Wɔrɔmi ye 15 - Cebaara Bible 2010

Bàā mɔ syɛɛnnyɛnnɛ kanidaanni caa, miyɛɛ yagana wóli ban í

¹ Wolo bele wo nìri lè tágali ni, ki n yɛlɛ wolo í da fànʔa-fùnvɔbèle túgoro tugu woyɛɛ na, ki ga yɛlɛ wolo í da wolo tiimaa kanidaangèle kpéʔele í.

² Ki n yɛlɛ wolo myɛ nibin nibin í da wolo syɛɛnnyɛnbèle kanidaangéle kpéʔele pe nyɔɔmi kéele na jàngó kàa í da fàrá be tágali na.

³ Níì cán Kirisi da ni wi tiimaa kanidaangèle kpéʔele í, fwɔɔ àmɛɛ ki da sɛ́bɛ lè níì jo: «Bele be mɔ teeri lè, pe tɛʔɛlɛyi n too mii na.»

⁴ Syɛ́ɛnree myɛ si ti da sɛ́bɛ lè booma ni Kolocɔlɔɔ syɛɛnsɛbɛri ni, dee bee maa sɛ́bɛ wolo tamani kéele na, koro ga pye kpàracogi ní kɛɛlɛli wi syɛɛnsɛbɛri kaangi wolo ma lè, wolo í sɔ̀ngumɔ tɛɛtaʔaga taa dee bee báriga ni.

⁵ Kolocɔlɔwee má kpàracogi ní kɛɛlɛli myɛ yìrigí lè, ki n yɛlɛ woro í gi yaʔa yele í pye ní yeyɛɛ ní fungo nibin na bi yɛlɛ ní Kirisi Zyezu kínidɛnɛgi ní,

⁶ koro ga pye yele myɛ í pye nyɔɔ na sáā Kolocɔlɔɔ kpɔ̀ʔɔrɔ́ ní fungo nibin ní, woro wee wi lè wolo Kàfɔw Zyezu Kirisi Tóow.

Syɛɛnjóocǎnri ti lè syɛɛnfeleyi myɛ wóro

⁷ Gee bee na gi yɛlɛ ye yeyɛɛ zámaga ye cò àmɛɛ Kirisi wɔ́ɔ̀ yele sámaga n cò lè gee bee si nìjangbɔɔri taʔa Kolocɔlɔɔ na.

⁸ Níì cán mii n gi joo níì jo Kirisi n baa pye kɛ́nɛw fɔ̀ɔlɔ falipyeo Kolocɔlɔɔ kányɛɛgi kéele na jàngó bi nyɔɔfaliyi foro yee Kolocɔlɔɔ da kpéʔele lè be toolɛɛbèle ma,

⁹ syɛɛnfeleyi wozanya si wɔ́ɔ ra Kolocɔlɔɔ kpɔ̀ʔɔrɔ́ wi nyínimi kéele na, àmɛɛ gi sɛ́bɛ lè níì jo: «Gee bee na mii a ra mɔ kpɔ̀ʔɔrɔ́ syɛɛnfeleyi nínge ni. Sáā kpɔ̀ʔɔrɔli ŋúnuyo ŋúu mɔ mɛ́ɛgi na.»

¹⁰ A gi níì jo: «Yele syɛɛnfeleyi, ki n yɛlɛ ye pínɛ yaa fundaanra kpéʔele ní Kolocɔlɔɔ syɛ́ɛnbèle ní.»

¹¹ Ní níì jo: «Yaa Kàfɔw sòoló, yele syɛɛnfeleyi myɛ, ki n yɛlɛ syɛɛnfeleyi myɛ í da wi sòoló.»

¹² Ezayi n wɔ́ɔ níì jo: «Wee wi lè Izayi yòdaʔagi, wi a pan, woro wee wi a ba yìri lè bi tɛ́ɛn syɛɛnfeleyi nyúngo na. Syɛɛnfeleyi a ba yi sɔ̀ngumi taʔa wi na.»

¹³ Kolocɔlɔwee wi nyɛ lè sɔ̀ngumi tɛɛtaʔaga kaanfɔlɔ, ki n yɛlɛ woro í yele fúnyi nyìn fundaanri myɛ ní fûnnyingi myɛ na tágali kólogo ni, koro ga pye kàa í da taari yele sɔ̀ngumi taʔala na Pìicǎnni fànʔa báriga ni.

Tànʔa n pye Pɔli ma bi gi sɛ́bɛ gee wi sɛ́bɛ lè

¹⁴ Ni senyɛ̀nnɛ, gee gi yele kéeli kwɔ́ɔ lè, mii tiimaa n tɔ̀nɔ n tága gi na ncan yele n nyìn funjǎngi na, àmɛɛ yele kérigèle myɛ cán lè níì gbàn ni yeyɛɛ sàmí.

¹⁵ Koro ní ki myɛ ní mii n soro n syɛɛngbanra sɛ́bɛ yele ma sɛ́bɛw naa ni bi yele sɔ̀ngumi tìrige kérigèle kèle na, kpɔ́ʔɔri báriga ni mii soro n koro kpéʔele, dee Kolocɔlɔɔ kaan mii ma lè,

¹⁶ níì jo mii í pye Kirisi Zyezu falipyeo syɛɛnfeleyi ma. Mii i nyɛ àmɛɛ sáriga-wòloo nyɛ lè ni Kolocɔlɔɔ Syɛɛnjóocǎnri fáli kpéʔele, koro ga pye mii í syɛɛnfeleyi kaan Kolocɔlɔɔ ma sáriga, wee wi Kolocɔlɔɔ dɛ́nɛ lè, àmɛɛ Pìicǎnni a yi jée mùnu bi yaʔa wi ma lè.

¹⁷ Gee bee na mii i nyɔ̌ngbɔɔlɔ táanri Kolocɔlɔɔ fáliw kéele na Kirisi Zyezu bárigaw ni.

¹⁸ Ye gi cán mii a tée mii nyúngi waʔa si keelaa joo í, kapye Kirisi ga li kpéʔele mii kɔ́yi ni syɛɛnjóori, ní kapyegèle báriga ni í, jàngó syɛɛnfeleyi í da lúro Kolocɔlɔɔ ma.

¹⁹ Kirisi n gee bee myɛ kpéʔele fɛ̀ɛ́bèle ní kakpoloyi báriga ni, ní Pìicǎnni báriga ni fwɔɔ n taa a mii wi Syɛɛnjóocǎnri joo n foro tɛ́ɛyi myɛ ni nlaa Zyerusalɛmi ma n taa n sáà nan Ilirii na.

²⁰ Mii i ŋàʔaná kányɛʔɛ ni bàā Syɛɛnjóocǎnri nyuu tɛ́ɛyi ni gi nyɛ lè pe ga kɔ́ɔ̀ Kirisi mɛ́ɛgi yeri í, koro ga pye mii a kɔ́ ra faanri wàa nikwɔɔ kàpɔɔnleo na í,

²¹ fwɔɔ mii í da gi kpéʔele bi yɛlɛ ní syɛ́ɛnri ní di sɛ́bɛ lè níì jo: «Bele be nyɛ lè wàa ga kɔ́ɔ̀ wi kéeli joo be ma í, bele bee a ba ra nyaagi. Bele be nyɛ lè pe ga kɔ́ɔ̀ wi kéeli lóʔo í, bele bee a ba li kɔ́rɔw cán.»

Pɔli i nyuu wi Wɔrɔmi gàriw kéele na wi tímana bi kpéʔele lè

²² Gee bee ki da ni mii yéregi tɔlɔyɔ saʔa, mii ga gbàn n kɔ́ɔ̀ kári yaà yele ma í.

²³ Kàjáa tɔ́ɔliw ni àmɛɛ gi nyɛ lè fali ní o nyɛ mii ma tátɛɛyi naa ni í, ní àmɛɛ gàriw láa da wɔ́ɔ̀ pye mii na lè n téè láa yaà yɛ̀ʔɛlɛ saʔa ni mii í kári yaà yele ma,

²⁴ koro na mii sɔ̀nguri i nyɛ gi na n jo, mii ga ni syée Ɛsipanyi tári ma lǎli ni lè, mii í sɔ̀lɔ yaà yele ma sa yele nyaa, mii ga sáà yele láa kwɔ́ɔ cɛɛri, yele si sa mii tórigo.

²⁵ Kàjáa tɔ́ɔliw ni mii i syée Zyerusalɛmi ma bi sa faliwaa kpéʔele Kolocɔlɔɔ syɛɛncanbèle ma nɛɛ bee.

²⁶ Níì cán Maseduwani ye ní Akayi ye n gi nyaa ki n yɛlɛ poro í wáli kpóʔoro bi sa kaan Zyerusalɛmi ye foomɔfɔbèle ma be nyɛ lè Kolocɔlɔɔ syɛɛncanbèle nínge ni.

²⁷ Ki n be dɛ́nɛ bi gi kpéʔele nya, a gi wɔ́ɔ i nyɛ Zyefubèle fwɔ́ɔlɔ i nyɛ be na. Níì cán àmɛɛ Zyefubèle da syɛɛnfeleyi wozanya lɛɛ lè yáriri na dee Pìicǎnni kaan be ma lè, ki n wɔ́ɔ̀ yɛlɛ syɛɛnfeleyi í da Zyefubèle dɛ̀ɛmɛ́ ní be kɔlɔ̀ yáriri ní.

²⁸ Mii ga kpɔ́ʔɔri bee fáli kpéʔele n di le be kɔ́yi ni n kwɔ́ɔ lǎli ni lè, mii a sɔ̀lɔ yaà yele ma si náa kári Ɛsipanyi ma.

²⁹ Mii n gi cán mii ga kári yaà yele ma lǎlee ni lè, mii a kári ní Kirisi dùbanɛʔɛw ní.

³⁰ Ni senyɛ̀nnɛ, mii i yele nyɛ́ɛri wolo Kàfɔw Zyezu Kirisi bárigaw ni ní Pìicǎnni tàmaga báriga ni, ye pínɛ ní mii ní waa nyɛ́ɛri ní lòmaana ní Kolocɔlɔɔ ma mii kéeli na,

³¹ koro ga pye mii í taa syɔɔ Zyude tári sìndagabéle ma, fáliw si wɔ́ɔ nyɔɔ Kolocɔlɔɔ syɛɛncanbèle ma wee mii syée sa kpéʔele lè Zyerusalɛmi ma.

³² Yaa nyɛ́ɛri Kolocɔlɔɔ ma jàngó wi ga fɔ̀lɔ, mii í kári yaà yele ma ní fundaanra ní, sa ŋɔ́ndaala taa mii fúngi ni yele níngi ni.

³³ Kolocɔlɔɔ wi nyɛ lè fûnnyingi kaanfɔlɔ, ki n yɛlɛ woro í pye ní yele myɛ ní! Amiina!