Wɔrɔmi ye 13 - Cebaara Bible 2010

Lóʔoli kéele tári fànʔafɔɔlɔ ma

¹ Ki n yɛlɛ syɔɔn o syɔɔn í da lúro fànʔafɔbèle ma pe lè wo nyúngi na. Níì cán fàngaa faala o beè gee gi lè ki ga yìri Kolocɔlɔɔ ma í, fǎnyi yi nyɛ lè beè, Kolocɔlɔɔ wi yi télege.

² Gee bee na syɔ́ɔnwee wi lè wi o lúro fànʔafɔbèle ma í, wi n Kolocɔlɔɔ yatelegeyi cée, bele be gee bee kpéʔele lè, kútii a ba kúun be na.

³ Fànʔafɔbèle o nyɛ fyáara yáriya kacànbyebèle ma í, fwɔɔ kapeebyebèle ma. A mɔ i caa lé fǎngi a kɔ́ pye mɔ ma fyáara yáriga í? Ki ga pye nya, maa kacàngēle kpéʔele, koro ga pye ki a ra mɔ kpɔ́ʔɔgi,

⁴ níì cán fànʔafɔlɔ i nyɛ Kolocɔlɔɔ falipyeo mɔ nyɔɔmi kéele na. Mɔ si ga ni kapeegèle kpéʔele, ki n yɛlɛ mɔ í da fɛ̀ɛgí wi na kɛ. Níì cán ŋɔséew o nyɛ wi kɔ́gi ni gbanzan í, wi i nyɛ Kolocɔlɔɔ falipyeo bàā Kolocɔlɔɔ fundanʔari cáan kapeebyebèle na.

⁵ Koro na gi yɛlɛ mɔ í da lúro fànʔafɔbèle ma mɔ tiimaa fúngi kéele na, ki a kɔ́ pye fyáari yagana kéele na í.

⁶ Gee bee na yele wɔ́ɔ i nyǔnyi lɔ́rɔ kaangi. Níì cán fáliw be kpéʔele lè làla o làla, Kolocɔlɔɔ wóo be kpéʔele.

⁷ Gee gi yɛlɛ syɛ́ɛnbèle myɛ ma lè, yaa gee bee kaangi be ma, ki n yɛlɛ yaa nyǔnyi lɔ́rɔ kaangi nyǔnyi lɔ́rɔ syɔɔfɔlɔ ma, yáā céwologi kaangi céwologi syɔɔfɔlɔ ma, wee na yele yɛlɛ bàā fɛ̀ɛgí lè, yaa fɛ̀ɛgí wi na, wee yele yɛlɛ bàā kpɔ́ʔɔgi lè, yaa wi kpɔ́ʔɔgi.

Syɛɛnnyɛnbèle tàmaga lele kéele

⁸ Ki ga yɛlɛ syɔɔnwaa faala fwɔ́ɔlɔ í kɔ́ kòro yele na í, kapye bi tàmaga le ní yeyɛɛ ní lè, koro fwɔ́ɔli ban í. Níì cán wee wi tàmaga le ní wi syɛɛnnyɛnnɛ ní lè, wee bee n Mowizi làlwaw foro.

⁹ Làlwaw tundunro ti gi joo lè níì jo: «Mɔ a kɔ́ kanɔnʔɔrɔ kpéʔele í, mɔ a kɔ́ syɔɔn kpóo í, mɔ a kɔ́ yùu í, mɔ a kɔ́ nyabɛɛnnɛ kpéʔele í,» tundunri bee ní wozanri di kòro lè, ti myɛ nyúngo gi nyɛ gee naa: «Mɔ syɛɛnnyɛnw kéele yaʔa li mɔ dɛ́nɛ àmɛɛ mɔ miyɛɛ dɛ́nɛ lè.»

¹⁰ Tàmagi levɔlɔ o kapeele kpéʔele wi syɛɛnnyɛnnɛ na í, gee bee na tàmagi i Mowizi làlwaw forogi.

Wo woyɛɛ zámaga wo yaʔa Kirisi panni yɛ́ʔɛ na

¹¹ Bi ní tàa fàra dee naa na, yele n lǎli naa cán, lee ni wo nyɛ lè, lǎli n nan yele í yìri nya ŋúnɔmi na, níì cán lǎlee ni wolo da sélì tága lè, syɔɔli n nùuni wolo na tɔ́ɔliw ni n sɔ̀lɔ lǎli bee na.

¹² Yébiligi wonɛʔɛgɛ n sɔ̀lɔ n kwɔ́ɔ, á nyǐndaligi nùuni. Koro na gi yɛlɛ wo yébilimi kapyegèlē yaʔa wó gbɛ̀ɛ́nmi kapɛɛnkpumɔn-yárira le woyɛɛ na.

¹³ Ki n yɛlɛ waa síngi waa táanri bi yɛlɛ ní cángi làla tánʔaganma ní, wáā woyɛɛ kɔ̀rɔsíi kakolobyeri ní singbaadinri na, si wɔ́ɔ ra woyɛɛ kɔ̀rɔsíi kanɔnʔɔri, ní cecaabeeri, ní nànjaabeeri na, ní kàsiiw, ní nyabɛɛnni na.

¹⁴ Kàjáa ki n yɛlɛ ye Kàfɔw Zyezu Kirisi le yeyɛɛ na burogo ki ga yɛlɛ yele í ní yele sɔ̀ngumi taʔa yele céri laànitaʔa kele na bàā ge kpéʔele í.