Wɔrɔmi ye 14 - Cebaara Bible 2010

Syɔɔn a kɔ́ ra kolomɔ kaangi wi senyɛnnɛ ma í

¹ Syɔ́ɔnwee tágala li cɛ́rɛ lè yele níngi ni, ye wi sámaga ye cò cama, yele a kɔ́ ra wi kábala wi sɔ̀nguri kèlē na í.

² Ye gi wéle, wàa n tága gi na woro a gbǎn ra yáriri myɛ líi, á wàa nikwɔɔ fànʔa si cɛ́rɛ, a woro i yaliifálari yagana líi.

³ Wee wi yáriri myɛ líi lè, ki ga yɛlɛ wi yaliifálari yagana lìifɔlɔ faʔa í, ki ga wɔ́ɔ̀ yɛlɛ yaliifálari yagana lìifɔlɔ í yáriri myɛ lìifɔlɔ córo kolomɔfɔlɔ í, níì cán Kolocɔlɔɔ n wi sámaga n cò.

⁴ Mɔ si wi nyɛ wìí, mɔ wee wi kolomɔ kaangi wàa nikwɔɔ falipyeo ma lè? A wi yére yoo, a wi too yoo, wi tiimaa kàfɔw má gi nyɛ. Wi si a sámaga yére, níì cán fànʔa i nyɛ Kàfɔw ma bi wi cò wi yére.

⁵ Wàa i gi sɔ̀ngí n jo canyaa n kpólo n sɔ̀lɔ yàa na, á wàa nikwɔɔ si i gi sɔ̀ngí cányi myɛ i nyɛ sèjira. Ki si n yɛlɛ syɔɔn o syɔɔn í gi tímana bi gi fílige cán wi tiimaa fúngi ni gee gi nyɔɔ lè.

⁶ Wee wi ga ni cangaa kpɔ́ʔɔgi lè, wi i gi kpɔ́ʔɔgi Kàfɔw kpɔ̀ʔɔrɔlɔ kéele na. Wee wi ga ni yáriri myɛ líi lè, wi i di líi Kàfɔw kpɔ̀ʔɔrɔlɔ kéele na, níì cán wi i bariga kaangi Kolocɔlɔɔ ma. Wee si wi lè wi o yáriri myɛ líi í, Kàfɔw kéele na wi gi kpéʔele, ní i bariga kaangi Kolocɔlɔɔ ma.

⁷ Níì cán wolo wàa faala woweew, ní wi woguuw o nyɛ wiyɛɛ wóo í.

⁸ Wolo ga pye sìi na, Kàfɔw kéele na wolo nyɛ sìi na. Wolo si ga wɔ́ɔ̀ kùu, Kàfɔw kéele na wolo kùu. Kánmi bee na wolo ga pye sìi na yoo, a wolo náà kùu yoo, wolo i nyɛ Kàfɔw wòolo.

⁹ Níì cán Kirisi n kùu níì nyán n pye sìi na jàngó bi pye kúbèle ní niweebèle myɛ Kàfɔlɔ.

¹⁰ Mɛ̀ɛ́ gi nyɛ mɔ si i kolomɔ kaangi mɔ senyɛnw ma? A mɔ, mɛ̀ɛ́ gi nyɛ mɔ si i mɔ senyɛnw faari nya? Mi gi cán wo myɛ a ba yére Kolocɔlɔɔ kútiiceri-tɛ́ɛgi ni.

¹¹ Níì cán ki n sɛ́bɛ níì jo: «Kàfɔw n jo: ‹Amɛɛ gi nyɛ lè kányɛʔɛ mii i nyɛ sìi na, ànbée gi wɔ́ɔ̄ nyɛ kányɛʔɛ syɛ́ɛnbèle myɛ a ba kpùmɔnɔ mii taana. Pe myɛ a ra Kolocɔlɔɔ kpɔ̀ʔɔrɔ́ ní be nyɔ́ɔyi ní.› »

¹² Kánmi bee na wo myɛ nibin nibin a ba woyɛɛ kapyegèle joo tɛ̀ɛn Kolocɔlɔɔ na.

Mɔ a kɔ́ mɔ senyɛnwaa cáan í

¹³ Gee bee na ki ga yɛlɛ wolo í ní ra kolomɔ kaangi wolo senyɛnwaa ma í, fwɔɔ waa kɔ̀rɔsíi koro ga pye wolo a kɔ́ pye sábabu wolo senyɛnwaa na wi too í, wàlá wi pùuni í.

¹⁴ Wolo Kàfɔw Zyezu n gi tɛ̀ɛn mii na, a mii gi cán n fílige ncan yarigaa faala ga nɔ́nʔɔ kiyɛɛ ma í. Kàjáa syɔɔn ga yarigaa córo yanɔnʔɔgɔ, ki n nɔ́nʔɔ wee bee ma.

¹⁵ Mɔ yaliiri kéele ga pye sábabu n funbɛɛnrɛ lége mɔ senyɛnw ni, mi gi cán mɔ ní o táanri tàmagi kólogo ni lǎli bee ni í. Wee kéele na Kirisi kùu lè, ki ga yɛlɛ mɔ í kɔ́ mɔ yaliiri kéele yaʔa li pye sábabu bi wi kálagi í.

¹⁶ Koro na gee gi nyɔɔ lè yele ma, ki ga yɛlɛ yele í gee bee yaʔa ki pye sábabu si pèle kaan paa syɛɛnpeere nyuu ki kéeli na í.

¹⁷ Níì cán Kolocɔlɔɔ fǎngi o nyɛ lìile ní gbaala kéele í, fwɔɔ sínni, ní fûnnyingi, ní fundaanri, dee wolo taagi lè Pìicǎnni báriga ni.

¹⁸ Wee wi ga ni báara lè Kirisi ma kánmi bee na, woro kéeli n Kolocɔlɔɔ dɛ́nɛ, á wi mɛ́ɛtanʔa taa syɛ́ɛnbèle ma.

¹⁹ Koro na kérigèle ke a gbǎn bɛ̀ɛ́li yaʔa li kòro wolo níngi ni lè, si wɔ́ɔ wolo yaʔa waa woyɛɛ dɛ̀ɛmɛ́ kàa sáā fàrá wolo tágali na lè, waa gele bee caa.

²⁰ Ki ga yɛlɛ mɔ í Kolocɔlɔɔ fáliw kálagi lìile kéele na í. Wolo n gi cán yaliiri féleye myɛ a gbǎn lìi. Kàjáa dee ti a pye lè mɔ senyɛnwaa toolo sábabu, mɔ ga dee bee lìi, koro gi pee.

²¹ Gee gi nyɔɔ lè, koro gi nyɛ mɔ í káari káala ní dùvɛɛnw gbaala yaʔa n náà fàra yáriri myɛ na, dee ti a gbǎn pye lè mɔ senyɛnwaa toolo sábabu.

²² Tágalee li nyɛ mɔ ma lè kéeli bee na, lee bee yaʔa li kòro mɔ ní Kolocɔlɔɔ níngi ni. Syɔɔn ga keelaa córo kacànna níì li kpéʔele, wi fúngi si o wi kábala kéeli bee na níì jo li n pee í, syɔ́ɔnw bee i nyɛ dùba pyà!

²³ Syɔɔn si ga ni yarigaa líi ní i wiyɛɛ gábala gi na, kútiiw n too wee bee na, níì cán wi ga gi kpéʔele ní tágala ní í. Keele o keele si li nyɛ lè li ga kpéʔele ní tágala ní í, li i nyɛ kapeele.