛnɛgi cán, ní wɔ́ɔ i kacǎngèle sɛʔɛ ni cángi, gele ge yɛlɛ mɔ í da kpéʔele lè, níì cán Mowizi làlwaw wi mɔ tama kérigèle bee na,

¹⁹ mɔ i gi sɔ̀ngí n jo mɔ wi nyɛ fúunbèle talafɔlɔ, ní wɔ́ɔ i nyɛ yébilimi syɛ̀ɛnnɛ gbɛɛnmɛ,

²⁰ ní ní i nyɛ nilabalabèle cìligefɔlɔ ní pìíbèle tamafɔlɔ, níì cán Mowizi làlwaw sɛ́bɛ wi nyɛ mɔ ma lè, kérigèle cánna ní kányɛɛgi myɛ i nyɛ wi ni.

²¹ Ki si ga pye nya, mɔ wee wi pèle tama lè, nyàʔá na mɔ tiimaa o miyɛɛ dama í? Mɔ wee wi gi nyuu lè níì jo: Ki ga yɛlɛ syɔɔn í da yúu í, nyàʔá na mɔ yúu?

²² Ba mɔ wee wi gi nyuu lè níì jo: Ki ga yɛlɛ syɔɔn í da ceyuugo kpéʔele í, nyàʔá na si mɔ gi kpéʔele? Yáriree syɛ́ɛnbèle sámagi ní pe kɔ́yi ní ní i di kpɔ̀ʔɔrɔ́ lè, mɔ wee wi jo lè ti ga mɔ dɛ́nɛ í, nyàʔá na si mɔ di kpɔ̀ʔɔrɔli kpaaya fuguru di kurugo?

²³ Mɔ wee wi kpɔ́ɔmi kpéʔele lè àmɛɛ Mowizi làlwaw nyɛ mɔ ma lè, nyàʔá na mɔ Kolocɔlɔɔ faari àmɛɛ mɔ làlwaw bee cèʔé lè mɔ kapyegèle báriga ni?

²⁴ Níì cán ki i nyuu Kolocɔlɔɔ syɛɛnsɛbɛri ni níì jo: «Yele Zyefubèle i nyɛ sábabu á syɛɛnfeleyi wozanya si i Kolocɔlɔɔ mɛ́ɛgi kálagi.»

²⁵ Kɛ́nɛw tɔ̀nɔ́ i nyɛ yacanga mɔ ma kapye mɔ i Mowizi làlwaw kólogo táanri ki tánʔaganmi na. Kàjáa mɔ si ga pye mɔ o làlwaw bee kólogo táanri ki tánʔaganmi na í, mɔ i nyɛ àmɛɛ kɛ́nɛnaa-sìngbeʔeleo nyɛ lè.

²⁶ Ki si ga pye kɛ́nɛnaa-sìngbeʔeleo i táanri ni yɛlɛgi ní làlwaw kajoogéle ní, mɔ ga gi cán Kolocɔlɔɔ a wee bee córo àmɛɛ kɛ́nɛkpeʔeleo nyɛ lè ì?

²⁷ Gee bee na wee wi nyɛ lè kɛ́nɛnaa-sìngbeʔeleo céri kàbaan na ní i làlwaw kèlē kpéʔele ni forogi, wee bee a tànʔa taa mɔ na, mɔ wee wi lè mɔ o làlwaw kólogo táanri ki tánʔaganmi na lè í, bi gi taa làlwaw syɛɛnsɛbɛrɛ i nyɛ mɔ ma n fàra kɛ́nɛw kpéʔelele na.

²⁸ Níì cán wee wi nyɛ lè Zyefuo syɛ́ɛnbèle nyɛ́nɛ na yagana, wee bee o nyɛ Zyefuteleo í. Ní kɛ́nɛwee be kpéʔele lè céri na yagana, wee bee o nyɛ kɛ́nɛteleo í.

²⁹ Kàjáa wee wi nyɛ lè fúngi ni Zyefuo, wee bee tɔ̀nɔ́ i nyɛ Zyefuteleo. Ní kɛ́nɛwee wi nyɛ lè fúngi wóo, wee bee i nyɛ kɛ́nɛteleo, kɛ́nɛw bee i kpéʔele Pìicǎnni báriga ni, wi o kpéʔele làlwaw syɛɛnsɛbɛrɛ joolo báriga ni í. Syɛ́ɛnbèle ban pe a syɔ́ɔnw bee sòolo í, Kolocɔlɔɔ wi a wi sòolo.