Wɔrɔmi ye 16 - Cebaara Bible 2010

Pɔli fòów kéele

¹ Mii a wolo senyɛnjew Febe mɛ́ɛtanʔa yeri yele ma wi nyɛ lè dyakiricaa Sankire Egiliziw ni.

² Ki n yɛlɛ ye wi sámaga ye cò Kàfɔw mɛ́ʔɛ na, àmɛɛ gi yɛlɛ kaa kpéʔele Kolocɔlɔɔ syɛɛncanbèle ma lè. Wi màko ga pye yárigee faala na lè, ye wi dɛ̀ɛmɛ gi na, níì cán wi n syɛ̀ɛnnɛ saʔa dɛ̀ɛmɛ, àlí wi n wɔ́ɔ̀ mii tiimaa dɛ̀ɛmɛ.

³ Ye Pirisii ní Akilasi syáanri, be nyɛ lè mii falipyenyɛnbèle Kirisi Zyezu fáliw ni,

⁴ poro bele pe da fɔ̀lɔ lè bi be nyúnyi kaan jàngó bi mii syɔɔ kùúw ma. Mii nibin ban wi bariga kaangi be ma í, syɛɛnfeleyi egilizibéle myɛ wɔ́ɔ i bariga kaangi be ma.

⁵ Ye wɔ́ɔ ye Egiliziw syáanri wee wi wiyɛɛ gbóʔoro lè pe kpáagi ni. Ye mii syɛɛn-nidaanmaw Epayinɛti syáanri, wee wi tága lè wozeliw Kirisi na Azii tári ni.

⁶ Ye Marii syáanri yaà, wi n tɔ̀nɔ n fali saʔa kpéʔele yele ma.

⁷ Ye mii kpaʔa wóbèle syáanri yaà, pe nyɛ lè Anduronikusi ní Zyunyasi, pe pye lè ní mii ní kàsow ni, á pe mɛ́ɛyi tɔ̀nɔ n yiri pìitunbèle nínge ni, àlí pe n tága Kirisi na mii yɛ́ʔɛ na.

⁸ Ye Anpilasi syáanri wi lè mii syɛɛn-nidaanmaw Kàfɔw ni.

⁹ Ye Uribɛn syáanri wi lè wolo falipyenyɛnw Kirisi fáliw ni, yé wɔ́ɔ mii syɛɛn-nidaanmaw Sitasyisi syáanri.

¹⁰ Ye Apelɛsi syáanri, wee wi mɛ́ɛtanʔa taa lè Kirisi kólogi ni. Ye Arisitobuli kpáagi wòolo syáanri yaà.

¹¹ Ye mii kpaʔa wów Herodyɔn syáanri yaà. Ye Narisiisi kpáagi wòolo syáanri, bele be nyɛ lè Kàfɔw wòolo.

¹² Ye Tirifɛni ní Tirifɔzi syáanri, àmɛɛ be báara lè Kàfɔw ma. Ye Pɛrisidi syáanri, wolo syɛɛn-nidaanmaw wi fali saʔa kpéʔele lè Kàfɔw ma.

¹³ Ye Wurufusi syáanri yaà, woro wee Kàfɔw nyɛ́nɛ n wòlo lè, ní wi nafɔw ní, wi wɔ́ɔ̄ nyɛ lè mii nɔ́ɔ.

¹⁴ Ye Asɛnkiriti syáanri, ní Filegɔn, ní Hɛrimɛsi*, ní Paturobasi, ní Hɛrimasi ní, n fàra senyɛnbèle na be yaà ní be ní lè.

¹⁵ Ye Filologi ní Zyulii, ní Nere, ní wi senyɛnjew syáanri n fàra Wolɛnpi, ní Kolocɔlɔɔ syɛɛncanbèle myɛ na be yaà ní be ní lè.

¹⁶ Yaa yeyɛɛ syáanri, yáā yeyɛɛ syɔɔnri ní funjànya ní. Kirisi egilizibèle myɛ n yele syáanri yaà.

Sàmizanna

¹⁷ Ni senyɛ̀nnɛ, bele be syɛ́ɛnbèle wálagi peyɛɛ na lè, ní i be fáana ni láari tamani na, lee yele tama lè, mii i yele nyɛ́ɛri yaa yeyɛɛ kɔ̀rɔsíi be na. Yaa còʔoró be na.

¹⁸ Níì cán syɛ́ɛnbèle bee félege o báara wolo Kàfɔw Kirisi ma í, pe tiimaa fícarigèle má be báara. Syɛ́ɛnbèle bele be nyɛ lè pe ga kɔ́ɔ̀ kapeegèle ní kacǎngèle cán n láʔala keyɛɛ na í, pe i bele bee fáana ni pùuní ní be lɛ́ɛlɛgi syɛ́ɛnrɛ, ní be jànvaaw syɛ́ɛnrɛ ní.

¹⁹ Amɛɛ yele lúro lè Kàfɔw ma, syɛ́ɛnbèle myɛ n gee bee cán. Gee bee na mii i fundaanra kpéʔele yele kéeli na, ní si i caa yele í pye sícilimɛ fɔ̀ɔlɔ kacànbyeri kàbaan na, si pye tɛɛkolobile fun kapeebyeri kàbaan na.

²⁰ Kolocɔlɔɔ wi nyɛ lè fûnnyingi kaanfɔlɔ, cɛɛri ga pye wi a Sutanaw cáan bi tɔ́nʔɔnɔ yele tɔ́lɔyi láara ni. Ki n yɛlɛ wo Kàfɔw Zyezu í wi kpɔ́ʔɔri kaan yele ma!

²¹ Mii falipyenyɛnw Timɔte n yele syáanri, woro ní Lusyusi, ní Zyasɔn, ní Sosipatɛri be lè mii kpaʔa wóbèle.

²² Mii Tɛrisyusi wi sɛ́bɛw naa sɛ́bɛ lè, mii n yele syáanri Kàfɔw mɛ́ʔɛ na.

²³ Gayusi n yele syáanri wi lè mii ní Egiliziw myɛ jàtiginaɔn. Erasiti, wee wi kěgi wáli téeri lè, woro ní wolo senyɛnw Karitusi n yele syáanri.

²⁴ [Ki n yɛlɛ wo Kàfɔw Zyezu í wi kpɔ́ʔɔri kaan yele myɛ ma! Amiina!]

Sòolozanni

²⁵ Wee má séew nyɛ lè bi gbǎn yele kpéʔele yele í nìri lè bi yɛlɛ ní Syɛɛnjóocǎnri ní mii nyuu lè ni Zyezu Kirisi kéeli tèé, si wɔ́ɔ gbǎn yele kpéʔele yele í nìri bi yɛlɛ ní wi kalarali yirigele ní, lee wi da yaʔa làrama ni lè sáni dulunyanw í séli lè,

²⁶ ní si baa li tɛ̀ɛn tɔ́ɔliw ni kanyaajoobèle syɛɛnsɛbɛrɛ báriga ni n yɛlɛ ní bàngwɔɔ Kolocɔlɔɔ kajooli ní, koro ga pye syɛɛnfeleyi myɛ í di lóʔo si fɔ̀lɔ́ tága,

²⁷ woro Kolocɔlɔwee nibin má sícilimi nyɛ lè, woro na nìjangbɔɔri yɛlɛ làla o làla kwɔ́ɔmɔ fun Zyezu Kirisi bárigaw ni! Amiina!